കോഴിക്കോട്: മാറാട് നടുവട്ടം സ്വദേശിനിയായ ഷിംനയുടെ ആത്മഹത്യയിൽ ഭർത്താവിനെതിരെ ഗുരുതര ആരോപണവുമായി കുടുംബം. ഭർത്താവ് മദ്യപിച്ചെത്തി ഷിംനയെ നിരന്തരം ഉപദ്രവിച്ചിരുന്നുവെന്ന് ബന്ധുക്കൾ ആരോപിച്ചു. ഭർത്താവിന്റെ പങ്ക് അന്വേഷിക്കണമെന്ന് ആവശ്യപ്പെട്ട് മാറാട് പൊലിസിൽ പരാതി നൽകിയതായി ഷിംനയുടെ ബന്ധു വ്യക്തമാക്കി.

വെള്ളിയാഴ്ച രാത്രിയാണ് ഷിംനയെ കിടപ്പുമുറിയിൽ തൂങ്ങിമരിച്ച നിലയിൽ കണ്ടെത്തുന്നത്. സംഭവദിവസം രാത്രി മദ്യപിച്ചെത്തിയ ഭർത്താവ് ഷിംനയെ മർദിച്ചിരുന്നുവെന്ന് ബന്ധുക്കൾ പറയുന്നു. ഭർത്താവിന് ഷിംനയോട് സംശയമുണ്ടായിരുന്നതാണ് ഉപദ്രവത്തിന് കാരണമെന്നും അവർ ആരോപിച്ചു. സംഭവത്തിന് മുമ്പ് ഷിംന അമ്മയുമായി ഫോണിൽ സംസാരിച്ചിരുന്നു. തുടർന്ന് ഭർത്താവുമായി വഴക്കുണ്ടായതിന് പിന്നാലെ മുറിയിൽ പോയി ആത്മഹത്യ ചെയ്യുകയായിരുന്നുവെന്ന് കുടുംബം വെളിപ്പെടുത്തി.

ALSO READ: വിശപ്പിനെ ആയുധമാക്കിമാറ്റി ഇസ്റാഈൽ: ഗസ്സയിലെ പട്ടിണിമരണങ്ങൾ ചിന്തിക്കുന്നതിലും അപ്പുറം

മുൻപും ഷിംന ആത്മഹത്യയ്ക്ക് ശ്രമിച്ചിരുന്നതായി ബന്ധുക്കൾ പറഞ്ഞു. ഭർത്താവുമായുള്ള ബന്ധം ഉപേക്ഷിക്കണമെന്ന് കുടുംബം നിരവധി തവണ ആവശ്യപ്പെട്ടിരുന്നെങ്കിലും ഷിംന അതിന് തയ്യാറായില്ല. ഭർത്താവുമായുള്ള പ്രശ്നങ്ങളെ തുടർന്ന് ഷിംന പലതവണ വീട്ടിൽ വന്ന് താമസിച്ചിരുന്നു. മധ്യസ്ഥ ചർച്ചകൾക്ക് ശേഷം തിരികെ പോവുകയായിരുന്നു. പോസ്റ്റ്മോർട്ടം നടപടികൾ പൂർത്തിയാക്കി മൃതദേഹം ബന്ധുക്കൾക്ക് വിട്ടുനൽകി. മാറാട് പൊലിസ് കേസ് അന്വേഷിച്ചുവരികയാണ്.