ഡെൻവർ: ഡെൻവർ അന്താരാഷ്ട്ര വിമാനത്താവളത്തിൽ ശനിയാഴ്ച അമേരിക്കൻ എയർലൈൻസിന്റെ ബോയിംഗ് 737 മാക്സ് 8 വിമാനത്തിന്റെ ലാൻഡിംഗ് ഗിയറിൽ തീപിടിത്തമുണ്ടായതിനെ തുടർന്ന് പറന്നുയരാനിരുന്ന വിമാനം റൺവേയിൽ നിർത്തിവച്ചു. മയാമിയിലേക്ക് പോകേണ്ടിയിരുന്ന എഎ-3023 വിമാനത്തിന്റെ ടയറിലെ തകരാറാണ് തീപിടുത്തത്തിന് കാരണമെന്ന് എയർലൈൻ അധികൃതർ വ്യക്തമാക്കി. സംഭവത്തിൽ 173 യാത്രക്കാരെയും സുരക്ഷിതമായി ഒഴിപ്പിച്ചെങ്കിലും ഒരാൾക്ക് നിസാര പരുക്കേറ്റതായി റിപ്പോർട്ട് ചെയ്തു.

ഉച്ചയ്ക്ക് 2:45-ന് (പ്രാദേശിക സമയം) വിമാനം പറന്നുയരാൻ ഒരുങ്ങുന്നതിനിടെ ലാൻഡിംഗ് ഗിയറിൽ തീയും പുകയും ഉയർന്നത് ശ്രദ്ധയിൽപ്പെട്ടതിനെ തുടർന്ന് പൈലറ്റ് പറന്നുയരുന്നത് ഉടൻ നിർത്തുകയായിരുന്നു. തുടർന്ന് അടിയന്തര രക്ഷാപ്രവർത്തനം ആരംഭിച്ച ഡെൻവർ വിമാനത്താവളത്തിലെ അഗ്നിശമന വിഭാഗവും അധികൃതരും യാത്രക്കാരെ വിമാനത്തിൽ നിന്ന് സുരക്ഷിതമായി പുറത്തെത്തിച്ചു. യാത്രക്കാരെ റൺവേയിൽ നിന്ന് ബസ് മുഖേന ടെർമിനലിലേക്ക് മാറ്റി. വൈകുന്നേരം 5:10-ഓടെ തീ പൂർണമായും അണച്ചതായി ഡെൻവർ അഗ്നിശമന വിഭാഗം അറിയിച്ചു. പരിഭ്രാന്തരായ യാത്രക്കാർ വിമാനത്തിൽ നിന്ന് അടിയന്തര സ്ലൈഡ് വഴി താഴേക്ക് ഇറങ്ങുന്നതിന്റെ ദൃശ്യങ്ങൾ സാമൂഹ്യ മാധ്യമങ്ങളിൽ പ്രചരിച്ചു. സംഭവത്തെക്കുറിച്ച് കൂടുതൽ അന്വേഷണം നടത്തുമെന്ന് ഫെഡറൽ ഏവിയേഷൻ അഡ്മിനിസ്ട്രേഷൻ (എഫ്എഎ) വ്യക്തമാക്കി.

ലാൻഡിംഗ് ഗിയറിലെ ടയറിൽ മെയിന്റനൻസ് പ്രശ്നമാണ് തീപിടിത്തത്തിന് കാരണമായതെന്ന് അമേരിക്കൻ എയർലൈൻസിന്റെ പ്രസ്താവനയിൽ സ്ഥിരീകരിച്ചു. എല്ലാ യാത്രക്കാരെയും ജീവനക്കാരെയും സുരക്ഷിതമായി വിമാനത്തിൽ നിന്ന് ഇറക്കുകയും, വിമാനം പരിശോധനയ്ക്കായി സർവീസിൽ നിന്ന് പിൻവലിച്ചിട്ടുണ്ടെന്നും എയർലൈൻ അധികൃതർ അറിയിച്ചു.

അതിനിടെ, രക്ഷപ്പെടുത്തുന്ന ദൃശ്യങ്ങളിൽ ഒരു യാത്രക്കാരൻ തന്റെ കുഞ്ഞിനേക്കാൾ ലഗേജിന് മുൻഗണന നൽകിയതിന് വിമർശനം നേരിടുന്നു. വീഡിയോയിൽ ഇയാൾ ഒരു കൈയിൽ കുട്ടിയെ കഴുത്തിൽ പിടിച്ചും മറുകൈയിൽ ലഗേജ് എടുത്തും സ്ലൈഡ് വഴി ഇറങ്ങുന്നത് കാണാം. എന്നാൽ, സ്ലൈഡിൽ നിന്ന് ഇറങ്ങിയ ശേഷം ബാലൻസ് നഷ്ടപ്പെട്ട് കുട്ടിയുടെ മേൽ വീഴുന്നതായും ദൃശ്യങ്ങളിൽ വ്യക്തമാണ്.

കഴിഞ്ഞ അഞ്ച് മാസത്തിനിടെ ഡെൻവർ വിമാനത്താവളത്തിൽ റിപ്പോർട്ട് ചെയ്യപ്പെടുന്ന രണ്ടാമത്തെ തീപിടിത്ത സംഭവമാണിത്. മാർച്ചിൽ, ഡാളസിലേക്ക് പോകേണ്ടിയിരുന്ന അമേരിക്കൻ എയർലൈൻസിന്റെ ബോയിംഗ് 737-800 വിമാനത്തിനും സമാനമായ തീപിടിത്തം ഉണ്ടായിരുന്നു. ആ സംഭവത്തിൽ 172 യാത്രക്കാരെയും ആറ് ക്രൂ അംഗങ്ങളെയും സുരക്ഷിതമായി ഒഴിപ്പിച്ചിരുന്നു.

On Saturday, an American Airlines Boeing 737 Max 8 caught fire on the runway at Denver International Airport due to a landing gear issue, forcing the cancellation of its Miami-bound flight. All 173 passengers were safely evacuated, with one minor injury reported. Dramatic visuals showed passengers sliding down emergency chutes as smoke filled the area. The FAA is investigating the incident, the second fire-related event at Denver in five months