കൊച്ചി: ആര്‍എസ്എസിന്റെ ജ്ഞാനസഭയില്‍ പങ്കെടുത്തിട്ടില്ലെന്ന് കുഫോസ് വിസി എ ബിജുകുമാര്‍. മോഹന്‍ ഭാഗവതുമായി വേദി പങ്കിട്ടിട്ടില്ലെന്നും, അമൃത ഇന്‍സ്റ്റിറ്റ്യൂട്ടില്‍ നടത്തിയ മറ്റൊരു സെമിനാറിലാണ് താന്‍ പങ്കെടുത്തതെന്നും വിസി വാര്‍ത്ത കുറിപ്പില്‍ വ്യക്തമാക്കി. ആര്‍എസ്എസ് മേധാവിയുടെ വിദ്യാഭ്യാസ സദസില്‍ താന്‍ പങ്കെടുത്തതായി പുറത്തുവരുന്ന മാധ്യമ വാര്‍ത്തകള്‍ തെറ്റാണെന്ന് ബിജുകുമാർ പറഞ്ഞു. 

'എറണാകുളത്ത് അമൃത വിദ്യാപീഠത്തില്‍ വെച്ച് അസോസിയേഷന്‍സ് ഓഫ് ഇന്‍ഡ്യന്‍ യൂണിവേഴ്‌സിറ്റീസ് ഇന്ന് (ജൂലൈ 27) സംഘടിപ്പിച്ച വിദ്യാഭ്യാസ സെമിനാറില്‍ ഒരു വൈസ് ചാന്‍സിലര്‍ എന്ന നിലയില്‍ പങ്കെടുത്ത് '' വിദ്യാഭ്യാസ പരിവര്‍ത്തനം കേരളത്തിന്റെ കഴിവുകളും സാധ്യതകളും'' എന്ന വിഷയത്തില്‍ എന്റെ നിലപാടുകള്‍ വിശദീകരിക്കുകയാണ് ചെയ്തത്. ആര്‍എസ്എസ് മേധാവിയുടെ വിദ്യാഭ്യാസ സദസില്‍ ഞാന്‍ പങ്കെടുത്തതായുള്ള വാര്‍ത്ത തികച്ചും തെറ്റാണ്. പ്രസ്തുത പരിപാടിയില്‍ ഞാന്‍ പങ്കെടുത്തിട്ടില്ലെന്ന വിവരം അറിയിച്ചു കൊള്ളുന്നു,' വിസി വാര്‍ത്ത കുറിപ്പില്‍ വ്യക്തമാക്കി. 

ALSO READ: പത്തനംതിട്ടയിൽ വള്ളം മറിഞ്ഞ് രണ്ട് യുവാക്കൾ മരിച്ചു; ഒരാൾക്കായുള്ള തിരച്ചിൽ തുടരുന്നു

ഇന്ന് കൊച്ചിയില്‍ വെച്ച് നടത്തിയ ജ്ഞാനസഭയിൽ കേരളത്തിലെ നാല് സർവകലാശാല വിസിമാർ പങ്കെടുത്തെന്ന് വാർത്ത വന്നിരുന്നു. കേരള യൂണിവേഴ്‌സിറ്റി, കണ്ണൂർ, കാലിക്കറ്റ്, വിസിമാർക്ക് പുറമെ കുഫോസ് വിസിയും പങ്കെടുത്തെന്നായിരുന്നു റിപ്പോർട്ട്. ഇത് തിരുത്തിയാണ് വിസി ബിജുകുമാർ നേരിട്ട് രം​ഗത്തെത്തിയിട്ടുള്ളത്.

അതേസമയം ആർഎസ്എസ് തലവൻ മോഹൻ ഭാഗവത്, ഗവർണർ രാജേന്ദ്ര ആർലേക്കർ എന്നിവർ സമ്മേളനത്തിൽ പങ്കെടുത്തു. 
നാല് ദിവസത്തേക്കാണ് സമ്മേളനം നടക്കുന്നത്. ദേശീയ വിദ്യാഭ്യാസ നയം നടപ്പിലാക്കുകയെന്ന ആവശ്യം ഉന്നയിച്ചാണ് സമ്മേളനം.കേരളത്തിലെ അഞ്ച് വിസിമാർക്കാണ് പരിപാടിക്ക് ക്ഷണം ലഭിച്ചത്. വിസിമാർ ആർഎസ്എസ് പരിപാടിയിൽ പങ്കെടുത്തതിനെതിരെ പ്രതിഷേധം ശക്തമാവുകയാണ്. 

ആർഎസ്എസ് ജ്ഞാനസഭയിൽ വിസിമാർ പങ്കെടുക്കുന്നത് അപമാനകരമാണെന്ന നിലപാടാണ് സിപിഎമ്മിനുള്ളത്. വ്യക്തിപരമായി പരിപാടിയിൽ പങ്കെടുക്കുന്നത് വിസിമാർക്ക് തീരുമാനിക്കാമെന്ന ഉന്നത വിദ്യാഭ്യാസ മന്ത്രി ആർ ബിന്ദുവിന്റെ നിലപാടിനെ തള്ളിയാണ് എംവി ഗോവിന്ദൻ ഇക്കാര്യം പറഞ്ഞത്. സംഭവത്തിൽ പ്രതിഷേധവുമായി കെഎസ്‌യുവും രംഗത്തെത്തിയിട്ടുണ്ട്.