മയാമി: മയാമി അന്താരാഷ്ട്ര വിമാനത്താവളത്തിൽ അടിവസ്ത്രത്തിനുള്ളിൽ ആമകളെ ഒളിപ്പിച്ച് കടത്താൻ ശ്രമിച്ച സ്ത്രീ ട്രാൻസ്‌പോർട്ടേഷൻ സെക്യൂരിറ്റി അഡ്മിനിസ്ട്രേഷൻ (ടിഎസ്എ) ഉദ്യോഗസ്ഥരുടെ പിടിയിലായി. യുഎസ് ആസ്ഥാനമായുള്ള സുരക്ഷാ ഏജൻസിയുടെ നൂതന സ്‌ക്രീനിംഗ് സാങ്കേതികവിദ്യ ഉപയോഗിച്ച് നടത്തിയ പരിശോധനയിൽ സ്ത്രീയുടെ നെഞ്ചിന് സമീപം ഒളിപ്പിച്ച നിലയിൽ ഒരു വസ്തു കണ്ടെത്തുകയായിരുന്നു. തുടർന്ന് നടത്തിയ സ്വകാര്യ പരിശോധനയിൽ ബ്രായ്ക്കുള്ളിൽ പ്ലാസ്റ്റിക്കിൽ അതിവിദഗ്ധമായി പൊതിഞ്ഞ നിലയിൽ രണ്ട് ആമകളെ കണ്ടെത്തി. അതേസമയം പിടികൂടിയ ആമകളിൽ ഒന്ന് ജീവനോടെയല്ലായിരുന്നുവെന്ന് ടിഎസ്എ വ്യക്തമാക്കി.

സംഭവത്തെക്കുറിച്ച് ടിഎസ്എ സോഷ്യൽ മീഡിയയിലൂടെ മുന്നറിയിപ്പ് നൽകി. "നിങ്ങളുടെ വളർത്തുമൃഗങ്ങളുമായി സുരക്ഷിതമായി യാത്ര ചെയ്യാൻ ഞങ്ങൾ ആഗ്രഹിക്കുന്നു. എന്നാൽ, അവയെ ഒരിക്കലും വസ്ത്രത്തിനടിയിൽ ഒളിപ്പിക്കരുത്. വിമാനത്തിൽ വളർത്തുമൃഗങ്ങളെ കൊണ്ടുപോകുന്നതിന് മുമ്പ് എയർലൈനുമായി ബന്ധപ്പെട്ട് ആവശ്യമായ മാർഗനിർദേശങ്ങൾ മനസ്സിലാക്കണം. സുരക്ഷാ ചെക്ക്‌പോസ്റ്റുകളിൽ ചെറിയ മൃഗങ്ങളെ കാരിയറിൽ നിന്ന് നീക്കം ചെയ്ത് പരിശോധനയ്ക്ക് ഹാജരാക്കണം," ടിഎസ്എയുടെ ഔദ്യോഗിക സോഷ്യൽ മീഡിയ പോസ്റ്റിൽ പറയുന്നു.

പിടികൂടിയ ആമകളിൽ ജീവനോടെ കണ്ടെത്തിയ ആമയെ മത്സ്യ-വന്യജീവി വകുപ്പിന് കൈമാറിയതായും ടിഎസ്എ അറിയിച്ചു. വളർത്തുമൃഗങ്ങളെ സുരക്ഷിതമായി കൊണ്ടുപോകാൻ യാത്രക്കാർ നിർദേശങ്ങൾ പാലിക്കണമെന്നും അനധികൃതമായി മൃഗങ്ങളെ കടത്താൻ ശ്രമിക്കരുതെന്നും അധികൃതർ മുന്നറിയിപ്പ് നൽകി.