റായ്പൂര്‍: ഛത്തീസ്ഗഡില്‍ മനുഷ്യക്കടത്തും നിര്‍ബന്ധിത മതപരിവര്‍ത്തനവും ആരോപിച്ച് അറസ്റ്റ് ചെയ്ത മലയാളി കന്യാസ്ത്രീകള്‍ക്ക് ജാമ്യം നല്‍കരുതെന്നാവശ്യപ്പെട്ട് ദുര്‍ഗ് സെഷന്‍സ് കോടതിക്ക് പുറത്ത് ശക്തമായ പ്രതിഷേധമാണ് ജാമ്യാപേക്ഷ പരിഗണിക്കുന്നതിനിടെ ഹിന്ദുത്വവാദികള്‍ നടത്തിയത്. സംഘ്പരിവാര്‍ സംഘടനയായ വിശ്വഹിന്ദു പരിഷത്തിന്റെ യുവജനവിഭാഗം ബജ്‌റംഗ്ദളിന്റെ നേതൃത്വത്തില്‍ സ്ത്രീകളും യുവാക്കളും അടക്കമുള്ളവരാണ് പ്രതിഷേധിച്ചത്.  ജയ്ശ്രീറാം മുഴക്കിയുള്ള പ്രതിഷേധത്തിനിടെ ഒരുകാരണവശാലും ജാമ്യം അനുവദിക്കരുതെന്നും ഇവര്‍ ആവശ്യമുയര്‍ത്തുന്നു. വിധി വന്നതിന് പിന്നാലെ കോടതിക്ക് പുറത്ത് ഹിന്ദുത്വരുടെ ആഹ്ലാദപ്രകടനവും അരങ്ങേറി.

കന്യാസ്ത്രീകളുടെ ജാമ്യാപേക്ഷ ദുര്‍ഗ് സെഷന്‍സ് കോടതിയും തള്ളുകയാണുണ്ടായത്. ഇതോടെ കന്യാസ്ത്രീകള്‍ ദുര്‍ഗിലെ സെന്‍ട്രല്‍ ജയിലില്‍ തന്നെ തുടരും. ഹൈക്കോടതിയെ സമീപിക്കാന്‍ നിര്‍ദ്ദേശിച്ചു കൊണ്ടാണ് ഹരജി തള്ളിയത്. ഇവര്‍ക്കെതിരെ ചുമത്തിയിരിക്കുന്നത് ഗുരുതരമായ വകുപ്പുകളാണെന്നും അത് പരിഗണിക്കാന്‍അധികാരമില്ലെന്ന് കോടതി ചൂണ്ടിക്കാട്ടിയെന്നാണ് സൂചന. മനുഷ്യക്കടത്തും, നിര്‍ബന്ധിത മത പരിവര്‍ത്തനവും ഉള്‍പ്പെടെ വരുന്ന ഛത്തീസ്ഗഡ് മത സ്വാതന്ത്ര്യ നിയമത്തിലെ നാല്, ഭാരതീയ ന്യായ സംഹിത 143 എന്നീ വകുപ്പുകളാണ് ചുമത്തിയിട്ടുള്ളത്. ഈ വകുപ്പുകള്‍ പ്രകാരം 10 വര്‍ഷം വരെ തടവുശിക്ഷ ലഭിക്കാം.

ALSO READ: കന്യാസ്ത്രീകള്‍ക്ക് ജാമ്യമില്ല, അപേക്ഷ ദുര്‍ഗ് സെഷന്‍സ് കോടതി തള്ളി, ജയിലില്‍ തുടരും

അസീസി സിസ്റ്റേഴ്സ് ഓഫ് മേരി ഇമ്മാക്യുലേറ്റ് (ഗ്രീന്‍ ഗാര്‍ഡന്‍സ്) സന്ന്യാസസഭയിലെ സിസ്റ്റര്‍മാരായ പ്രീതി മേരി, വന്ദന ഫ്രാന്‍സിസ് എന്നിവരുടെ ജാമ്യാപേക്ഷ കഴിഞ്ഞ ദിവസം മജിസ്‌ട്രേറ്റ് കോടതിയും തള്ളിയിരുന്നു. സിസ്റ്റര്‍ പ്രീതി മേരിയാണ് കേസില്‍ ഒന്നാം പ്രതി. സിസ്റ്റര്‍ വന്ദന ഫ്രാന്‍സിസ് രണ്ടാം പ്രതിയുമാണ്. 

കന്യാസ്ത്രീകള്‍ക്കായി ദുര്‍ഗിലെ പ്രമുഖ അഭിഭാഷകന്‍ അഡ്വ. രാജ്കുമാര്‍ തിവാരിയാണ് ഹാജരായത്. കത്തോലിക്ക ബിഷപ് കോണ്‍ഫെഡറേഷന്റെ (സിബിസിഐ) കീഴില്‍ നിയമ, വനിത വകുപ്പുകള്‍ കൈകാര്യം ചെയ്യുന്ന വൈദികരും കന്യാസ്ത്രീകളും അടങ്ങുന്ന സംഘം റായ്പുരില്‍ എത്തിയിട്ടുണ്ട്. കന്യാസ്ത്രീകളുടെ ജാമ്യാപേക്ഷ മജിസ്‌ട്രേറ്റ് കോടതി തള്ളിയതോടെയാണ് സെഷന്‍സ് കോടതിയെ സമീപിച്ചത്.

കഴിഞ്ഞ വെള്ളിയാഴ്ചയാണ് സിറോ മലബാര്‍ സഭയുടെ കീഴില്‍ ചേര്‍ത്തല ആസ്ഥാനമായ അസീസി സിസ്റ്റേഴ്സ് ഓഫ് മേരി ഇമ്മാക്യുലേറ്റ് (ഗ്രീന്‍ ഗാര്‍ഡന്‍സ്) സന്ന്യാസ സഭയ്ക്ക് കീഴിലെ സ്ഥാപനങ്ങളിലേക്ക് ജോലിക്കായി മൂന്ന് പെണ്‍കുട്ടികളെ കൂട്ടിക്കൊണ്ടുപോകാന്‍ വന്ന കന്യാസ്ത്രീകള്‍ പിടിയിലാകുന്നത്. ഛത്തീസ്ഗഡിലെ ദുര്‍ഗില്‍ വെച്ചാണ്  മലയാളികളായ ഇവരെ അറസ്റ്റ് ചെയ്തത്. ബജ്‌റംഗ്ദള്‍ പ്രവര്‍ത്തകര്‍ ദുര്‍ഗ് റെയില്‍വേ സ്റ്റേഷനില്‍ വെച്ച് ഇവരെ തടഞ്ഞ് പൊലിസിനെ അറിയിക്കുകയായിരുന്നു. കേസില്‍ പെണ്‍കുട്ടികളുടെ ബന്ധു സുഖ്മന്‍ മണ്ടാവിയെ മൂന്നാം പ്രതിയാക്കിയാണ് എഫ്.ഐ.ആര്‍ ഇട്ടിട്ടുള്ളത്.

Members of Bajrang Dal and other Hindutva groups staged a strong protest outside the Durg Sessions Court in Chhattisgarh, demanding denial of bail to Malayali nuns arrested on charges of human trafficking and forced religious conversion. Celebrations erupted after the court rejected their plea.