പൂനെ: കാർഗിൽ യുദ്ധത്തിൽ പാകിസ്ഥാനെതിരെ പോരാടിയ ഇന്ത്യൻ മുൻ സൈനികന്റെ വീട്ടിൽ അതിക്രമിച്ചു കയറി പൗരത്വം തെളിയിക്കണമെന്ന് ആവശ്യപ്പെട്ട് ഹിന്ദുത്വ പ്രവർത്തകർ. മഹാരാഷ്ട്രയിലെ പൂനെയിൽ താമസിക്കുന്ന മുൻ സൈനികനായ ഹക്കിമുദ്ദീൻ ഷെയ്ഖിന്റെ (48) കുടുംബ വീട്ടിലേക്കാണ് ഹിന്ദുത്വ പ്രവർത്തകർ അനധികൃതമായി കടന്നുകയറിയത്. കുടുംബം ബംഗ്ലാദേശികളാണെന്ന് ആരോപിച്ചാണ് ഇവർ പൗരത്വം തെളിയിക്കാൻ ആവശ്യപ്പെട്ടത്. സംഭവം നടക്കുമ്പോൾ പൊലിസ് നോക്കിനിന്നതായി ഹക്കിമുദ്ദീന്റെ സഹോദരൻ ഇർഷാദ് ഷെയ്ഖ് ആരോപിച്ചു. ശനിയാഴ്ച അർധരാത്രി പൂനെയിലെ ചന്ദനഗർ പ്രദേശത്താണ് ഈ ഞെട്ടിക്കുന്ന സംഭവം അരങ്ങേറിയത്.
"നിലവിൽ ഉത്തർപ്രദേശിലെ പ്രതാപ്ഗഡിൽ താമസിക്കുന്ന എന്റെ മൂത്ത സഹോദരൻ ഹക്കിമുദ്ദീൻ ഷെയ്ഖ് വർഷങ്ങളോളം ഇന്ത്യൻ സൈന്യത്തിൽ സേവനമനുഷ്ഠിച്ചു. കാർഗിൽ യുദ്ധത്തിൽ രാജ്യത്തിനായി പോരാടിയ വ്യക്തിയാണ് അവൻ. 2000-ൽ എഞ്ചിനീയേഴ്സ് റെജിമെന്റിൽ നിന്ന് ഹവിൽദാറായാണ് അവൻ വിരമിച്ചത്," ഇർഷാദ് ഷെയ്ഖ് വ്യക്തമാക്കി. തന്റെ മൂത്ത സഹോദരൻ ഉത്തർപ്രദേശിൽ താമസിക്കുമ്പോൾ, താനും മറ്റു രണ്ട് സഹോദരന്മാരും അവരുടെ കുട്ടികളും കഴിഞ്ഞ ദശകങ്ങളായി പൂനെയിലെ ചന്ദനഗർ പ്രദേശത്താണ് താമസിക്കുന്നതെന്നും അദ്ദേഹം കൂട്ടിച്ചേർത്തു.

ശനിയാഴ്ച അർധരാത്രിയിൽ, ഏകദേശം 80 പേർ അടങ്ങുന്ന ഒരു സംഘം പെട്ടെന്ന് കുടുംബത്തിന്റെ വീട്ടിലേക്ക് അതിക്രമിച്ചു കയറി, കുടുംബാംഗങ്ങളുടെ ആധാർ കാർഡുകൾ ആവശ്യപ്പെടാൻ തുടങ്ങി. രേഖകൾ കാണിച്ചപ്പോൾ, അവ വ്യാജമാണെന്ന് ആരോപിച്ച് അവർ തള്ളിക്കളഞ്ഞു. സ്ത്രീകളോടും കുട്ടികളോടും പോലും ആധാർ കാർഡുകൾ ഹാജരാക്കാൻ ആവശ്യപ്പെട്ടതായി ഇർഷാദ് ആരോപിച്ചു. കഴിഞ്ഞ 60 വർഷമായി കുടുംബം ഈ പ്രദേശത്ത് താമസിക്കുന്നുണ്ടെന്നും, മൂത്ത സഹോദരനെ കൂടാതെ, തന്റെ രണ്ട് അമ്മാവന്മാരും ഇന്ത്യൻ സൈന്യത്തിൽ സേവനമനുഷ്ഠിച്ചിട്ടുണ്ടെന്നും അദ്ദേഹം വ്യക്തമാക്കി.

സൈനിക കുടുംബമാണെന്ന് വിശദീകരിച്ചിട്ടും ഹിന്ദുത്വ പ്രവർത്തകർ കേൾക്കാൻ തയ്യാറായില്ല. "അവർ ഞങ്ങളെ അധിക്ഷേപിക്കുകയും ബംഗ്ലാദേശികളാണെന്ന് ആരോപിക്കുകയും ചെയ്തു. ആവശ്യമെങ്കിൽ വസ്തുതകൾ പരിശോധിക്കാമെന്ന് ഞാൻ അവരോട് പറഞ്ഞു. എന്നാൽ, ആരുടെയെങ്കിലും വീട്ടിൽ അനധികൃതമായി കയറി, അസഭ്യം വിളിക്കുകയും അർധരാത്രിയിൽ രേഖകൾ കാണിക്കാൻ നിർബന്ധിക്കുകയും ചെയ്യുന്നത് ശരിയല്ല," ഇർഷാദ് ഷെയ്ഖ് പറഞ്ഞു.

ഹിന്ദുത്വ പ്രവർത്തകരുടെ സംഘം 'ജയ് ശ്രീ റാം' എന്ന് മുദ്രാവാക്യം വിളിക്കുകയും കുടുംബാംഗങ്ങളെ പൊലിസ് സ്റ്റേഷനിലേക്ക് നിർബന്ധിച്ചു കൊണ്ടുപോകുകയും ചെയ്തു. സംഘത്തോടൊപ്പം രണ്ട് പൊലിസുകാരും ഉണ്ടായിരുന്നതായി ഷെയ്ഖ് ആരോപിച്ചു. ചന്ദനഗർ പൊലിസ് സ്റ്റേഷനിൽ എത്തിയപ്പോൾ, ഒരു വനിതാ പൊലിസ് ഇൻസ്പെക്ടർ അവരുടെ രേഖകൾ വാങ്ങി പുറത്ത് കാത്തിരിക്കാൻ ആവശ്യപ്പെട്ടു. രണ്ട് മണിക്കൂർ കാത്തിരിക്കാൻ നിർബന്ധിച്ച ശേഷം, അടുത്ത ദിവസം വീണ്ടും വരാൻ പൊലിസ് നിർദ്ദേശിച്ചു. അങ്ങനെ ചെയ്തില്ലെങ്കിൽ ബംഗ്ലാദേശി പൗരന്മാരായി പ്രഖ്യാപിക്കുമെന്ന് പൊലിസ് ഭീഷണിപ്പെടുത്തിയതായും ഷെയ്ഖ് പറഞ്ഞു.

അടുത്ത ദിവസം, കുടുംബം വീണ്ടും പൊലിസ് സ്റ്റേഷനിലെത്തി. "സംഭവത്തെക്കുറിച്ച് ഒരു വിഷയവും ഉണ്ടാക്കരുതെന്നും പരാതി നൽകരുതെന്നും പൊലിസ് ഞങ്ങളോട് ആവശ്യപ്പെട്ടു. ഇപ്പോൾ ഞങ്ങളെ സമ്മർദ്ദത്തിലാക്കാനും ആരും ഞങ്ങളുടെ വീട്ടിൽ അതിക്രമിച്ചു കയറിയിട്ടില്ലെന്ന് കാണിക്കാനും അവർ ശ്രമിക്കുകയാണ്," ഷെയ്ഖ് ആരോപിച്ചു. രേഖകളിൽ എന്തെങ്കിലും പൊരുത്തക്കേടുകൾ ഉണ്ടായിരുന്നെങ്കിൽ പൊലിസ് തങ്ങൾക്കെതിരെ നടപടി എടുക്കുമായിരുന്നുവെന്ന് അദ്ദേഹം ചൂണ്ടിക്കാട്ടി.

"എന്നാൽ, ഞങ്ങളുടെ എല്ലാ രേഖകളും യഥാർത്ഥമായതിനാൽ, ഇപ്പോൾ അവർ ഞങ്ങളോട് മിണ്ടാതിരിക്കാൻ ആവശ്യപ്പെടുകയാണ്," അദ്ദേഹം വ്യക്തമാക്കി. 400 വർഷം പഴക്കമുള്ള തങ്ങളുടെ കുടുംബത്തിന്റെ ഇന്ത്യൻ പൗരത്വത്തിന്റെ തെളിവുകൾ നൽകാൻ തയ്യാറാണെന്ന് ഉദ്യോഗസ്ഥരോട് പറഞ്ഞിരുന്നതായും ഷെയ്ഖ് കൂട്ടിച്ചേർത്തു. കുടുംബത്തിലെ നിരവധി അംഗങ്ങൾ ഇന്ത്യൻ സൈന്യത്തിൽ സേവനമനുഷ്ഠിച്ചിട്ടുണ്ട്. 1971-ലെ യുദ്ധത്തിൽ ഒരു ബോംബ് സ്ഫോടനത്തിൽ തന്റെ ഒരു അമ്മാവന് പരിക്കേറ്റു, അദ്ദേഹത്തിന് ധീരതയ്ക്കുള്ള അവാർഡ് ലഭിച്ചിട്ടുണ്ട്. 1965-ലെ ഇന്തോ-പാക് യുദ്ധത്തിൽ മറ്റൊരു അമ്മാവൻ പോരാടിയതായും ഷെയ്ഖ് പറഞ്ഞു. വീട്ടിൽ അതിക്രമിച്ചു കയറിയവർക്കെതിരെ അന്വേഷണം ആവശ്യപ്പെട്ട് പൊലിസിൽ പരാതി നൽകിയെങ്കിലും ഇതുവരെ യാതൊരു നടപടിയും സ്വീകരിച്ചിട്ടില്ലെന്നും അദ്ദേഹം ആരോപിച്ചു.

"ഇത് ഒരിക്കലും സംഭവിക്കാൻ പാടില്ലായിരുന്നു"

പൂനെയിലെ തന്റെ കുടുംബത്തിന് സംഭവിച്ചത് ഒരിക്കലും സംഭവിക്കാൻ പാടില്ലാത്തതാണെന്ന് മുൻ സൈനികനായ ഹക്കിമുദ്ദീൻ ഷെയ്ഖ് പ്രതികരിച്ചു. "ഞങ്ങൾ 50 വർഷത്തിലേറെയായി പൂനെയിൽ താമസിക്കുന്നു. ഞങ്ങൾ ഇവിടെ താമസിക്കുമ്പോൾ, എന്റെ അമ്മാവൻ മുഹമ്മദ് സലിമിനെ ഇന്ത്യൻ സൈന്യത്തിൽ റിക്രൂട്ട് ചെയ്തിരുന്നു. എന്റെ കുടുംബത്തിന് സംഭവിച്ചത് തെറ്റാണ്. ആവശ്യമെങ്കിൽ, ഞാൻ പൊലിസുമായി സംസാരിക്കുകയും വിശദീകരണം ആവശ്യപ്പെടുകയും ചെയ്യും," അദ്ദേഹം പറഞ്ഞു.

ഹിന്ദുത്വ സംഘടനാ പ്രവർത്തകർ സൈനികന്റെ കുടുംബാംഗങ്ങളെ ഭയപ്പെടുത്താൻ ശ്രമിച്ചതായി നാഷണൽ കോൺഫറൻസ് ഫോർ മൈനോറിറ്റി പ്രസിഡന്റ് ദംബലെ പറഞ്ഞു. ഈ സംഭവവുമായി ബന്ധപ്പെട്ട് എഫ്ഐആർ രജിസ്റ്റർ ചെയ്യാൻ ആവശ്യപ്പെട്ടിട്ടുണ്ടെന്നും, നടപടി ആവശ്യപ്പെട്ട് പൂനെ പൊലിസ് കമ്മിഷണർ അമിതേഷ് കുമാറിനെ കാണുമെന്നും അദ്ദേഹം വ്യക്തമാക്കി.

Maharashtra, Hindutva activists forcibly entered the home of Hakimuddin Sheikh, a Kargil War veteran, demanding proof of citizenship, alleging the family were Bangladeshis. The incident occurred late Saturday in Chandanagar. Despite presenting valid documents, the mob dismissed them and harassed women and children. Police, present during the intrusion, remained passive. The family, with a 60-year legacy in Pune and multiple members who served in the Indian Army, faced insults and threats. The police later pressured them not to file a complaint, despite their genuine documents. No action has been taken against the intruders.