കൊച്ചി : സർക്കാർ ഇടപെടുമെന്ന  പ്രഖ്യാപനത്തോടെ കുതിച്ചുയർന്ന  വെളിച്ചെണ്ണയുടെ ചില്ലറ വിൽപന വിലയിൽ ഇടിവ്. വില കുറയ്ക്കാൻ സർക്കാരിന്റെ നേരിട്ടുള്ള  ഇടപെടലുണ്ടാകുമെന്ന പ്രതീതിയും വില കുറയുന്നതിന് ഇടയാക്കിയെന്നും  വിലയിരുത്തപ്പെടുന്നു. എന്നാൽ ബ്രാൻഡഡ് വെളിച്ചെണ്ണയുടെ ചില്ലറ വിൽപന വില 550  രൂപ മുതൽ 592 രൂപ വരെ എത്തിയതിൽ നിന്ന് കുറവ് വരാത്തതിനാൽ ഉപഭോക്താക്കൾക്ക് ഗുണം ലഭിക്കുന്നില്ല.

ബ്രാൻഡഡ് അല്ലാത്ത ചില്ലറ വിൽപന വില  420ലേക്കെത്തിയിട്ടുണ്ട്.വിപണിയിൽ വില വർധനവിന് തുടക്കമിട്ടത് സർക്കാർ നിയന്ത്രണത്തിലുള്ള കേരഫെഡാണെന്നും ആരോപണമുണ്ട്. 540 രൂപയാണ് കേര വെളിച്ചെണ്ണയുടെ വില. ഇതിനെ മറയാക്കിയാണ് മറ്റുള്ളവർ വിലവർധിപ്പിച്ചത്. രണ്ട് മാസക്കാലമായി തുടരുന്ന വിലക്കയറ്റത്തിന്റെ സാഹചര്യം മുതലാക്കി വ്യാജന്മാർ വൻ നേട്ടമുണ്ടാക്കിയിരുന്നു. 290 മുതൽ 340 രൂപ വരെ വിലയുള്ള വെളിച്ചെണ്ണ പാക്കറ്റുകൾ വിപണിയിൽ ലഭ്യമാണ്. വലിയ തോതിൽ താഴ്ന്ന വിലയ്ക്ക് വിൽക്കുന്നത്  വ്യാജ വെളിച്ചെണ്ണയാണെന്നാണ്  വ്യാപാരികൾ ആരോപിക്കുന്നത്. 

അതേസമയം വിപണിയിൽ കൂടുതൽ വെളിച്ചെണ്ണ ലഭ്യമാക്കുമെന്ന സർക്കാർ പ്രഖ്യാപനത്തിന്റെ മറവിൽ വ്യാജന്മാരെത്തിയത് ആശങ്കാജനകമാണെന്ന് വ്യാപാരികൾ പറയുന്നു. മായം കലർന്ന എണ്ണ വിപണിയിലെത്തിക്കാനുള്ള സാധ്യതയുള്ളതായി നേരത്തെ തന്നെ മുന്നറിയിപ്പുണ്ടായിരുന്നു . പരിശോധനകൾ കർശനമാക്കുമെന്നുമുള്ള പ്രഖ്യാപനം  വാക്കുകകളിലൊതുങ്ങിയതായും ആരോപണമുയരുന്നുണ്ട്. 

സർക്കാർ ബ്രാൻഡായ കേരഫെഡിന്റെ പേരുപയോഗിച്ച് പോലും അമ്പതോളം വ്യാജ ഉൽപന്നങ്ങൾ വിപണിയിലുണ്ടെന്ന് വ്യാപാരികൾ പറയുന്നു. ഭക്ഷ്യസുരക്ഷാ വകുപ്പിന്റെ പരിശോധനകൾ പേരിന് മാത്രമാണെന്നും, ശക്തമായ നടപടികൾ ഉണ്ടാകുന്നില്ലെന്നും വ്യാപക പരാതി ഉയരുന്നുണ്ട്. വെളിച്ചെണ്ണ വിപണിയിൽ ഇടപെടുമെന്ന സർക്കാരിന്റെ ഉറപ്പിൽ പ്രതീക്ഷ അർപ്പിച്ചിരിക്കുകയാണ് സാധാരണക്കാരെന്ന് ഭക്ഷ്യ ഉപദേശക വിജിലൻസ് സമിതി അംഗം എബി ഐപ്പ് പറഞ്ഞു.