അൽ ഐൻ: കടുത്ത ചൂട് നിലനിൽക്കുന്നതിനിടെ ആശ്വാസം പകർന്ന് അൽ ഐനിൽ മഴ. അൽ ഐനിലെ ഉമ്മു ഗാഫയിലാണ് ഇന്നലെ വൈകുന്നേരം 4.15ഓടെ കനത്ത മഴ ലഭിച്ചത്.

അതേസമയം, യു.എ.ഇയുടെ മറ്റ് ഭാഗങ്ങളിൽ ഇന്നലെ മേഘാവൃത അന്തരീക്ഷമാണുണ്ടായിരുന്നത്. ദുബൈയുടെ ചില ഭാഗങ്ങളിൽ വൈകുന്നേരം ദൃശ്യപരത കുറച്ച് പൊടിപടലങ്ങളുയർന്നു. രാത്രി 8 മണി വരെ ചില കിഴക്കൻ, തെക്കൻ പ്രദേശങ്ങളിൽ മഴ സാധ്യത ദേശീയ കാലാവസ്ഥാ കേന്ദ്രം (എൻ.സി.എം) പ്രവചിച്ചിരുന്നു.

ഫുജൈറ, അൽ ഐൻ പോലുള്ള പ്രദേശങ്ങളിൽ തിങ്കളാഴ്ചയും ചൊവ്വാഴ്ചയും മഴ സാധ്യത പ്രവചിച്ചിട്ടുണ്ട്.

ന്യൂനമർദത്തിന്റെ വികാസവും തെക്കു-കിഴക്കൻ കാറ്റു മൂലമുള്ള ഈർപ്പവും നിറഞ്ഞ സാഹചര്യമുണ്ടാകുമെന്നും എൻ.സി.എം അധികൃതർ പറയുന്നു. ഇതുകാരണം, വാഹനമോടിക്കുന്നവർ ജാഗ്രത പാലിക്കണം. ചില സമയങ്ങളിൽ ശക്തമായ കാറ്റ് പെട്ടെന്ന് പൊടി നിറഞ്ഞ കാലാവസ്ഥയ്ക്കും മണൽക്കാറ്റിനും ഇടയാക്കും. ഇത് ദൃശ്യപരത കുറയ്ക്കുമെന്നും ബന്ധപ്പെട്ട അധികൃതർ ചൂണ്ടിക്കാട്ടി.

ഇന്നലെ താപനില 44° മുതൽ 49° സെൽഷ്യസ് വരെ ഉയർന്നിരുന്നു. ശരാശരി താഴ്ന്ന താപനില 32°-37° സെൽഷ്യസ് നിലയിലായിരുന്നു. ദുബൈയിൽ 'റിയൽ ഫീൽ' താപനില നിലവിൽ 44° സെൽഷ്യസ് ആയിരുന്നുവെന്നും അക്യു വെതർ പറഞ്ഞു.

ഇന്ന് പകൽ അന്തരീക്ഷം ഭാഗികമായി മേഘാവൃതവും, മൂടൽമഞ്ഞും ഉള്ളതാകും. കിഴക്കു-തെക്കു ദിശകളിൽ മേഘ വ്യൂഹങ്ങൾ രൂപപ്പെടാനുള്ള സാധ്യതയുണ്ട്. ഇത് മഴയുമായി ബന്ധപ്പെട്ടതാകുമെന്നും അധികൃതർ നിരീക്ഷിച്ചു. പടിഞ്ഞാറു ദിശയിൽ ചില ബാഹ്യ-ഉൾ പ്രദേശങ്ങളിൽ ഇന്ന് രാത്രിയിലും നാളെ രാവിലെയും ഈർപ്പം കൂടുതലായിരിക്കും. പകൽ സമയത്ത് തെക്കു-കിഴക്ക് മുതൽ വടക്കു-കിഴക്ക് വരെ ദിശകളിൽ കാറ്റ് വീശും. ഇത് പൊടിപടലങ്ങൾ ഉയരാനിടയാക്കും. മണിക്കൂറിൽ 10–25 കിലോമീറ്റർ വേഗത്തിലും, പരമാവധി 40 കിലോ മീറ്റർ വേഗത്തിലുമാകും കാറ്റടിക്കുകയെന്നും അധികൃതർ കൂട്ടിച്ചേർത്തു.

Heavy rain hit some areas of Al Ain yesterday, while other parts of the country saw cloudy to partly cloudy skies. Dusty conditions with low visibility were also reported in some parts of Dubai. Heavy rain was reported in Um Ghafa in Al Ain