പാലാ: പാലാ-തൊടുപുഴ ഹൈവേയിൽ മുണ്ടാങ്കൽ പള്ളിക്കു സമീപം അമിതവേ​ഗതയിലെത്തിയ കാർ നിയന്ത്രണം വിട്ട് രണ്ട് സ്കൂട്ടറുകളെ ഇടിച്ച് തെറിപ്പിച്ചു. ദാരുണ സംഭവത്തിൽ സ്കൂട്ടർ യാത്രികരായ രണ്ട് യുവതികൾ മരിച്ചു. പാലക്കുഴക്കുന്നേൽ സുനിലിന്റെ ഭാര്യ ജോമോൾ (35), മേലുകാവ് നല്ലംകുഴിയിൽ സന്തോഷിന്റെ ഭാര്യ ധന്യ (38) എന്നിവരാണ് മരിച്ചത്. ജോമോളുടെ മകൾ അന്നമോൾ (12)ന് ഗുരുതര പരുക്കുകളോടെ പാലായിലെ സ്വകാര്യ ആശുപത്രിയിൽ ചികിത്സയിലാണ്. ഇരു സ്കൂട്ടറുകളെയും ഇടിച്ച് തെറിപ്പിച്ച് അപകടം വരുത്തി മതിലിൽ പതിച്ചാണ് കാർ നിന്നത്. സംഭവത്തിൽ അമിത വേഗതയാണ് അപകടത്തിന് കാരണമെന്ന് പൊലിസ് വ്യക്തമാക്കി. കാറോടിച്ചിരുന്നത് പാലാ സെന്റ് തോമസ് ടിടി കോളജിലെ ബിഎഡ് വിദ്യാർഥിയാണെന്ന് സ്ഥിരീകരിച്ചു. ഇയാളെ പാലാ പൊലിസ് കസ്റ്റഡിയിലെടുത്തു. ഇടുക്കി സ്വദേശിയായ വിദ്യാർഥിക്കെതിരെ മനപൂർവമല്ലാത്ത നരഹത്യയ്ക്ക് കേസെടുക്കുമെന്ന് പൊലിസ് അറിയിച്ചു.
 
ഇന്ന് രാവിലെ 9:30നാണ് ദാരുണമായ അപകടം നടന്നത്. അമിത വേഗതയിലായിരുന്ന കാർ, തൊടുപുഴ ഭാഗത്തു നിന്ന് പാലായിലേക്ക് വരികയായിരുന്ന യുവതികളുടെ രണ്ട് സ്കൂട്ടറുകളിൽ ഇടിക്കുകയായിരുന്നു. പാലായിലെ സ്വകാര്യ ബിഎഡ് കോളജിലെ നാല് വിദ്യാർഥികളാണ് കാറിൽ ഉണ്ടായിരുന്നത്. ഇവർ ബിഎഡ് പരിശീലനത്തിനായി രാമപുരം ഭാഗത്തേക്ക് പോവുകയായിരുന്നുവെന്നാണ് വിവരം.

അപകടത്തിൽ മരിച്ച ജോമോൾ പാലാ സെന്റ് മേരീസ് സ്കൂളിൽ ആറാം ക്ലാസ് വിദ്യാർഥിനിയായ തന്റെ മകൾ അന്നമോളെ സ്കൂളിൽ വിടാൻ പോവുകയായിരുന്നു. ധന്യ പാലായിലെ സ്വകാര്യ ബാങ്കിലെ ജീവനക്കാരിയാണ്. ജോലിക്ക് പോകുന്നതിനിടെയാണ് അപകടം ധന്യയുടെ ജീവൻ അപകടത്തിൽ പൊലിഞ്ഞത്. ശ്രീനന്ദൻ, ശ്രീഹരി എന്നിവരാണ് ധന്യയുടെ മക്കൾ.

ഇടിയുടെ ആഘാതത്തിൽ സ്കൂട്ടറുകളിൽ നിന്ന് തെറിച്ച് വീണ ധന്യ, അന്നമോൾ, ജോമോൾ എന്നിവരെ നാട്ടുകാർ ഉടൻ പാലായിലെ സ്വകാര്യ ആശുപത്രിയിൽ എത്തിച്ചെങ്കിലും ജോമോൾ, ധന്യ എന്നിവരുടെ ജീവൻ രക്ഷിക്കാനായില്ല. തലയ്ക്കേറ്റ ഗുരുതര പരുക്കാണ് മരണകാരണം. അന്നമോൾ ഗുരുതര പരുക്കുകളോടെ ചികിത്സയിൽ തുടരുകയാണ്. മൃതദേഹങ്ങൾ പോസ്റ്റ്മോർട്ടത്തിനായി പാലാ താലൂക്ക് ആശുപത്രിയിലേക്ക് മാറ്റി 

In Pala, Kerala, a speeding car collided with two scooters on the Pala-Thodupuzha highway, killing two women, Jomol (35) and Dhanya (38), and critically injuring Jomol's daughter, Annamol (12). The car, driven by a BEd student, crashed into a wall after the collision. Police have taken the driver into custody and confirmed excessive speed as the cause, with a case of non-intentional homicide to be filed