മാരുതി സുസുക്കിയുടെ ഓഫ്‌റോഡ് വാഹന ശ്രേണിയിൽ അഭിമാന സ്ഥാനം നേടിയ ജിപ്സിയുടെ പിൻഗാമിയായ ജിംനി, ഫൈവ്-ഡോർ മോഡലിന്റെ ഡെലിവറി ഓസ്ട്രേലിയയിൽ താൽക്കാലികമായി നിർത്തിവച്ചതായി റിപ്പോർട്ട്. മഹീന്ദ്ര ഥാറിനെതിരെ മത്സരിക്കാൻ കഴിവില്ലെന്നും ഓഫ്‌റോഡിംഗിൽ പിന്നിലാണെന്നുമുള്ള വിമർശനങ്ങൾ പലരും ജിംനിയെക്കുറിച്ച് പറയാറുണ്ട് എന്നത് പരസ്യമായ രഹസ്യമാണ്. എന്നാൽ ജിംനിയുടെ ജനപ്രീതിയും ഡിമാൻഡും ഒട്ടും കുറഞ്ഞിരുന്നില്ല എന്ന് മാത്രമല്ല ഓഫ്റോഡിങ്ങിലുള്ള ജിംനിയുടെ അസാധ്യ പെർഫോമൻസ് വിമർശകരുടെ വായ അടപ്പിച്ചു. അതേസമയം ഓസ്ട്രേലിയയിൽ ഫൈവ്-ഡോർ ജിംനി XL എന്നറിയപ്പെടുന്ന ഈ എസ്‌യുവിയുടെ ഡെലിവറി നിർത്തിവയ്ക്കാനുള്ള തീരുമാനം കമ്പനി വ്യക്തമായ കാരണം വെളിപ്പെടുത്താതെ നടപ്പാക്കിയിരിക്കുകയാണ്.

ഇന്ത്യയിൽ നിർമിക്കുന്ന ഫൈവ്-ഡോർ ജിംനി, ഓസ്ട്രേലിയയിൽ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനുമായാണ് വിപണിയിൽ എത്തുന്നത്. 99 bhp കരുത്തും 130 Nm പീക്ക് ടോർക്കും ഉത്പാദിപ്പിക്കുന്ന ഈ എഞ്ചിൻ, 4-സ്പീഡ് ടോർക്ക് കൺവെർട്ടർ ഓട്ടോമാറ്റിക് ഗിയർബോക്സുമായി ജോടിയാക്കിയിരിക്കുന്നു. മാനുവൽ ഗിയർബോക്സ് ഓപ്ഷനിൽ മോഡൽ ലഭ്യമല്ല. ലാഡർ ഫ്രെയിം ഷാസിയിൽ നിർമിച്ച ഈ എസ്‌യുവി, സുസുക്കിയുടെ ഓൾഗ്രിപ്പ് പ്രോ ഫോർ-വീൽ ഡ്രൈവ് സിസ്റ്റവും ഉൾക്കൊള്ളുന്നു, ഇത് ഏത് ഭൂപ്രദേശത്തും മികച്ച പ്രകടനം ഉറപ്പാക്കുന്നു.

ALSO READ: എഥനോൾ കലർത്തിയ പെട്രോൾ: വാഹനങ്ങൾക്ക് ഗുണമോ ദോഷമോ?

 

 

ഇന്ത്യയിൽ 12.75 ലക്ഷം മുതൽ 14.95 ലക്ഷം രൂപ വരെയാണ് ജിംനിയുടെ എക്സ്-ഷോറൂം വില. ഏകദേശം 1,200 കിലോഗ്രാം ഭാരമുള്ള ഈ വാഹനം, ഈ വിഭാഗത്തിലെ ഏറ്റവും ഭാരം കുറഞ്ഞ മോഡലുകളിൽ ഒന്നാണ്. ഹെഡ്‌ലൈറ്റ് വാഷർ, 9 ഇഞ്ച് ടച്ച്‌സ്‌ക്രീൻ ഇൻഫോടെയ്ൻമെന്റ് സിസ്റ്റം, വയർലെസ് ആൻഡ്രോയിഡ് ഓട്ടോ, ആപ്പിൾ കാർപ്ലേ, 6 എയർബാഗുകൾ, ഓട്ടോ ക്ലൈമറ്റ് കൺട്രോൾ, ക്രൂയിസ് കൺട്രോൾ, പുഷ്-ബട്ടൺ സ്റ്റാർട്ട് തുടങ്ങിയ നിരവധി ഫീച്ചറുകളും ജിംനി വാഗ്ദാനം ചെയ്യുന്നു.

ALSO READ: 175 കിലോമീറ്റർ റേഞ്ച്: ഒന്നര മണിക്കൂറിൽ 80% ചാർജ്; ഒബെന്റെ സൂപ്പർ ഇലക്ട്രിക് സ്കൂട്ടർ

ഓസ്ട്രേലിയയിൽ ജിംനി ലൈറ്റ്, ജിംനി, ജിംനി XL എന്നീ മൂന്ന് വേരിയന്റുകളിൽ ലഭ്യമാണ്. ഇതിൽ ജിംനി XL മാത്രമാണ് ഫൈവ്-ഡോർ മോഡൽ. ഈ മോഡലിന്റെ ഡെലിവറി നിർത്തിവെച്ചത്. ജിംനി ലൈറ്റിന്റെ വില 30,490 ഓസ്ട്രേലിയൻ ഡോളർ (ഏകദേശം 16.7 ലക്ഷം രൂപ) മുതലാണ്. ഇന്ത്യയിൽ ത്രീ-ഡോർ, ഫൈവ്-ഡോർ വേരിയന്റുകൾ നിർമിക്കുമ്പോൾ, ഫൈവ്-ഡോർ മോഡൽ ഇന്ത്യയിൽ മാത്രമാണ് ഉൽപ്പാദിപ്പിക്കുന്നത്. ദക്ഷിണാഫ്രിക്കയ്ക്ക് ശേഷം ഓസ്ട്രേലിയയാണ് ഇന്ത്യയിൽ നിന്നും കയറ്റുമതി ചെയ്യുന്ന ഈ മോഡലിന്റെ പ്രധാന വിദേശ വിപണി.

 

 

ഡെലിവറി നിർത്തിവച്ചതിന്റെ കാരണം വ്യക്തമല്ലെങ്കിലും, ത്രീ-ഡോർ വേരിയന്റുകളുടെ ഡെലിവറി തുടരുമെന്നും വാഹനങ്ങൾ തിരികെ വിളിക്കുന്നില്ലെന്നും കമ്പനി അറിയിച്ചിട്ടുണ്ട്. അതേസമയം തന്നെ ഇന്ത്യയിൽ ജിംനിയുടെ ഡെലിവറിയിൽ തടസ്സങ്ങളൊന്നും റിപ്പോർട്ട് ചെയ്തിട്ടില്ല. കൂടുതൽ വിവരങ്ങൾക്കായി കമ്പനിയുടെ ഔദ്യോഗിക പ്രസ്താവനകൾക്കായി കാത്തിരിക്കാം.

Maruti Suzuki has unexpectedly stopped deliveries of the five-door Jimny XL in Australia, while continuing with three-door variants. The reason remains undisclosed, with no recall issued. Powered by a 1.5L petrol engine and equipped with a four-speed automatic and four-wheel drive, the India-made SUV remains popular despite the halt