ഇംഗ്ലണ്ടിനെതിരെയുള്ള അഞ്ചു ടെസ്റ്റ് മത്സരങ്ങളുടെ പരമ്പര അവസാനിച്ചിരിക്കുകയാണ്. ഇനി ഇന്ത്യൻ ടീമിന്റെ മുന്നിലുള്ളത് ഏഷ്യാ കപ്പാണ്. സെപ്റ്റംബർ 9 മുതൽ 28 വരെയാണ് ഏഷ്യ കപ്പ് നടക്കുന്നത്. ഏഷ്യ കപ്പിനുള്ള ടീമിൽ ഏതെല്ലാം താരങ്ങൾ ഉൾപ്പെടുമെന്നാണ് ആരാധകർ ഉറ്റുനോക്കുന്നത്. ഏഷ്യ കപ്പിനുള്ള ഇന്ത്യൻ ടീമിൽ ഓൾ റൗണ്ടർ കൃണാൽ പാണ്ഡ്യ ഇടം നേടുമെന്നാണ് റിപ്പോർട്ടുകൾ സൂചിപ്പിക്കുന്നത്. ന്യൂസ് 18 ആണ് ഇക്കാര്യം റിപ്പോർട്ട് ചെയ്യുന്നത്.

2025 ഐപിഎല്ലിൽ റോയൽ ചലഞ്ചേഴ്‌സ് ബെംഗളൂരുവിനായി മികച്ച പ്രകടനം നടത്തിയതിന് പിന്നാലെയാണ് കൃണാൽ പാണ്ഡ്യ വീണ്ടും ഇന്ത്യൻ ടീമിലെത്തുന്നത്. ആർസിബിയെ ചരിത്രത്തിലെ ആദ്യ ഐപിഎൽ കിരീടത്തിലേക്ക് നയിക്കുന്നതിൽ നിർണായകമായ പങ്കാണ് കൃണാൽ വഹിച്ചത്.

ബെംഗളൂരുവിനായി 15 മത്സരങ്ങളിൽ നിന്നും 17 വിക്കറ്റുകളാണ്‌ താരം നേടിയത്. ഫൈനലിൽ പഞ്ചാബ് കിങ്സിനെ വീഴ്ത്തിയാണ് ആർസിബി കിരീടം ചൂടിയത്. കലാശപോരാട്ടത്തിലെ പ്ലയെർ ഓഫ് ദി മാച്ചായി തെരഞ്ഞെടുക്കപ്പെട്ടതും കൃണാൽ തന്നെയാണ്. ഫൈനലിൽ നാല് ഓവറിൽ വെറും 17 റൺസ് മാത്രം വിട്ടുനൽകി രണ്ട് വിക്കറ്റുകളായിരുന്നു കൃണാൽ സ്വന്തമാക്കിയത്.

മുംബൈ ഇന്ത്യൻസിനൊപ്പം 2017 ഐപിഎൽ ഫൈനലിൽ പ്ലയെർ ഓഫ് ദി മാച്ച് അവാർഡും കൃണാൽ നേടിയിരുന്നു. റേസിംഗ് പൂനെ സൂപ്പർ ജയന്റ്സിനെ കീഴടക്കിയാണ് മുംബൈ കിരീടം നേടിയിരുന്നത്. ഫൈനലിൽ 37 പന്തിൽ 47 റൺസ് നേടിയാണ് കൃണാൽ തിളങ്ങിയത്. ഇതോടെ ഐപിഎൽ ഫൈനലിൽ രണ്ട് തവണ പ്ലെയർ ഓഫ് ദി മാച്ച് പുരസ്‌കാരം നേടുന്ന ചരിത്രത്തിലെ ആദ്യ താരമായും കൃണാൽ മാറിയിരുന്നു. 

കഴിഞ്ഞ നാല് വർഷമായി കൃണാൽ ഇന്ത്യക്കായി കളിച്ചിട്ടില്ല. 2021ൽ ശ്രീലങ്കക്കെതിരെയാണ് കൃണാൽ അവസാനമായി ഇന്ത്യക്കായി ടി-20 മത്സരം കളിച്ചത്. ഇന്ത്യക്കായി 19 മത്സരങ്ങളിൽ നിന്നും 124 റൺസും 15 വിക്കറ്റുകളും കൃണാൽ സ്വന്തമാക്കിയിട്ടുണ്ട്. 

അതേസമയം ഏഷ്യ കപ്പിൽ നിലവിലെ ചാമ്പ്യന്മാരായ ഇന്ത്യയടക്കം എട്ട് ടീമുകൾ ഏഷ്യ കപ്പിൽ മാറ്റുരയ്ക്കും. അഫ്ഗാനിസ്ഥാൻ, ബംഗ്ലാദേശ്, പാകിസ്ഥാൻ, ശ്രീലങ്ക, ആതിഥേയരായ യുഎഇ, ഒമാൻ, ഹോങ്കോംഗ് ചൈന എന്നിവയാണ് മത്സരിക്കുന്ന മറ്റ്‌ ടീമുകൾ. രണ്ട് ഗ്രൂപ്പുകളായി തിരിച്ചാണ് ടൂർണമെന്റ് നടക്കുക. 2026ലെ ടി20 ലോകകപ്പിന് മുന്നോടിയായി ടി20 ഫോർമാറ്റിലാണ് മത്സരങ്ങൾ നടക്കുക. 

ഇന്ത്യയും പാകിസ്ഥാനും തമ്മിലുള്ള അതിർത്തി സംഘർഷങ്ങളെ തുടർന്ന്, 2027 വരെ നിഷ്പക്ഷ വേദികളിൽ മാത്രം മത്സരിക്കാൻ ഇരു രാജ്യങ്ങളും തമ്മിൽ ധാരണയായതാണ് യുഎഇയെ വേദിയാക്കാൻ കാരണം. ബിസിസിഐയാണ് ഔദ്യോഗിക ആതിഥേയർ എങ്കിലും, രാഷ്ട്രീയ പിരിമുറുക്കങ്ങൾ മൂലം ടൂർണമെന്റ് യുഎഇയിലേക്ക് മാറ്റുകയായിരുന്നു.

All rounder Krunal Pandya is reportedly set to make a return to the Indian team for the 2025 Asia Cup Krunal Pandya is making a comeback to the Indian team after his impressive performance for Royal Challengers Bangalore in the 2025 IPL