കുവൈത്ത് സിറ്റി: പൊലിസ്, സൈന്യം, നാഷണൽ ഗാർഡ്, ഫയർ ഡിപ്പാർട്ട്മെന്റ് തുടങ്ങിയ സ്ഥാപനങ്ങളുടെ വ്യാജ സൈനിക റാങ്കുകളും ബാഡ്ജുകളും വിറ്റ കേസിൽ സിറിയൻ പൗരനെ കുവൈത്ത് സുരക്ഷാ അധികൃതർ അറസ്റ്റ് ചെയ്തു. ആഭ്യന്തര മന്ത്രാലയത്തിന്റെ ജനറൽ ഡിപ്പാർട്ട്മെന്റ് ഓഫ് ക്രിമിനൽ ഇൻവെസ്റ്റിഗേഷൻ നടത്തിയ അന്വേഷണത്തിനു പിന്നാലെയാണ് ഇയാളെ അറസ്റ്റ് ചെയ്തത്. അറബി ദിനപത്രമായ അൽ ഖബാസാണ് ഇക്കാര്യം റിപ്പോർട്ട് ചെയ്തത്.

ALSO READ: ഗസ്സ പിടിച്ചെടുക്കാനുള്ള സയണിസ്റ്റ് നീക്കത്തെ തള്ളി സംയുക്ത അറബ്, ഇസ്‌ലാമിക മന്ത്രിതല സമിതി

അനധികൃതമായാണ് പ്രതി റാങ്കുകളും ബാഡ്ജുകളും വിൽപ്പനയ്ക്ക് വെച്ചതെന്ന് സുരക്ഷാ ഇന്റലിജൻസ് വ്യക്തമാക്കി. ഇയാളിൽ നിന്ന് ആഭ്യന്തര മന്ത്രാലയത്തിന്റെ 700 റാങ്കുകൾ, നാഷണൽ ഗാർഡിന്റെ 300 റാങ്കുകൾ, പ്രതിരോധ മന്ത്രാലയത്തിന്റെ 270 റാങ്കുകൾ, കസ്റ്റംസ് ഉൾപ്പെടെയുള്ള വിവിധ വകുപ്പുകളുടെ 500 ബാഡ്ജുകൾ പിടിച്ചെടുത്തു.

പ്രതിയെ കസ്റ്റഡിയിലെടുത്ത് വ്യാജ വസ്തുക്കൾ കണ്ടുകെട്ടി. കേസ് ബന്ധപ്പെട്ട അധികാരികൾക്ക് കൈമാറുന്നതിനുള്ള നിയമനടപടികൾ പുരോഗമിക്കുകയാണ്.

ALSO READ: 'ഫ്രീഡം സെയില്‍' പ്രഖ്യാപിച്ച് എയര്‍ ഇന്ത്യ; കിടിലന്‍ നിരക്കില്‍ ടിക്കറ്റ് സ്വന്തമാക്കാം | Air India Freedom Sale 

“സുരക്ഷാ-സൈനിക സ്ഥാപനങ്ങളുടെ അന്തസ്സിനെ കളങ്കപ്പെടുത്തുന്നതോ അവയുടെ ലോഗോകൾ ദുരുപയോഗം ചെയ്യുന്നതോ ആയ പ്രവൃത്തികൾക്കെതിരെ കർശന നടപടി സ്വീകരിക്കും,” ആഭ്യന്തര മന്ത്രാലയം പ്രസ്താവനയിൽ വ്യക്തമാക്കി. ഇത്തരം സംഭവങ്ങൾ പൊതുജനങ്ങൾ ഔദ്യോഗിക മാർഗങ്ങളിലൂടെയോ 112 എന്ന അടിയന്തര നമ്പറിലോ റിപ്പോർട്ട് ചെയ്യണമെന്ന് മന്ത്രാലയം അഭ്യർത്ഥിച്ചു.

Kuwait authorities have arrested a Syrian national for illegally selling counterfeit police and military badges. Investigations are underway to identify potential buyers and networks involved.