പട്‌ന: തെരഞ്ഞെടുപ്പ് ക്രമക്കേട് സംബന്ധിച്ച് ലോക്‌സഭാ പ്രതിപക്ഷ നോതാവ് രാഹുല്‍ ഗാന്ധി പുറത്തുവിട്ട വെളിപ്പെടുത്തലിന് പിന്നാലെ നിയമസഭാ തെരഞ്ഞെടുപ്പ് ആസന്നമായ ബിഹാറിലെ വോട്ടര്‍പട്ടികയെക്കുറിച്ചും വന്‍ ആക്ഷേപം. ജാമുയി ജില്ലയിലെ ഒരുവീട്ടില്‍ 230 വോട്ടര്‍മാര്‍ താമസിക്കുന്നതുള്‍പ്പെടെയുള്ള ആക്ഷേപങ്ങളാണ് ഉയര്‍ന്നത്. ഈ മാസം ഒന്നിനാണ് ബിഹാറില്‍ കരട് വോട്ടര്‍ പട്ടിക പ്രസിദ്ധീകരിച്ചത്. ചൗദിഹ പഞ്ചായത്തിലെ ആമിന്‍ ഗ്രാമത്തിലെ താമസക്കാര്‍ തങ്ങള്‍ വ്യത്യസ്ത വീടുകളിലാണ് താമസിക്കുന്നതെന്ന് പറയുന്നുണ്ടെങ്കിലും പട്ടികയില്‍ അവരെല്ലാം മൂന്നാം വാര്‍ഡിലെ മൂന്നാം നമ്പര്‍ വീട്ടിലുള്ളവരാണ്.

വീടുതോറുമുള്ള സര്‍വേ നടത്താന്‍ ബൂത്തുതല ഓഫിസര്‍മാര്‍ (ബി.എല്‍.ഒ) ശ്രമിച്ചില്ലെന്നാണ് ഇത് കാണിക്കുന്നതെന്ന് വോട്ടര്‍മാരിലൊരാള്‍ പറഞ്ഞു. ബി.എല്‍.ഒമാര്‍ ഒരിക്കലും തന്റെ വീട്ടില്‍ പോയി ഫോമുകള്‍ വിതരണം ചെയ്തിട്ടില്ലെന്നും പകരം വോട്ടര്‍മാരില്‍ നിന്ന് ഒപ്പിടാതെ മറ്റൊരു വീട്ടില്‍ നിന്ന് പൂരിപ്പിച്ചുവെന്നും 230 പേരില്‍പ്പെട്ട 70 കാരി നൂര്‍ ഹസന്‍ ആരോപിച്ചു. രാജീവ് കുമാര്‍, ഗൗതം കുമാര്‍ എന്നിവരായിരുന്നു പ്രദേശത്തെ ബി.എല്‍.ഒമാര്‍. ഇവര്‍ വീടുകള്‍ സന്ദര്‍ശിക്കാതെ ഫോം പൂരിപ്പിച്ചതായി മറ്റൊരു വോട്ടര്‍ മുഹമ്മദ് ഡാനിഷ് ചൂണ്ടിക്കാട്ടി. 

15 വര്‍ഷം മുമ്പ് മരിച്ചവരുടെ പേരുകളും പട്ടികയിലുണ്ട്. കുടുംബം തിരുത്തല്‍ ഫോമുകള്‍ സമര്‍പ്പിച്ചിട്ടും മൂന്ന് വര്‍ഷം മുമ്പ് മരിച്ച കൗശല്‍ ഖാത്തൂണ്‍ പോലുള്ളവരുടെ പേരുകള്‍ പട്ടികയില്‍ ഉണ്ടെന്ന് മുഹമ്മദ് ഷാനവാസ് എന്നയാള്‍ പറഞ്ഞു. പട്‌നയിലെ ഗര്‍ദാനിബാഗില്‍ മരിച്ച 27 പേരുകള്‍ പട്ടികയിലുണ്ട്. ഇവരെയെല്ലാം നീക്കാന്‍ ആവശ്യപ്പെട്ട് അപേക്ഷ നല്‍കിയെങ്കിലും കരടില്‍ സ്ഥാനം പിടിച്ചു. ദിഗ മണ്ഡലത്തിലെ 479ാം നമ്പര്‍ ബൂത്തില്‍ 2010,2020,2021 വര്‍ഷങ്ങളില്‍ മരിച്ച ശങ്കര്‍ പ്രസാദ്, മകന്‍ നവീന്‍, നവീന്റെ ഭാര്യ സീത ദേവി എന്നിവര്‍ ഇപ്പോഴും വോട്ടര്‍മാരായി രജിസ്റ്റര്‍ ചെയ്തിട്ടുണ്ട്. മരുമകളുടെ ഭര്‍ത്താവിന്റെ പേരിനുപകരം തന്റെ പേര് രേഖപ്പെടുത്തുന്നത് പോലെയുള്ള പിശകുകള്‍ ഉണ്ടെന്ന് ശങ്കറിന്റെ സഹോദരന്‍ സുരേന്ദ്ര പ്രസാദ് പറഞ്ഞു. 2023 ല്‍ മരിച്ച തന്റെ ഭാര്യ തന്റെ ഫോം പൂരിപ്പിച്ചിട്ടില്ലെങ്കിലും പട്ടികയിലുണ്ടെന്ന് സരിസ്റ്റാബാദിലെ രാം സുന്ദര്‍ റായ് പറഞ്ഞു.

സംസ്ഥാനത്ത് 2,92,048 വോട്ടര്‍മാരുടെ വീട് നമ്പറുകള്‍ 0, 00, 000 എന്നിങ്ങനെയാണ്. എന്നാല്‍ ആളുകള്‍ക്ക് വീട്ടുനമ്പര്‍ ഓര്‍മയില്ലാത്തത് കൊണ്ടാണ് ഇങ്ങനെയെന്നാണ് ചീഫ് ഇലക്ടറല്‍ ഓഫിസിലെ ഉദ്യോഗസ്ഥന്‍ വിശദീകരിച്ചത്. വോട്ടര്‍ പട്ടിക ശുദ്ധീകരിക്കാനാണ് 2003 വരെയുള്ളവരെ ഉള്‍പ്പെടുത്തി ദശലക്ഷക്കണക്കിനാളുകളെ പുറത്താക്കി പുതിയ വോട്ടര്‍ പട്ടിക തയാറാക്കുന്നതെന്നാണ് തെരഞ്ഞെടുപ്പ് കമ്മിഷന്‍ അവകാശപ്പെടുന്നത്. എന്നാല്‍ കമ്മിഷന്റെ ഈ അവകാശവാദത്തില്‍ സംശയം ഉണ്ടാക്കുന്നതാണ് പുതിയ പട്ടികയിലും വ്യാപകക്രമക്കേടുകള്‍ ഉണ്ടെന്ന റിപ്പോര്‍ട്ടുകള്‍.

ALSO READ: മാധ്യമപ്രവര്‍ത്തകനടക്കം 5 അല്‍ജസീറ ജീവനക്കാരെ ഇസ്‌റാഈല്‍ കൊലപ്പെടുത്തി; ഗസ്സയുടെ മുഖമായ അനസും കൊല്ലപ്പെട്ടു, ഗസ്സയില്‍ ഇതുവരെ കൊല്ലപ്പെട്ടത് 186 മാധ്യമപ്രവര്‍ത്തകര്‍

Altogether 230 people reside in a single house in Bihar’s Jamui district, as recorded by a booth-level officer (BLO) of Chaudiha panchayat during the recently concluded special intensive revision (SIR) of electoral rolls.