ബാസിത് ഹസൻ 

തൊടുപുഴ: വന്യജീവി സംരക്ഷണത്തിനുള്ള കേന്ദ്ര പദ്ധതികളായ ഐ.ഡി.ഡബ്ലിയു.എച്ച്, പ്രൊജക്ട് എലിഫന്റ് ആൻഡ് ടൈഗർ പദ്ധതികൾ പ്രകാരം അഞ്ചു വർഷത്തിനിടെ കേരളത്തിന് അനുവദിച്ചത് 221.38 കോടി രൂപ. എന്നാൽ ഇക്കാലയളവിൽ സംസ്ഥാനം ചെലവഴിച്ചതാകട്ടെ 73.55 കോടി മാത്രം, ലാപ്‌സായത് 147.83 കോടി. ഐ.ഡി.ഡബ്ലിയു.എച്ച് പ്രകാരം കേരളത്തിന് അനുവദിച്ച 104.57 കോടി രൂപയിൽ 30.82 കോടിയും പ്രൊജക്ട് എലിഫന്റ് ആൻഡ് ടൈഗർ പദ്ധതിയിൽ 116.81 കോടി രൂപ അനുവദിച്ചതിൽ 42.73 കോടിയും മാത്രമാണ് ചെലവഴിച്ചത്. കേന്ദ്ര പരിസ്ഥിതി വനം കാലാവസ്ഥാ വ്യതിയാന മന്ത്രി ഭുപേന്ദർ യാദവ് ഇന്നലെ പാർലമെന്റിൽ നൽകിയ മറുപടിയിലാണ് ഇക്കാര്യം വെളിപ്പെടുത്തിയത്. വന്യജീവി സംരക്ഷണവും വന്യജീവി ആവാസവ്യവസ്ഥയുടെ സമഗ്രവികസനവും മെച്ചപ്പെടുത്തുന്നതിനായി കേന്ദ്ര സർക്കാർ ആവിഷ്‌കരിച്ച പദ്ധതിയാണ് ഐ.ഡി.ഡബ്ലിയു.എച്ച്. ആവാസ വ്യവസ്ഥകളുടെ സംരക്ഷണത്തിലൂടെയും വീണ്ടെടുക്കൽ പരിപാടികളിലൂടെയുമാണ് ഈ പദ്ധതി പ്രധാനമായും ലക്ഷ്യമിടുന്നത്. 

ആവാസവ്യവസ്ഥയുടെ പുനഃസ്ഥാപനം, സമൂഹത്തിന്റെ പങ്കാളിത്തം, മനുഷ്യനും വന്യജീവികളും തമ്മിലുള്ള സംഘർഷം ലഘൂകരിക്കൽ എന്നിവയുൾപ്പെടെ വിവിധ പ്രവർത്തനങ്ങൾക്കായി സംസ്ഥാന സർക്കാരുകൾക്ക് സാമ്പത്തികവും സാങ്കേതികവുമായ സഹായം ഈ പദ്ധതിയിലൂടെ ലഭിക്കുന്നു. പരിസ്ഥിതി സൗഹൃദ ടൂറിസം പ്രോത്സാഹിപ്പിക്കുന്നതിനും സംരക്ഷിത പ്രദേശങ്ങൾക്കകത്തും പുറത്തും വംശനാശഭീഷണി നേരിടുന്ന ജീവികളെ സംരക്ഷിക്കുന്നതിനും പദ്ധതി ഊന്നൽ നൽകുന്നു. സംസ്ഥാനത്ത് മനുഷ്യവന്യജീവി സംഘർഷം രൂക്ഷമായ വേളയിലാണ് സംസ്ഥാനം ഇത്രയും തുക ലാഘവത്തോടെ നഷ്ടപ്പെടുത്തിയത്. 

ALSO READ: 'ഇതാണ് എന്റെ വസിയ്യത്ത്, എന്റെ കുടുംബത്തെയും ഗസ്സയെയും നിങ്ങളെ ഏല്‍പ്പിക്കുന്നു, അല്ലാഹുവേ എന്റെ രക്തസാക്ഷിത്വം സ്വീകരിക്കേണമേ...'; നോവായി അനസിന്റെ അവസാന സന്ദേശം 

കടുവകളെ സ്വാഭാവിക ആവാസവ്യവസ്ഥയിൽ സംരക്ഷിക്കുന്നതിനായി 1973ൽ ആരംഭിച്ച പദ്ധതിയാണ് പ്രോജക്ട് ടൈഗർ. ആവാസവ്യവസ്ഥയുടെ നഷ്ടവും വേട്ടയാടലും കാരണം കുറഞ്ഞുവരുന്ന ആനകളുടെ എണ്ണത്തെ സംരക്ഷിക്കാൻ 1992ൽ ആരംഭിച്ച പദ്ധതിയാണ് പ്രോജക്ട് എലിഫന്റ്. വന്യജീവി സംരക്ഷണത്തെയും ജൈവവൈവിധ്യത്തെയും പിന്തുണയ്ക്കുന്നതിനായി ആവാസവ്യവസ്ഥ സൃഷ്ടിക്കുന്നതിനും മെച്ചപ്പെടുത്തുന്നതിനും ഈ പദ്ധതികൾ ഊന്നൽ നൽകുന്നു. 

പ്രോജക്ട് ഡോൾഫിൻ, പ്രോജക്ട് ലയൺ തുടങ്ങിയ ജീവിവർഗങ്ങളുടെ സംരക്ഷണത്തിനായി നൂതന ഉപകരണങ്ങളും സാങ്കേതികവിദ്യകളും ഉപയോഗിക്കുന്ന പദ്ധതികളും കേന്ദ്രം ആവിഷ്‌കരിച്ചിട്ടുണ്ട്. ആവാസവ്യവസ്ഥാ സംരക്ഷണം, ജീവിവർഗങ്ങളുടെ വീണ്ടെടുക്കൽ, സമൂഹത്തിന്റെ പങ്കാളിത്തം, സുസ്ഥിര വികസനം എന്നിവ ഉൾക്കൊള്ളുന്ന വന്യജീവി സംരക്ഷണത്തിനുള്ള സമഗ്രമായ സമീപനമാണ് വന്യജീവി ആവാസ വ്യവസ്ഥയുടെ സമഗ്രവികസനം.