കണ്ണൂര്‍: മീന്‍ വില താഴോട്ട്. ട്രോളിങ് നിരോധനത്തെ തുടര്‍ന്ന് കുത്തനെ ഉയര്‍ന്ന മീന്‍വിലയാണ് ഇപ്പോള്‍ കുറയുന്നത്. ഒരു കിലോയ്ക്ക് 1300 രൂപ വരെയുണ്ടായിരുന്ന അയക്കൂറയ്ക്ക് ചൊവ്വാഴ്ച തലശേരി മാര്‍ക്കറ്റിലെ വില 500, 600 രൂപയാണ്. തദ്ദേശീയമായി മീന്‍ ലഭ്യത കൂടിയതാണ് വില കുറയാനുള്ള കാരണം. മറ്റു മീനുകള്‍ക്കും വില കുറഞ്ഞിട്ടുണ്ട്. അയലയ്ക്കും മത്തിക്കും 100 നും 120നും ഇടയിലാണ് വില.

ആവോലിയാണെങ്കില്‍ ഇപ്പോള്‍ ചെറുതാണ് വിപണിയിലുള്ളത്. അതിനും കിലോയ്ക്ക് 200 മുതല്‍ 240 വരെയുണ്ട്. ചെമ്മീനും വലുപ്പത്തിനനുസരിച്ച് 200 ഉം 500 ഉം ഒക്കെയാണ് വില. ജില്ലയില്‍ മീന്‍ വിലയ്ക്ക് പ്രാദേശികമായ ചില ഏറ്റക്കുറച്ചിലുണ്ടായിട്ടുണ്ട്. ജൂണ്‍ 10 മുതല്‍ ജൂലൈ 31 വരെയാണ് ട്രോളിങ് നിരോധനം. ഇക്കാലത്ത് മീനിനും ഉണക്കമീനിനും വലിയ വിലയായിരുന്നു. നിരോധനം പിന്‍വലിച്ചതോടെ മീനിന് വില കുഞ്ഞെങ്കിലും ഓണം വരുന്നതോടെ വീണ്ടും കൂടാനും സാധ്യതയുണ്ട്. 

Fish prices in Kannur have dropped sharply following the lifting of the trawling ban that was in effect from June 10 to July 31.