ജിദ്ദ: ട്രെയിലര്‍ ഓടിക്കുന്നതിനിടെ മസ്തിഷ്‌കാഘാതംമൂലമുണ്ടായ അപകടത്തില്‍ പ്രവാസി മലയാളി സഊദി അറേബ്യയില്‍ മരിച്ചു. പെരുമ്പാവൂര്‍ വെങ്ങോല അലഞ്ഞിക്കാട്ടില്‍ ഷെമീര്‍ അബൂബക്കര്‍ (43) ആണ് മരിച്ചത്. അപകടത്തില്‍പ്പെട്ട് ഗുരുതര പരുക്കേറ്റ് അബോധാവസ്ഥയില്‍ ചികിത്സയിലിരിക്കെയാണ് മരണം.

ജൂലൈ 17 നായിരുന്നു റിയാദ് ഹൈവേയിലുള്ള ദമ്മാം ചെക്‌പോയിന്റിനു സമീപം അപകടം നടന്നത്. ട്രെയിലര്‍ ഓടിക്കുന്നതിനിടെ വണ്ടിക്കുള്ളില്‍ വച്ച് മസ്തിഷ്ഘാതം ഉണ്ടായതിനെ തുടര്‍ന്ന് നിയന്ത്രണം നഷ്ടമായി വാഹനം അപകടത്തില്‍പ്പെടുകയായിരുന്നു. വിവരമറിഞ്ഞെത്തിയ രക്ഷാപ്രവര്‍ത്തകര്‍ അപകടസ്ഥലത്തിനടുത്തുള്ള സഊദി ജര്‍മന്‍ ആശുപത്രിയിലെ അത്യാഹിതവിഭാഗത്തില്‍ പ്രവേശിപ്പിച്ചു. മൂന്ന് ശസ്ത്രക്രിയ നടത്തിയെങ്കിലും കഴിഞ്ഞ 26 ദിവസമായി അബോധാവസ്ഥയില്‍ വെന്റിലേറ്ററിന്റെ സഹായത്തില്‍ ജീവന്‍ നിലനിര്‍ത്തി വരുന്നതിനിടെയാണ് മരണം സംഭവിച്ചത്.
അപകട വിവരമറിഞ്ഞ് കഴിഞ്ഞ വെള്ളിയാഴ്ച ഭാര്യ ഷഹാന, സഹോദരന്‍ എന്നിവര്‍ നാട്ടില്‍ നിന്നും എത്തിയിരുന്നു. മക്കള്‍: ഷിഫാന, ഷിഫാസ് (സ്‌കൂള്‍ വിദ്യാര്‍ഥികള്‍). മയ്യിത്ത് നാട്ടിലെത്തിച്ച് മറവുചെയ്യും. ഇതിനുള്ള നിയമനടപടികള്‍ക്ക് ലോക കേരളാസഭാംഗവും ജീവകാരുണ്യപ്രവര്‍ത്തകനുമായ നാസ് വക്കം നേതൃത്വം നല്‍കുന്നു. 

Expatriate Malayali dies in Saudi Arabia after suffering brain injury while driving in trailer accident