അശ്‌റഫ് കൊണ്ടോട്ടി

മലപ്പുറം: 2026ലെ  തീർഥാടനത്തിന് രാജ്യത്തെ ഹജ്ജ് നറുക്കെടുപ്പ് നടത്തിയത് സഊദി  അറേബ്യ ഇന്ത്യക്കുള്ള ഇത്തവണത്തെ  ക്വാട്ട പ്രഖ്യാപിക്കുന്നതിന് മുമ്പ്. മുൻ വർഷങ്ങളിലെല്ലാം സഊദി  അറേബ്യ ഹജ്ജ് ക്വാട്ട നൽകിയതിന് ശേഷമാണ്  നറുക്കെടുപ്പ് നടത്താറുള്ളത്. ഇത്തവണ ഹജ്ജ് അപേക്ഷ സ്വീകരണം കഴിഞ്ഞ ഏഴിന് പൂർത്തിയാക്കി നറുക്കെടുപ്പ് ഇന്നലെ നടത്തുകയായിരുന്നു. എന്നാൽ ഇതിനകം ഹജ്ജ് ക്വാട്ട ലഭ്യമായില്ല. തുടർന്ന് ഒരു ലക്ഷം ഹജ്ജ് ക്വാട്ട കണക്കാക്കിയാണ് സംസ്ഥാനങ്ങൾക്കും വിവിധ കേന്ദ്രഭരണ പ്രദേശങ്ങൾക്കും ഇന്നലെ നറുക്കെടുപ്പ് നടത്താനായി സീറ്റുകൾ നൽകിയത്. മുഴുവൻ സംസ്ഥാനങ്ങളെയും കേന്ദ്രഭരണ പ്രദേശങ്ങളെയും ഉൾപ്പെടുത്തി മുംബൈയിലായിരുന്നു നറുക്കെടുപ്പ്. 

 വിവിധ സംസ്ഥാനങ്ങളിലും കേന്ദ്രഭരണ പ്രദേശങ്ങളിലും നിന്നുമായി 1,94,616 അപേക്ഷകളാണ് രാജ്യത്ത് ഈ വർഷം ലഭിച്ചത്. ഇവരിൽ 18,659 പേർ കുറഞ്ഞ ദിവസത്തെ പാക്കേജിന് അപേക്ഷ നൽകിയവരാണ്. മുസ്‌ലിം ജനസംഖ്യാനുപാതത്തിലാണ് സംസ്ഥാനങ്ങൾക്ക് സീറ്റുകൾ വിതരണം ചെയ്തത്.

ALSO READ: കുവൈത്തിലെ വിഷമദ്യ ദുരന്തം: മരണം 13 ആയി, അഞ്ചുപേര്‍ മലയാളികളെന്ന് സൂചന; 21 പേര്‍ക്ക് കാഴ്ച നഷ്ടമായി; എംബസി ഹെല്‍പ് ലൈന്‍ തുടങ്ങി 

   ഹജ്ജ് അപേക്ഷകൾ കൂടുതൽ ലഭിച്ചത് ഗുജറാത്ത്, മഹാരാഷ്ട്ര, കേരളം എന്നിവിടങ്ങളിലാണ്.  എന്നാൽ  കൂടുതൽ ഹജ്ജ് ക്വാട്ട കിട്ടിയത് ഉത്തർപ്രദേശ്, മഹാരാഷ്ട്ര, കേരളം എന്നീ സംസ്ഥാനങ്ങൾക്കാണ്. ഉത്തർപ്രദേശിൽ അപേക്ഷിച്ച 18,760 പേർക്കും അവസരം ലഭിച്ചു. മഹാരാഷ്ട്രയിൽ 12,443 പേർക്ക് സീറ്റുകൾ ലഭിച്ചു. വെയിറ്റിങ് ലിസ്റ്റിൽ 17,443 പേരുണ്ട്. കൂടുതൽ ക്വാട്ട ലഭിച്ച സംസ്ഥാനങ്ങളിൽ കേരളം മൂന്നാം സ്ഥാനത്താണ്.  അപേക്ഷകൾ കൂടുതൽ ലഭിച്ച ഗുജറാത്തിൽ 5717 പേർക്ക് മാത്രമാണ് ആദ്യഘട്ടത്തിൽ അവസരം ലഭിച്ചത്. ഇവിടെ 26,071 പേരും വെയിറ്റിങ് ലിസ്റ്റിലാണ്.

   സംസ്ഥാനങ്ങളും കേന്ദ്രഭരണ പ്രദേശങ്ങളുമായി 31 ഇടങ്ങളിലേക്കാണ് നറുക്കെടുപ്പ് നടന്നത്. ഇതിൽ കേരളം, ഛത്തീസ്ഖഢ്, ഹരിയാന, മധ്യപ്രദേശ്, തെലങ്കാന, ഉത്തരാഖണ്ഡ്, മഹാരാഷ്ട്ര, കർണാടക, ഡൽഹി, തമിഴ്‌നാട്, ഗുജറാത്ത് എന്നീ 11 സംസ്ഥാനങ്ങളിലാണ് വെയിറ്റിങ് ലിസ്റ്റുള്ളത്. മറ്റു സംസ്ഥാനങ്ങൾക്ക്  ലഭിച്ച ക്വാട്ട ഇങ്ങനെ: കർണാടക (7595), പശ്ചിമ ബംഗാൾ (5189), ജമ്മുകശ്മിർ (5166), രാജസ്ഥാൻ (4772), മധ്യപ്രദേശ് (4567), തെലങ്കാന (4288), തമിഴ്‌നാട് (4033), ബിഹാർ (2753), അസം (2566).