തിരുവനന്തപുരം: ജീവിതശൈലീരോഗങ്ങളിലുണ്ടായ വർധന ആളോഹരി ചികിത്സാച്ചെലവിൽ വൻ വർധനയ്ക്ക് ഇടയാക്കുന്നു. പകർച്ചവ്യാധികളുടെ തോത് കുറഞ്ഞതോടെ രോഗാതുരതാനിരക്ക് കുറഞ്ഞ് ആയുർദൈർഘ്യം വർധിച്ചു. എന്നാൽ മരണനിരക്കും കുട്ടികളുടെ പോഷകാഹാരക്കുറവും കുറഞ്ഞത് ആരോഗ്യരംഗത്തെ നേട്ടങ്ങളാണെന്നാണ് ശാസ്ത്രസാഹിത്യപരിഷത്തിന്റെ രണ്ടാം കേരള പഠനം പറയുന്നത്.
അതേസമയം പൊതുജീവിതനിലവാരം ഉയർന്നതും ആയുർദൈർഘ്യം വർധിച്ചതും രണ്ടാം തലമുറ പ്രശ്‌നങ്ങൾക്ക് ഇടയാക്കുന്നത് പ്രധാന വെല്ലുവിളിയാണെന്നും റിപ്പോർട്ട് സൂചിപ്പിക്കുന്നു. 2004 നും 2019നുമിടയിലുള്ള ഒന്നര ദശാബ്ദത്തിൽ ജനജീവിതത്തിലുണ്ടായ മാറ്റങ്ങളാണ് പഠനത്തിലുള്ളത്. 1987ലെ വിലനിലവാരത്തിൽ നോക്കിയാൽ ഒരു തവണത്തെ ചികിത്സയ്ക്കുള്ള ചെലവ് 17 രൂപയിൽനിന്ന് 2019ൽ 234 രൂപയായി ഉയർന്നു. ആളോഹരി വാർഷിക ചികിത്സാച്ചെലവ് 89 രൂപയിൽനിന്ന് 678 രൂപയായി കൂടി. പൊതു ആരോഗ്യസുരക്ഷാ സംവിധാനം മെച്ചപ്പെട്ടതിനെ തുടർന്നു ഒറ്റത്തവണ ചികിത്സാചെലവ് 2004നും 2019നുമിടയിൽ കാര്യമായ മാറ്റമില്ലാതെ നിൽക്കുന്നുണ്ട്. 

ഉയർന്ന, ഇടത്തരം വിഭാഗക്കാർ ഇൻഷൂറൻസ് പരിരക്ഷ കൂടുതൽ ഉപയോഗിക്കുന്നുണ്ട്. എന്നാൽ, ജീവിതശൈലീരോഗങ്ങളിലെ വർധനവിനെ തുടർന്ന് ആളോഹരി വാർഷിക ചികിത്സാചെലവ് കൂടിയെന്ന് പഠനത്തിൽ ചൂണ്ടിക്കാട്ടുന്നു. 15 വർഷത്തിനിടയിൽ കുടുംബവരുമാനത്തിലും കുടുംബചെലവിലും കാര്യമായ വർധനവുണ്ടായിട്ടും കുടുംബചെലവിൽ ചികിത്സാച്ചെലവിന്റെ അനുപാതം 2004ൽ 13.9 ശതമാനമായിരുന്നത് 2019ൽ 16.3 ശതമാനമായി വർധിച്ചു.

ALSO READ: വോട്ട് മോഷണം: രാഹുല്‍ ഗാന്ധി വെളിപ്പെടുത്തിയിട്ട് ഒരാഴ്ച, മൗനം തുടര്‍ന്ന് മോദി; പ്രചാരണം കടുപ്പിച്ച് കോണ്‍ഗ്രസ്

ഇന്ത്യൻ ശരാശരിയേക്കാൾ കൂടുതൽ ജി.ഡി.പിയുടെ അനുപാതമായി കേരളം ആരോഗ്യത്തിന് ചെലവാക്കുന്നുണ്ട്. യഥാക്രമം 4.5 ശതമാനം, 3.3 ശതമാനം. ആളോഹരി വാർഷിക ആരോഗ്യച്ചെലവ് കേരളത്തിൽ ഇന്ത്യൻ ശരാശരിയുടെ ഇരട്ടിയിലധികമാണ്. ആളോഹരി കണക്കിൽ ആരോഗ്യത്തിനായി സർക്കാർ ചെലവാക്കുന്നതും ഇന്ത്യൻ ശരാശരിയേക്കാൾ കൂടുതലാണ്. ആകെ ചെലവിന്റെ 67.9 ശതമാനമാണ് കേരളത്തിൽ വ്യക്തിഗത ആരോഗ്യചെലവ് എങ്കിൽ ഇന്ത്യൻ ശരാശരി 47.1 ശതമാനം മാത്രമാണ്. വാർഷിക ചികിത്സാചെലവിൽ മരുന്നുവിലയാണ് പ്രധാനം. പല രോഗങ്ങൾക്കും പുതിയ മരുന്നുകൾ നിലവിൽ വന്നതിനാലും വില താരതമ്യേന കൂടുതലായതുകൊണ്ടും മൊത്തം ചികിത്സാചെലവ് കൂടിയിട്ടുണ്ട്. എന്നാൽ, മരുന്നുവില പിടിച്ചുനിർത്താനുള്ള കേന്ദ്രസർക്കാർ ശ്രമം ഫലം കണ്ടിട്ടില്ലെന്നും റിപ്പോർട്ട് പറയുന്നു.

 കേരളത്തിൽ ജീവിതിനിലവാരം മെച്ചപ്പെട്ടതിന് അനുസരിച്ച് ആരോഗ്യ ആവശ്യങ്ങൾ വർധിച്ചുവരുന്നുണ്ട്. മറ്റു സംസ്ഥാനങ്ങളെ അപേക്ഷിച്ച് കൂടുതൽ പണം ചെലവാക്കിയിട്ടും സർക്കാറിന് ഇക്കാര്യം മുഴുവനായി നിർവഹിക്കാനാകുന്നില്ല. ബാക്കി വരുന്നതുമുഴുവൻ വർധിച്ച വ്യക്തിഗത ചെലവായി പ്രതിഫലിക്കുന്നുണ്ട്. സ്വകാര്യ സംവിധാനങ്ങളെ ആശ്രയിക്കുന്നതിനാൽ സ്വാഭാവികമായി ഉയർന്ന സാമ്പത്തിക ഗ്രൂപ്പുകളിലാണ് കൂടുതൽ ചെലവ്.