ന്യൂഡല്‍ഹി: മഹാരാഷ്ട്ര ഗവര്‍ണര്‍ സിപി രാധാകൃഷ്ണനെ എന്‍ഡിഎ ഉപരാഷ്ട്രപതി സ്ഥാനാര്‍ഥിയായി നിശ്ചയിച്ചു. തമിഴ്‌നാട് ബിജെപി മുന്‍ അധ്യക്ഷനായിരുന്ന ഇദ്ദേഹം ആര്‍എസ്എസിലൂടെയാണ് സംഘടനാ പ്രവര്‍ത്തനം ആരംഭിച്ചത്. ബിജെപി നേതൃയോഗത്തിലാണ് സ്ഥാനാര്‍ഥിയെ കുറിച്ച് അന്തിമ തീരുമാനമായത്. 

ജനസംഘത്തിന്റെ നേതാവായിരുന്നു ഇദ്ദേഹം. കോയമ്പത്തൂരില്‍ നിന്ന് ലോക്‌സഭയിലേക്ക് തിരഞ്ഞെടുക്കപ്പെട്ടു. മുന്‍പ് ജാര്‍ഖണ്ഡിന്റെ ഗവര്‍ണറായും സേവനമനുഷ്ഠിച്ചിട്ടുണ്ട്.

ALSO READ: തിരഞ്ഞെടുപ്പ് കമ്മിഷനും ബിജെപിയും തട്ടിപ്പ് നടത്തി, പൗരന്മാരുടെ ഭരണഘടനാ അവകാശങ്ങൾ കവർന്നെടുക്കുന്നു; വോട്ട് അധികാര്‍ യാത്രക്കിടെ ആരോപണവുമായി രാഹുൽ ഗാന്ധി 

മുൻ ഉപരാഷ്ട്രപതി ആയിരുന്ന ജഗ്ദീപ് ധൻകറിന്റെ അപ്രതീക്ഷിത രാജിക്ക് പിന്നാലെയാണ് പുതിയ തെരഞ്ഞെടുപ്പിന് കളമൊരുങ്ങുന്നത്. സെപ്റ്റംബർ 9ന് വോട്ടെടുപ്പ് നടത്തുമെന്നാണ് ഇലക്ഷൻ കമ്മീഷൻ അറിയിച്ചിട്ടുള്ളത്. അന്ന് തന്നെ ഫലം പ്രഖ്യാപിക്കും. നാമനിർദേശ പത്രിക സമർപ്പിക്കാൻ ഈ മാസം 21 വരെ സമയം അനുവദിച്ചു. 

സെപ്റ്റംബർ 9ന് രാവിലെ പത്ത് മണി മുതൽ വൈകീട്ട് 5 വരെയാണ് തെരഞ്ഞെടുപ്പ് നടക്കുക. നാമനിർദേശ പത്രിക പിൻവലിക്കാനുള്ള അവസാന തീയതി ആഗസ്റ്റ് 25.

കഴിഞ്ഞ ജൂലൈ 21നാണ് ആരോഗ്യ പ്രശ്‌നങ്ങൾ ചൂണ്ടിക്കാട്ടി ഉപരാഷ്ട്രപതി ആയിരുന്ന ജഗ്ദീപ് ധൻകർ സ്ഥാനം ഒഴിഞ്ഞത്. പെട്ടെന്നുണ്ടായ രാജി വലിയ വിവാദങ്ങൾക്ക് വഴി വെക്കുകയും, എൻഡിഎ സർക്കാരിനെ പ്രതിസന്ധിയിലാക്കുകയും ചെയ്തിരുന്നു. ആരോഗ്യ സംക്ഷണത്തിന് മുൻഗണന നൽകാൻ വേണ്ടിയാണ് രാജിയെന്നും, തനിക്ക് ലഭിച്ച പിന്തുണയ്ക്ക് നന്ദിയുണ്ടെന്നും രാഷ്ട്രപതിക്ക് അയച്ച കത്തിൽ ധൻകർ പറഞ്ഞിരുന്നു.

എന്നാൽ രാജിക്ക് പിന്നിൽ രാഷ്ട്രീയ കാര്യങ്ങളാണെന്നും, ബിജെപി മറുപടി പറയണമെന്നും ആവശ്യപ്പെട്ട് കോൺഗ്രസ് അടക്കമുള്ള പ്രതിപക്ഷ കക്ഷികൾ രംഗത്തെത്തി. ജസ്റ്റിസ് യശ്വന്ത് ശർമയെ പദവിയിൽ നിന്ന് നീക്കാനുള്ള രാജ്യസഭാ നോട്ടീസ് സ്വീകരിച്ചതിന് പിന്നാലെയാണ് ധൻകർ രാജിവെച്ചത്. 

Maharashtra Governor C.P. Radhakrishnan has been chosen as the NDA’s Vice Presidential candidate