ഇംഗ്ലണ്ടിനെതിരായ അഞ്ചു ടെസ്റ്റ് മത്സരങ്ങളുടെ പരമ്പര അവസാനിച്ചിരിക്കുകയാണ്. ഇനി ഏഷ്യാ കപ്പാണ് ഇന്ത്യയുടെ മുന്നിലുള്ളത്. സെപ്റ്റംബർ 9 മുതൽ 28 വരെയാണ് ഏഷ്യ കപ്പ് നടക്കുന്നത്. ടൂർണമെന്റിന് യുഎഇയാണ് ആതിഥേയത്വം വഹിക്കുന്നത്. നിലവിലെ ചാമ്പ്യന്മാരായ ഇന്ത്യയടക്കം എട്ട് ടീമുകൾ ഈ ടൂർണമെന്റിൽ മാറ്റുരയ്ക്കും. അഫ്ഗാനിസ്ഥാൻ, ബംഗ്ലാദേശ്, പാകിസ്ഥാൻ, ശ്രീലങ്ക, ആതിഥേയരായ യുഎഇ, ഒമാൻ, ഹോങ്കോംഗ് ചൈന എന്നിവയാണ് മത്സരിക്കുന്ന മറ്റ്‌ ടീമുകൾ. രണ്ട് ഗ്രൂപ്പുകളായി തിരിച്ചാണ് ടൂർണമെന്റ് നടക്കുക. 2026-ലെ ടി20 ലോകകപ്പിന് മുന്നോടിയായി ടി20 ഫോർമാറ്റിലാണ് മത്സരങ്ങൾ.

ഏഷ്യ കപ്പിനുള്ള ടീമിൽ ഏതെല്ലാം താരങ്ങൾ ഇടം നേടുമെന്നാണ് ആരാധകർ ഉറ്റുനോക്കുന്നത്. ഏഷ്യ കപ്പിൽ ഇന്ത്യൻ ടെസ്റ്റ് നായകൻ ശുഭ്മൻ ഗിൽ, ഓപ്പണർ യശ്വസി ജെയ്‌സ്വാൾ എന്നിവർ ഇടം നേടില്ലെന്നുള്ള റിപ്പോർട്ടാണ് ഇപ്പോൾ പുറത്തുവന്നിരിക്കുന്നത്. സ്പോർട്സ് സ്റ്റാറാണ് ഇക്കാര്യം റിപ്പോർട്ട് ചെയ്യുന്നത്. ഏഷ്യ കപ്പിനുള്ള ഇന്ത്യൻ സ്‌ക്വാഡിൽ ഗില്ലും ജെയ്‌സ്വാളും ഇടം നേടുമെന്ന് പിടിഐ നേരത്തെ റിപ്പോർട്ട് ചെയ്തിരുന്നു.  

അതേസമയം ഏഷ്യ കപ്പിൽ ഇന്ത്യയെ നയിക്കാൻ സൂര്യകുമാർ യാദവ് തിരിച്ചെത്തുമെന്നാണ് പ്രതീക്ഷിക്കുന്നത്. നിലവിൽ സൂര്യകുമാർ യാദവ് വീണ്ടും പരിശീലനം പുനരാരംഭിച്ചിരിക്കുകയാണ്. ബംഗളൂരുവിലെ എന്റർ ഓഫ് എക്സലൻസിൽ ബിസിസിഐയുടെ മെഡിക്കൽ ടീമിന്റെ മേൽനോട്ടത്തിലാണ് സൂര്യകുമാർ പരിശീലനം നടത്തിയത്.

കഴിഞ്ഞ മാസം ജർമ്മനിയിൽ വെച്ച് ഹെർണിയ ശാസ്ത്രക്രിയയ്ക്ക് വിധേയനായതിന് ശേഷം ആദ്യമായാണ് സൂര്യകുമാർ പരിശീലനം നടത്തുന്നത്. ജൂണിൽ നടന്ന മുംബൈ ടി-20 ലീഗിലാണ് സൂര്യകുമാർ യാദവ് അവസാനമായി കളിച്ചത്. ദുലീപ് ട്രോഫിക്കുള്ള വെസ്റ്റ് സോൺ ടീമിൽ താരം ഇടം നേടുമെന്ന് ഏവരും പ്രതീക്ഷിച്ചിരുന്നെങ്കിലും ഫിറ്റ്നസ് വീണ്ടെടുക്കാൻ സ്കൈക്ക് സാധിക്കാതെ പോവുകയായിരുന്നു. 

Reports have now emerged that Indian Test captain Shubman Gill and opener Yashwazi Jaiswal will not be included in the Asia Cup