തൃശൂര്‍: സര്‍ക്കാര്‍ പറയുന്നതിന് അനുസരിച്ചാണ് തിരഞ്ഞെടുപ്പ് കമ്മീഷന്‍ പ്രവര്‍ത്തിക്കുന്നതെന്ന് സിപിഐ നേതാവ് വിഎസ് സുനില്‍ കുമാര്‍. തെരഞ്ഞെടുപ്പ് കമ്മീഷന്‍ മറുപടി നല്‍കുമെന്ന് സുരേഷ് ഗോപി പറയുന്നു, പിന്നാലെ കമ്മീഷന്‍ മറുപടി നല്‍കുന്നു. തെരഞ്ഞെടുപ്പ് കമ്മീഷന്‍ എന്താണ് പറയാന്‍ പോകുന്നതെന്ന് മുന്‍കൂട്ടി അറിഞ്ഞതിന്റെ ആത്മവിശ്വാസമാണ് രാവിലെ സുരേഷ് ഗോപി പ്രകടിപ്പിച്ചതെന്നും സുനില്‍ കുമാര്‍ പറഞ്ഞു. 

' പത്രസമ്മേളനത്തില്‍ തെരഞ്ഞെടുപ്പ് കമ്മീഷന്‍ നടത്തിയത് രാഷ്ട്രീയ പ്രസ്താവന മാത്രമാണ്. ഒരു ഭരണഘടന സ്ഥാപനത്തിന്റെ ഭാഗത്ത് നിന്ന് വരേണ്ട മറുപടിയല്ല ഉണ്ടായത്. രാഹുല്‍ ഗാന്ധി ഉയര്‍ത്തിയ വിഷയങ്ങളിലെ മെറിറ്റിലേക്ക് തിരഞ്ഞെടുപ്പ് കമ്മീഷന്‍ പോയില്ല. രാജ്യത്ത് ഉയര്‍ന്നുവന്ന പരാതികളെ കുറിച്ചുള്‌ല വിഷയത്തിലായിരുന്നു മറുപടി പറയേണ്ടിയിരുന്നത്. അതുണ്ടായില്ല. 

തൃശൂര്‍ മണ്ഡലത്തില്‍ ഇല്ലാത്തവര്‍ തൃശൂരിലെ ജനപ്രതിനിധിയെ തെരഞ്ഞെടുത്തതില്‍ കമ്മീഷന്‍ ഒന്നും പറഞ്ഞില്ല. പ്രതിപക്ഷ നേതാവ് രാഷ്ട്രീയം കളിക്കുകയാണെന്ന പ്രസ്താവന കേട്ടാല്‍ ഭരണകക്ഷിയിലെ ഒരു മന്ത്രി നല്‍കിയ മറുപടി പോലെയുണ്ട്,' സുനില്‍ കുമാര്‍ കൂട്ടിച്ചേര്‍ത്തു. 

തനിക്കെതിരെ വാനരന്‍മാരാണ് പരാതി നല്‍കിയതെന്ന സുരേഷ് ഗോപിയുടെ പരാമര്‍ശം തരം താഴ്ന്ന പ്രയോഗമാണെന്നും സുനില്‍ കുമാര്‍ മറുപടി നല്‍കി.

ALSO READ: 'ഇന്ന് അവര്‍ വോട്ട് വെട്ടി, നാളെ റേഷന്‍ കാര്‍ഡില്‍ നിന്ന് പേര് വെട്ടും'; കേന്ദ്ര സര്‍ക്കാരിനെ കടന്നാക്രമിച്ച് തേജസ്വി യാദവ്