തൃശൂർ: കഴിഞ്ഞ ദിവസമുണ്ടായ കുരുക്കിന് പിന്നാലെ വീണ്ടും ദേശീയപാതയിൽ തൃശൂർ -  എറണാകുളം റൂട്ടിൽ ഗതാഗതക്കുരുക്ക്. മുരിങ്ങൂർ, ചാലക്കുടി ഭാഗത്താണ് വാഹനങ്ങൾ നിരനിരയായി കുടുങ്ങിക്കിടക്കുന്നത്. വാഹനങ്ങൾ നിയന്ത്രിക്കാൻ ആമ്പല്ലൂരിലും ചാലക്കുടിയിലും കൂടുതൽ പൊലിസിനെ വിന്യസിച്ചിട്ടുണ്ടെങ്കിലും കുരുക്ക് രൂക്ഷമാവുകയാണ്. നിലവിൽ ദേശീയപാതയിൽ നിന്ന് മാറ്റി വാഹനങ്ങൾ വഴി തിരിച്ചുവിടുകയാണ്. ചാലക്കുടി പോട്ട പാലത്തിനു മുൻപും പൊലിസുകാരെ വിന്യസിച്ചു.

വലിയ വാഹനങ്ങൾ ഒഴികെയുള്ളവയെ പൊലിസ് ചെറിയ റോഡിലൂടെയാണ് കടത്തിവിടുന്നത്. മുരിങ്ങൂർ പാലം കയറുന്നതിനുമുൻപ് കാടുകുറ്റി അത്താണി വഴി എയർപോർട്ട് ജംക്‌ഷനു മുന്നിലുള്ള സിഗ്നലിലേക്ക് ചെറിയ വാഹനങ്ങൾക്ക് എത്താം. വലിയ വാഹനങ്ങൾക്ക് മുരിങ്ങൂർ പാലം വഴി യാത്ര തുടരാം. എറണാകുളത്തേക്ക് പോകാൻ അഷ്ടമിച്ചിറ – മാള വഴി തെരഞ്ഞെടുക്കാൻ പൊലിസ് നിർദേശിച്ചു.

ALSO READ: 15 മണിക്കൂർ പിന്നിട്ട് എറണാകുളം-തൃശൂർ റൂട്ടിലെ ഗതാഗതക്കുരുക്ക്; പെരുവഴിയിൽ വലഞ്ഞ് യാത്രക്കാർ  

രണ്ട് ദിവസം മുൻപ് വെള്ളിയാഴ്ച ഇതേറൂട്ടിൽ വലിയ ഗതാഗതക്കുരുക്ക് ആണ് ഉണ്ടായത്. 18 മണിക്കൂറോളം നീണ്ട കുരുക്ക് ഏറെ പണിപ്പെട്ടാണ് ഒഴിവാക്കിയത്. തൃശൂർ – എറണാകുളം പാതയിൽ 12 കിലോമീറ്റർ ദൂരമായിരുന്നു യാത്രക്കാർ ഗതാഗതക്കുരുക്കിൽപെട്ടത്.  മുരിങ്ങൂരിലും ചിറങ്ങരയിലും അടിപ്പാത നിർമാണം നടക്കുന്നതും വാഹനങ്ങൾ കടത്തിവിടാനായി സജ്ജമാക്കിയ ബദൽ റോഡുകൾ തകർന്നതുമാണ് ഗതാഗതകുരുക്ക് രൂക്ഷമാക്കിയത്. 

എൻഎച്ച് 544നു പുറമെ ദേശീയപാത 66ലും ഗതാഗതക്കുരുക്ക് രൂക്ഷമാണ്. തൃശൂർ–എറണാകുളം ജില്ലാ അതിർത്തിയായ കോട്ടപ്പുറം – മൂത്തകുന്നം ഭാഗത്ത് ഒരു കിലോമീറ്റർ പിന്നിടാൻ ഒരു മണിക്കൂറിലേറെ സമയം എടുക്കുന്നുണ്ട്. 

After a recent traffic jam, heavy congestion has again hit the Thrissur–Ernakulam stretch of the national highway. Vehicles remain stuck for long hours near Murangoor and Chalakudy. Despite deploying more police at Amballoor and Chalakudy, the traffic situation remains severe. Vehicles are being diverted to alternative routes, and additional police have been posted near Chalakudy Pott Bridge.