ചെന്നൈ: എ.ടി.എമ്മില്‍ നിന്ന് പണമെടുക്കുന്നതിനിടെ യുവാവിന് ഷോക്കേറ്റു. തമിഴ്‌നാട്ടിലെ കാഞ്ചീപുരത്ത് ഖമ്മന്‍ സ്ട്രീറ്റ് സ്വദേശി വെങ്കടേശനാണ് വൈദ്യുതാഘാതമേറ്റത്. കാഞ്ചീപുരം ഹെഡ് പോസ്റ്റ് ഓഫീസിന് സമീപമുള്ള എച്ച്.ഡി.എഫ്.സി ബാങ്കിന്റെ എ.ടി.എമ്മില്‍ നിന്ന്  പണമെടുക്കുന്നതിനിടെ വൈദ്യുതാഘാതമേല്‍ക്കുകയായിരുന്നു. ഇയാളെ ആശുപത്രിയില്‍ പ്രവേശിപ്പിച്ചു. 

എട്ട് വയസുള്ള മകനും കൂടെയുണ്ടായിരുന്നു.  കാര്‍ഡ് ഇട്ടശേഷം പിന്‍ നമ്പര്‍ ടൈപ്പ് ചെയ്യുന്നതിനിടെ കീപാഡില്‍ നിന്ന് ഷോക്കേല്‍ക്കുകയായിരുന്നു. ആദ്യം അസ്വസ്ഥത അനുഭവപ്പെട്ടപ്പോള്‍ അത് ഷോക്ക് ആണോ എന്ന് ഉറപ്പില്ലാത്തതിനാല്‍ വീണ്ടും പിന്‍ നമ്പര്‍ ടൈപ്പ് ചെയ്യാന്‍ ശ്രമിച്ചു. അപ്പോള്‍ ശക്തമായ ഷോക്കേല്‍ക്കുകയായിരുന്നു. വലത് കയ്യിലാണ് ശക്തിയേറിയ വൈദ്യുതാഘാതമേറ്റത്.  ഉടന്‍ പുറത്തിറങ്ങിയ വെങ്കടേശന്‍ കാഞ്ചീപുരം ഗവ. ആശുപത്രിയില്‍ ചികിത്സ തേടി.

ALSO READ: ആശുപത്രിക്ക് ബോംബിട്ടു, ഭക്ഷണം കാത്തുനിന്നവരെ വെടിവച്ചു കൊന്നു; ഗസ്സയിൽ ഇസ്‌റാഈല്‍ ഭീകരതയുടെ ആവർത്തനങ്ങൾ

കീപാഡില്‍ വൈദ്യുതി പ്രവാഹമുള്ളതായി പൊലിസ് പരിശോധനയില്‍ കണ്ടെത്തിയിട്ടുണ്ട്. വൈദ്യുതി പ്രവാഹം കുറവായതിനാല്‍ വലിയ അപകടമാണ് ഒഴിവായതെന്ന് പൊലിസ് ചൂണ്ടിക്കാട്ടി.  മറ്റുള്ളവര്‍ക്കും ഇതേ എ.ടി.എമ്മില്‍നിന്ന് ചെറിയ രീതിയിലുള്ള ഷോക്ക് ഏറ്റിരുന്നതായും റിപ്പോര്‍ട്ടുകളുണ്ട്. 

എ.ടി.എം ഉടന്‍ തന്നെ നന്നാക്കാന്‍ പൊലിസ് ആവശ്യപ്പെട്ടിട്ടുണ്ട്. ഇത്തരം സാഹചര്യങ്ങളില്‍ വളരെയധികം ശ്രദ്ധ പുലര്‍ത്തേണ്ടതുണ്ട്. എന്തെങ്കിലും അസ്വാഭാവികത തോന്നിയാല്‍ എ.ടി.എം ഉപയോഗിക്കാതെ ഉടന്‍തന്നെ അവിടെനിന്നും മാറുന്നതാണ് നല്ലതെന്നും പൊലിസ് അറിയിച്ചു.

A man suffered an electric shock while withdrawing money from an HDFC Bank ATM near the Head Post Office in Kanchipuram, Tamil Nadu. The incident occurred as he was entering his PIN on the keypad. Police confirmed the presence of electric current on the keypad and have ordered immediate repair of the ATM.