ഭുവനേശ്വര്‍: രണ്ടാം ക്ലാസുകാരി ഒരു രാത്രി മുഴുവന്‍ സ്‌കൂളിനുള്ളില്‍ കുടുങ്ങി. ഒഡിഷയിലെ കേന്ദുഝര്‍ ജില്ലയിലുള്ള ഒരു സര്‍ക്കാര്‍ സ്‌കൂളിലാണ് സംഭവം. വ്യാഴാഴ്ചയാണ് കുട്ടി സ്‌കൂളില്‍ കുടുങ്ങിയത്. വെള്ളിയാഴ്ച രാവിലെ ഗുരുതരാവസ്ഥയില്‍ കണ്ടെത്തിയ കുട്ടിയെ ആശുപത്രിയില്‍ പ്രവേശിപ്പിക്കുകയായിരുന്നു. 

നിലവില്‍ കുട്ടിയുടെ ആരോഗ്യനില തൃപ്തികരമാണെന്നാണ് അധികൃതര്‍ പറയുന്നത്. വ്യാഴാഴ്ച സ്‌കൂള്‍ വിട്ട് മറ്റ് വിദ്യാര്‍ത്ഥികള്‍ പോയതിന് ശേഷവും കുട്ടി സ്‌കൂളിനുള്ളില്‍ത്തന്നെ ഉണ്ടായിരുന്നു. ഇത് ശ്രദ്ധയില്‍പ്പെടാതെ സ്‌കൂള്‍ ഗേറ്റ് കീപ്പര്‍ പ്രധാന ഗേറ്റ് പുറത്ത് നിന്ന് പൂട്ടുകയും ചെയ്തു. കുട്ടി വീട്ടിലെത്താത്തതിനെ തുടര്‍ന്ന് ബന്ധുക്കള്‍ പൊലിസില്‍ വിവരമറിയിച്ചിരുന്നു. 

രാത്രി മുഴുവന്‍ നാട്ടുകാര്‍ കുട്ടിക്കായി തിരച്ചില്‍ നടത്തിയെങ്കിലും കണ്ടെത്താനായില്ല. സ്‌കൂളിനുള്ളില്‍ കുടുങ്ങിയ കുട്ടി ജനലിന്റെ ഇരുമ്പ് ഗ്രില്ലുകള്‍ക്കിടയിലൂടെ രക്ഷപ്പെടാന്‍ ശ്രമിച്ചിരുന്നു. ഈ ശ്രമത്തിനിടെ തല കുടുങ്ങി ഗുരുതരമായി പരിക്കേല്‍ക്കുകയും ചെയ്തു. പിറ്റേന്ന് രാവിലെ കുട്ടിയെ ജനലില്‍ കുടുങ്ങിയ നിലയില്‍ നാട്ടുകാരാണ് കണ്ടെത്തിയത്. ഉടന്‍ തന്നെ അധികൃതരെ വിവരമറിയിച്ചതിനെ തുടര്‍ന്ന് രക്ഷാപ്രവര്‍ത്തകര്‍ സ്ഥലത്തെത്തി കുട്ടിയെ രക്ഷപ്പെടുത്തി ആശുപത്രിയിലെത്തിക്കുകയായിരുന്നു. 

ALSO READ: 14 കാരൻ 10 വയസുകാരിയെ കുത്തിയത് 18 തവണ, പിന്നാലെ കഴുത്തറുത്തു; 'മിഷൻ ഡോൺ' - ഞെട്ടിക്കുന്ന കൊലപാതകം

കുട്ടിയുടെ ആരോഗ്യനില മെച്ചപ്പെട്ടതായി പിന്നീട് ഡോക്ടര്‍മാര്‍ സ്ഥിരീകരിച്ചു. കുട്ടി ജനലില്‍ കുടുങ്ങിയ വിഡിയോ ഓണ്‍ലൈനില്‍ വൈറലായതോടെ വലിയ പ്രതിഷേധങ്ങളും ഉയര്‍ന്നു. സ്‌കൂള്‍ ജീവനക്കാര്‍ക്കെതിരെ കര്‍ശന നടപടി ആവശ്യപ്പെട്ട് നാട്ടുകാരും രംഗത്തെത്തി. സംഭവത്തെക്കുറിച്ച് അന്വേഷണം നടത്താന്‍ ഭരണകൂടം ഉത്തരവിട്ടിട്ടുണ്ട്. സാധാരണ സ്‌കൂളിലെ പാചകക്കാരനാണ് ക്ലാസ്മുറികള്‍ പൂട്ടിയിരുന്നത്. എന്നാല്‍ കനത്ത മഴ കാരണം അദ്ദേഹം അവധിയായിരുന്നു. 

വൈകുന്നേരം 4:10ന് ക്ലാസ് മുറികള്‍ അടയ്ക്കാനായി ഏഴാം ക്ലാസിലെ രണ്ട് വിദ്യാര്‍ത്ഥികളെയാണ് അയച്ചത്. ഈ സമയം രണ്ടാം ക്ലാസുകാരിയായ കുട്ടി ഡെസ്‌കിന് താഴെ ഉറങ്ങുകയായിരുന്നു. ഇത് ശ്രദ്ധിക്കാതെ വിദ്യാര്‍ത്ഥികള്‍ മുറി പൂട്ടി എന്നാണ് സ്‌കൂളിലെ അധ്യാപികയായ സഞ്ജിതയുടെ വിശദീകരണം.

A Class 2 student was found trapped inside a government school in Kendujhar district, Odisha, after spending an entire night alone. The incident occurred on Thursday, when the girl was accidentally locked inside the school after classes ended.