മലപ്പുറം: വിനോദ സഞ്ചാര കേന്ദ്രമായ മൊറയൂർ അരിമ്പ്ര മലയിലെ 'മിനി ഊട്ടിയിൽ' ഹരിതകർമ സേന ശേഖരിച്ച പ്ലാസ്റ്റിക് മാലിന്യം വൻ തോതിൽ തള്ളി ഏജൻസികൾ. കോഴിക്കോട് കോർപറേഷൻ, കോട്ടയം ഈരാറ്റുപേട്ട നഗരസഭ എന്നിവടങ്ങളിൽനിന്ന് ശേഖരിച്ച അജൈവ മാലിന്യമാണ് മൊറയൂർ പഞ്ചായത്തിലുൾപ്പെട്ട മിനി ഊട്ടിയിലെ ഗ്ലാസ് ബ്രിജ്, കെ.എസ്.വൈ കമ്പനി എന്നിവയ്ക്കു സമീപം സ്വകാര്യ വ്യക്തിയുടെ സ്ഥലത്ത് അർധരാത്രിയിൽ തള്ളിയത്. തൊട്ടപ്പുറത്ത് ഊരകം പഞ്ചായത്തിലുൾപ്പെട്ട പ്രദേശത്തും സമാന രീതിയിൽ മാലിന്യം തള്ളിയിട്ടുണ്ട്.

കഴിഞ്ഞ തിങ്കളാഴ്ചയാണ് മാലിന്യം നാട്ടുകാരുടെ ശ്രദ്ധയിൽപെട്ടത്. ചൊവാഴ്ച വീണ്ടും മാലിന്യം തള്ളിയതോടെ മൊറയൂർ പഞ്ചായത്ത് അധികൃതരും ആരോഗ്യ വകുപ്പും നാട്ടുകാരും ചേർന്ന് നടത്തിയ പരിശോധനയിൽ ഈരാറ്റുപേട്ടയിലെയും കോഴിക്കോട് കോർപറേഷനിലെയും ടെക്സ്റ്റയിൽസുകൾ, ജ്വല്ലറികൾ എന്നിവയുടെ കവറുകൾ, ഫ്ളിപ്പ്കാർട്ട് പാർസൽ കവറുകൾ തുടങ്ങിയവ കണ്ടെടുത്തത്. കോഴിക്കോട് കോർപറേഷനിൽ ഹരിതകർമ സേന ഉപയോഗിക്കുന്ന 'അഴക്' എന്ന് രേഖപ്പെടുത്തിയ കവറുകളും ഇക്കൂട്ടത്തിലുണ്ട്. 

വേർതിരിച്ച ശേഷം ബാക്കി വന്ന പ്ലാസ്റ്റിക് മാലിന്യങ്ങളാണ് തള്ളിയവയിൽ കൂടുതലും. വേർതിരിക്കാത്ത അജൈവ മാലിന്യവുണ്ട്. കോനാരി, മലബാർ, നാച്ചുറൽസ് എന്നീ ഏജൻസികളാണ് കോഴിക്കോട് കോർപറേഷനിലെ മാലിന്യം ശേഖരിക്കുന്നത്. സർക്കാർ അംഗീകൃത ഏജൻസിയായ 'തിരുവോണം' ആണ് ഈരാറ്റുപേട്ടയിലെ ഹരിതകർമ സേനയുടെ മാലിന്യം ശേഖരിക്കുന്നത്. കഴിഞ്ഞ 14, 15 തീയതികളിലാണ് ഇവർ അവസാനമായി ഹരിതകർമ സേനയിൽനിന്ന് അജൈവ മാലിന്യം ശേഖരിച്ചത്. 

സംഭവത്തിൽ സമഗ്ര അന്വേഷണം നടത്തി കുറ്റക്കാർക്കെതിരെ നടപടി സ്വീകരിക്കണമെന്നാവശ്യപ്പെട്ട് മൊറയൂർ പഞ്ചായത്ത്, മലപ്പുറം തദ്ദേശ സ്വയംഭരണ വകുപ്പ് ജോ. ഡയരക്ടർക്കും ജില്ലാ ശുചിത്വ മിഷൻ കോർഡിനേറ്റർക്കും കൊണ്ടോട്ടി പൊലിസിലും പരാതി നൽകി. ഏജൻസിയുടെ കരാറും ലൈസൻസും റദ്ദാക്കുമെന്ന് ഈരാറ്റുപേട്ട നഗരസഭാ ചെയർപഴ്സൺ സുഹറ അബ്ദുൽ ഖാദർ അറിയിച്ചു. കുറ്റക്കാരെ കണ്ടെത്തിയാൽ നടപടിയുണ്ടാകുമെന്ന് കോഴിക്കോട് കോർപറേഷൻ മേയർ ഡോ.ബീന ഫിലിപ്പ് അറിയിച്ചു.

ഈരാറ്റുപേട്ടയിൽ നിന്നും മാലിന്യം വന്ന വഴി

മിനി ഊട്ടിയിലെ മാലിന്യത്തിൽ ഏറ്റവും കൂടുതലുള്ളത് ഈരാറ്റുപേട്ടയിലേതാണ്. ഈരാറ്റുപേട്ട നഗരസഭയുടെ മാലിന്യ ശേഖരണം 2023 മുതൽ നടത്തുന്നത് തിരുവോണം എന്ന സർക്കാർ അംഗീകൃത ഏജൻസിയാണ്. ഹരിതകർമസേനയിൽ നിന്നും ശേഖരിച്ച മാലിന്യവുമായി കെ.എൽ 41, എസ്. 7608 വാഹനം 14 ന് ഉച്ചക്ക് 3.49 ന് പുറപ്പെടുന്നു. തൊട്ടടുത്ത ദിവസം ഏതാണ്ട് അതേ സമയത്ത് കെ.എൽ 10 എ. സെഡ് 9241 വാഹനവും പ്ലാസ്റ്റിക് മാലിന്യവുമായി പുറപ്പെടുന്നു. തലയോലപ്പറമ്പിലേക്കാണ് പുറപ്പെട്ടതെന്ന് തിരുവോണം ഏജൻസി അവകാശപ്പെടുന്നത്. മിനി ഊട്ടിയിൽ മാലിന്യം കാണപ്പെടുന്നത് മൂന്ന് ദിവസം കഴിഞ്ഞ് തിങ്കളാഴ്ച. അതുവരെ മാലിന്യം എവിടെയായിരുന്നുവെന്നും ഏത് വാഹനത്തിലാണ് മിനി ഊട്ടിയിലെത്തിയതെന്നും കണ്ടെത്തേണ്ടിയിരിക്കുന്നു. മിനി ഊട്ടിയിലെത്താൻ ജില്ലയിലെ പലയിടങ്ങളിൽ നിന്നും വഴികളുണ്ടെങ്കിലും അറവങ്കര-മൈലാടി- മിനി ഊട്ടി റോഡിൽ ചിലയിടങ്ങളിലെല്ലാം വീണുകിടക്കുന്ന മാലിന്യ ചാക്കുകൾ വഴിയേതെന്ന് ചൂണ്ടിക്കാട്ടുന്നു. മിനി ഊട്ടിയിലെ കരിങ്കൽ ക്വാറികളിൽ നിന്നും ഈരാറ്റുപേട്ട ഭാഗത്തേക്ക് സ്ഥിരമായി കരിങ്കല്ലുമായി ലോറികൾ പോവാറുണ്ടെന്നും അവ തിരിച്ച് വരുമ്പോൾ മാലിന്യം തിരികെ കൊണ്ട് വന്ന് തള്ളിയതാവാമെന്ന സംശയവും നാട്ടുകാർക്കുണ്ട്.