ജിദ്ദ: ഗസ്സയിലെ ഇസ്റാഈൽ ആക്രമണങ്ങൾ തടയാൻ അന്താരാഷ്ട്ര സമൂഹം ഉടൻ നടപടി സ്വീകരിക്കണമെന്ന് സഊദി വിദേശകാര്യ മന്ത്രി  ഫൈസൽ ബിൻ ഫർഹാൻ രാജകുമാരൻ. ​ഗസ്സയിലെ സാധാരണക്കാർക്കെതിരായ ആക്രമണങ്ങൾ ആഗോള സമാധാനത്തിനും സ്ഥിരതയ്ക്കും ഭീഷണിയാണെന്ന് അദ്ദേഹം വ്യക്തമാക്കി.

ജിദ്ദയിൽ നടന്ന ഓർഗനൈസേഷൻ ഓഫ് ഇസ് ലാമിക് കോ-ഓപ്പറേഷനിലെ വിദേശകാര്യ മന്ത്രിമാരുടെ 21-ാമത് യോഗത്തിൽ സംസാരിക്കവെയായിരുന്നു ഫൈസൽ രാജകുമാരന്റെ പ്രതികരണം.

ALSO READ: സമ്പൂര്‍ണ അധിനിവേശത്തിനുള്ള നീക്കത്തില്‍ ഗസ്സയില്‍ ഇസ്‌റാഈല്‍ തകര്‍ത്തത് ആയിരത്തിലേറെ കെട്ടിടങ്ങള്‍  

ഫലസ്തീനികൾ ഭീകരമായ അടിച്ചമർത്തലും വംശഹത്യയും നേരിടുന്നുണ്ടെന്നും ഇത് അന്താരാഷ്ട്ര നിയമങ്ങളുടെ വ്യക്തമായ ലംഘനമാണെന്നും അദ്ദേഹം ചൂണ്ടിക്കാട്ടി. ലോക രാജ്യങ്ങളുടെ നിശബ്ദത മാനുഷിക പ്രതിസന്ധി വഷളാക്കുകയും സമാധാന പ്രതീക്ഷകളെ ദുർബലപ്പെടുത്തുകയും ചെയ്തിട്ടുണ്ടെന്ന് അദ്ദേഹം ആരോപിച്ചു.

ഗസ്സ നഗരം കൈയടക്കാനും കുടിയേറ്റ കേന്ദ്രങ്ങൾ വിപുലീകരിക്കാനുമുള്ള ഇസ്റാഈലിന്റെ ശ്രമങ്ങൾ തടയണമെന്നും ഫൈസൽ രാജകുമാരൻ ആവശ്യപ്പെട്ടു. ഇത്തരം നടപടികൾ സ്ഥിരതയ്ക്കുള്ള സാധ്യതകളെ തടസ്സപ്പെടുത്തുകയും സംഘർഷങ്ങൾ വർധിപ്പിക്കുകയും ചെയ്യുമെന്ന് അദ്ദേഹം വ്യക്തമാക്കി. ഗസ്സയിലേക്ക് അടിയന്തര മാനുഷിക സഹായം എത്തിക്കണമെന്നും അദ്ദേഹം ആവശ്യപ്പെട്ടു.

وزير الخارجية الأمير فيصل بن فرحان:

على المجتمع الدولي بشكل فوري وضع حد للجرائم التي يرتكبها الاحتلال الإسرائيلي على #غزة#الإخبارية pic.twitter.com/zznr56wbXo

— قناة الإخبارية (@alekhbariyatv) August 25, 2025

യോ​ഗത്തിൽ 1967-ലെ അതിർത്തികൾ പുനഃസ്ഥാപിച്ച് കിഴക്കൻ ജറുസലേം തലസ്ഥാനമാക്കി ഫലസ്തീൻ രാഷ്ട്രം സ്ഥാപിക്കുന്നതിനുള്ള സഊദി അറേബ്യയുടെ പിന്തുണ അദ്ദേഹം ആവർത്തിച്ചു. 

OIC സെക്രട്ടറി ജനറൽ ഹിസ്സൈൻ ബ്രാഹിം താഹ, ഇസ്റാഈൽ നടത്തിക്കൊണ്ടിരിക്കുന്ന കുറ്റകൃത്യങ്ങൾക്കെതിരെ അംഗരാജ്യങ്ങൾ ശക്തമായ നടപടികൾ സ്വീകരിക്കണമെന്ന് എക്സിൽ പോസ്റ്റ് ചെയ്ത പ്രസ്താവനയിൽ ആവശ്യപ്പെട്ടു. സൈനികാക്രമണം, വംശഹത്യ, വംശീയ ഉന്മൂലനം, നിർബന്ധിത നാടുകടത്തൽ, ഉപരോധം, പട്ടിണിയെ യുദ്ധായുധമായി ഉപയോഗിക്കൽ എന്നീ കാര്യങ്ങൾ ചെയ്യുന്നതിലൂടെ ഇസ്റാഈൽ അന്താരാഷ്ട്ര ഉടമ്പടികൾ ലംഘിക്കുകയാണെന്നും അദ്ദേഹം വ്യക്തമാക്കി.

ALSO READ: അല്‍ ജസീറ കാമറമാന്‍ ഉള്‍പെടെ നാലു മാധ്യമപ്രവര്‍ത്തകരെ കൂടി ഇസ്‌റാഈല്‍ കൊന്നു; തെക്കന്‍ ഗസ്സയിലെ ആശുപത്രിക്ക് നേരെയുണ്ടായ ആക്രമണത്തില്‍ കൊല്ലപ്പെട്ടത് 14 പേര്‍ 

ഇസ്റാഈലിന്റെ കുടിയേറ്റ വിപുലീകരണം, ജറുസലേമിലെ പുണ്യസ്ഥലങ്ങൾക്ക് നേരെയുള്ള ആക്രമണങ്ങൾ എന്നിവ അവസാനിപ്പിക്കണമെന്നും താഹ ആവശ്യപ്പെട്ടു. ഗസ്സയിലെ ഉപരോധം തകർക്കാനും മാനുഷിക സഹായം സുരക്ഷിതമായി എത്തിക്കാനും അന്താരാഷ്ട്ര സമൂഹം ഉടൻ ഇടപെടണമെന്ന് അദ്ദേഹം നിർദേശിച്ചു. ജറുസലേമിൽ പുതിയ കുടിയേറ്റങ്ങൾക്ക് അംഗീകാരം നൽകിയതിനെയും ഗസ്സയിൽ മാധ്യമപ്രവർത്തകരെ കൊലപ്പെടുത്തിയതിനെയും അദ്ദേഹം ശക്തമായി അപലപിച്ചു. ഇസ്റാഈൽ സൈന്യം ചെയ്യുന്ന കുറ്റകൃത്യങ്ങൾ അന്താരാഷ്ട്ര ക്രിമിനൽ നിയമപ്രകാരം പ്രോസിക്യൂട്ട് ചെയ്യണമെന്നും അദ്ദേഹം പറഞ്ഞു.

saudi arabia’s foreign minister, prince faisal bin farhan, has called for immediate international intervention to halt israel’s ongoing attacks on gaza, warning that continued violence threatens global peace. speaking at the oic meeting in jeddah, he condemned the humanitarian crisis and urged support for a palestinian state. learn more about the urgent call for action.