കണ്ണൂർ: കണ്ണൂർ സെൻട്രൽ ജയിലിലേക്ക് മൊബൈൽ ഫോണുകളും മറ്റ് നിരോധിത വസ്തുക്കളും എറിഞ്ഞു നൽകുന്നതിന് 1000 മുതൽ 2000 രൂപ വരെ കൂലി ലഭിച്ചിരുന്നതായി പിടിയിലായ പ്രതി കെ. അക്ഷയ് മൊഴി നൽകി. ജയിലിനകത്തേക്ക് സാധനങ്ങൾ എറിഞ്ഞു നൽകുന്നതിന് മുൻകൂട്ടി അടയാളങ്ങൾ അറിയിക്കുമെന്നും ഇയാൾ വെളിപ്പെടുത്തി.

പനങ്കാവ് സ്വദേശിയായ അക്ഷയ് ഞായറാഴ്ച വൈകിട്ട് മൂന്ന് മണിയോടെയാണ് ജയിൽ പരിസരത്ത് അക്ഷയ് എത്തിയത്. തുടർന്ന് മൊബൈൽ ഫോണും ബീഡിയും പുകയില ഉൽപ്പന്നങ്ങളും ജയിലിനകത്തേക്ക് എറിഞ്ഞു നൽകാൻ ശ്രമിക്കവെ വാർഡൻ ഇയാളെ പിടികൂടിയത്. ഇയാളോടൊപ്പം ഉണ്ടായിരുന്ന രണ്ട് പേർ ഓടി രക്ഷപ്പെട്ടു. സംഭവത്തിൽ കണ്ണൂർ ടൗൺ പൊലിസ് കേസെടുത്തു.

ALSO READ: ടോൾ പ്ലാസകളിൽ ടെൻഷൻ വേണ്ട: ഇലക്ട്രിക് വാഹനങ്ങൾക്ക് സൗജന്യ യാത്ര പ്രഖ്യാപിച്ച് സംസ്ഥാനം

കഴിഞ്ഞ ബുധനാഴ്ച ജയിലിൽ നടത്തിയ പരിശോധനയിൽ ഇ ഡിവിഷനിലെ 12-ാം നമ്പർ സെല്ലിന്റെ ഭിത്തിയിൽ നിന്ന് മൂന്ന് മൊബൈൽ ഫോണുകൾ കണ്ടെടുത്തിരുന്നു. ജോയിന്റ് സൂപ്രണ്ടുമാരുടെ നേതൃത്വത്തിലായിരുന്നു ഈ പരിശോധന. ഇതിന് രണ്ടാഴ്ച മുമ്പ് ന്യൂ ബ്ലോക്കിലെ കല്ലിനടിയിലും കുളിമുറിയിലെ ജനാലയിൽ ഒളിപ്പിച്ച നിലയിലും മൊബൈൽ ഫോണുകൾ കണ്ടെടുത്തിരുന്നു.

ഗോവിന്ദച്ചാമിയുടെ ജയിൽചാട്ടത്തിന് ശേഷം സർക്കാർ രൂപീകരിച്ച അന്വേഷണ സമിതിയുടെ നേതൃത്വത്തിൽ ജയിലിൽ വിശദമായ പരിശോധന നടത്തിയിരുന്നു. റിട്ട. ജസ്റ്റിസ് സി.എൻ. രാമചന്ദ്രൻ നായർ, മുൻ സംസ്ഥാന പൊലിസ് മേധാവി ജേക്കബ് പുന്നൂസ് എന്നിവർ ഉൾപ്പെട്ട സമിതി രണ്ട് ദിവസത്തെ പരിശോധനയാണ് നടത്തിയത്.

ALSO READ: കോച്ചിങ് ഇല്ലാതെ 21-ാം വയസ്സിൽ ഐപിഎസ്, 22-ൽ ഐഎഎസ്: പ്രതിസന്ധികളെ തോല്പിച്ച ദിവ്യ തൻവാറിന്റെ വിജയഗാഥ

നേരത്തെ പല തവണയും കണ്ണൂർ സെൻട്രൽ ജയിലിൽ നിന്ന് മൊബൈൽ ഫോണുകൾ പിടികൂടിയിട്ടുണ്ട്. സൂപ്രണ്ടിന്റെ പരാതിയിൽ കണ്ണൂർ ടൗൺ പൊലിസ് കേസെടുത്ത് അന്വേഷണം തുടരുകയാണ്.

An individual was caught throwing a mobile phone into Kannur Central Jail and was paid between Rs 1000 and Rs 2000 for the act.