ന്യൂയോർക്ക്: പ്രധാനമന്ത്രി നരേന്ദ്ര മോദിയോട് തന്നെ നൊബേൽ പുരസ്കാരത്തിന് ശുപാർശ ചെയ്യണമെന്ന് ട്രംപ് ആവശ്യപ്പെട്ടെന്നും മോദി ഈ ആവശ്യം നിരസിച്ചതാണ് ഇന്ത്യയ്ക്കു മേൽ അധികത്തീരുവ ചുമത്താൻ അമേരിക്കയെ പ്രേരിപ്പിച്ചതെന്നും റിപ്പോർട്ട്. നൊബേൽ സമ്മാനത്തിന് തന്നെ ശുപാർശ ചെയ്യണമെന്ന ട്രംപിന്റെ ആവശ്യം നിരസിച്ച മോദിയുടെ നടപടി അദ്ദേഹത്തെ പ്രകോപിതനാക്കിയതായി വിവിധ അന്താരാഷ്ട്ര മാധ്യമങ്ങൾ റിപ്പോർട്ട് ചെയ്തു.

ALSO READ: 'അമേരിക്കന്‍ ബ്രാന്‍ഡ് ആഗോളതലത്തില്‍ തന്നെ വെറും വേസ്റ്റ് ആയി' ഇന്ത്യക്കെതിരായ തീരുവ യുദ്ധത്തില്‍ ട്രംപിനെതിരെ ആഞ്ഞടിച്ച് യു.എസ് ദേശീയ സുരക്ഷാ മുന്‍ ഉപദേഷ്ടാവ് ജേക്ക് സള്ളിവന്‍ 

ഇന്ത്യ-പാകിസ്ഥാൻ വെടിനിർത്തൽ കരാർ സാധ്യമായത് തന്റെ ഇടപെടലുകൾ മൂലമാണെന്നും ഇതിനാൽ തന്നെ സമാധാന നൊബേലിന് നോമിനേറ്റ് ചെയ്യണമെന്നും ട്രംപ് ജൂൺ മാസത്തിൽ മോദിയോട് ആവശ്യപ്പെട്ടിരുന്നതായി റിപ്പോർട്ടുകളുണ്ട്. എന്നാൽ ട്രംപിനെ നൊബേലിന് ശുപാർശ ചെയ്യാൻ മോദി വിസമ്മതിച്ചെന്നും ന്യൂയോർക്ക് ടൈംസ് റിപ്പോർട്ട് ചെയ്തു.

ഇന്ത്യയും പാകിസ്ഥാനും തമ്മിലുള്ള സംഘർഷം തന്റെ ഇടപെടലുകൾ കാരണമാണ് അവസാനിച്ചതെന്ന ട്രംപിന്റെ ആവർത്തിച്ചുള്ള പ്രസ്താവനകൾ മോദിയെ അസ്വസ്ഥമാക്കിയതായാണ് വിവരം. സംഘർഷത്തിന പിന്നാലെ മോദിയെ വിളിച്ച ട്രംപ്, ഇരു രാജ്യങ്ങളും തമ്മിലുള്ള സംഘർഷം അവസാനിപ്പിക്കാനായതിൽ താൻ അഭിമാനിക്കുന്നെന്നും പാകിസ്ഥാൻ തന്നെ നൊബേലിന് ശുപാർശ ചെയ്യുമെന്നും മോദിയെ അറിയിച്ചിരുന്നു. ഇതിനു പിന്നാലെ ഇന്ത്യയും തന്നെ നൊബേലിന് ശുപാർശ ചെയ്യണമെന്ന് ട്രംപ് മോദിയോട് ആവശ്യപ്പെട്ടു. എന്നാൽ ശുപാർശ ചെയ്യാനാവില്ലെന്ന് മോദി ട്രംപിനെ അറിയിച്ചു. ഇന്ത്യ-പാക് വെടിനിർത്തൽ യുഎസ് ഇടപെടൽ മൂലമല്ല സംഭവിച്ചതെന്നും അത് ഇന്ത്യയും പാകിസ്താനും പരസ്പരം ചർച്ചകളിലൂടെ കൈകൊണ്ട തീരുമാനമാണെന്നും മോദി ട്രംപിനെ അറിയിച്ചു.

ALSO READ: കരുതിയിരുന്നോ വന്‍നാശം കാത്തിരിക്കുന്നു, ഇസ്‌റാഈലിന് അബു ഉബൈദയുടെ താക്കീത്; പിന്നാലെ സൈനിക കേന്ദ്രങ്ങളെ ലക്ഷ്യമിട്ട് പോരാളികളുടെ തിരിച്ചടി, സൈനികന്‍ കൊല്ലപ്പെട്ടു, നിരവധി പേര്‍ക്ക് പരുക്ക്, നാലുപേരെ കാണാതായി 

ഇന്ത്യക്കെതിരെയുള്ള തീരുവ യുദ്ധത്തിൽ യുഎസിന് മുന്നറിയിപ്പുമായി ഐക്യരാഷ്ട്ര സംഘടനയിലെ മുൻ യുഎസ് അംബാസിഡർ നിക്കി ഹേലി നേരത്തെ രംഗത്തെത്തിയിരുന്നു. അമേരിക്കയും ഇന്ത്യയും തമ്മിലുള്ള ബന്ധം തകർച്ചയുടെ വക്കിലാണെന്ന് ആശങ്ക പ്രകടിപ്പിച്ച അവർ ആഗോള ശക്തിയാകാൻ ആഗ്രഹിക്കുന്ന ചൈനയെ നിയന്ത്രിക്കണമെങ്കിൽ ഇന്ത്യയുമായുള്ള ബന്ധം പുനഃസ്ഥാപിക്കേണ്ടത് അത്യാവശ്യമാണെന്നും ചൂണ്ടിക്കാട്ടിയിരുന്നു. 

രണ്ട് ഘട്ടങ്ങളിലായിട്ടാണ് ട്രംപ് ഇന്ത്യക്ക് 50 ശതമാനം തീരുവ ഏർപ്പെടുത്തിയത്. ജൂലൈ 30 ന് ആദ്യം 25 ശതമാനം തീരുവ പ്രഖ്യാപിച്ചു. ആഗസ്റ്റ് ഏഴിനാണ് അധിക 25 ശതമാനം പ്രഖ്യാപിച്ചത്.

US President Donald Trump’s request for a Nobel Peace Prize nomination is rejected by Indian PM Narendra Modi. Trump’s anger targets India