മലപ്പുറം:2025 തദ്ദേശ  തെരഞ്ഞെടുപ്പിൽ മത്സരിക്കാനെത്തുന്നത് മുൻവർഷത്തേക്കാൾ 1712 അധിക ജനപ്രതിനിധികളും,വോട്ട് ചെയ്യാൻ ബൂത്തിലേക്ക് ആറര ലക്ഷം കന്നിവോട്ടർമാരുമെത്തും. തദ്ദേശ സ്ഥാപനങ്ങളുടെ വാർഡ് വിഭജനത്തിന് ശേഷമുള്ള ആദ്യതെരഞ്ഞെടുപ്പാണ് നടക്കാനിരിക്കുന്നത്.ഇതുപ്രകാരം സംസ്ഥാനത്തെ 941 ഗ്രാമപഞ്ചായത്തുകളിൽ 1375 വാർഡുകളുടെ വർധനവുണ്ട്.നിലവിൽ 15,962 വാർഡുകളാണുള്ളത്.

പുതിയ വാർഡുകളും ചേർത്തതോടെ 17,337 വാർഡുകളായി വർധിച്ചു.വാർഡ് അംഗങ്ങൾ കൂടുതൽ ഗ്രാമപഞ്ചായത്തുകളിലായിരിക്കും.സംസ്ഥാനത്തെ 87 നഗരസഭകളിൽ 128 വാർഡ് കൗൺസിലർമാർ അധികം ഇത്തവണ തെരഞ്ഞെടുക്കപ്പെട്ട് എത്തും.നിലവിൽ 3113 വാർഡുകളാണുള്ളത്.ഇത് 3241 വാർഡുകളായി വർധിക്കും.ആറ് കോർപ്പറേഷനുകളിൽ ഏഴ് കൗൺസിലർമാരാണ് അധികമുണ്ടാവുക.414 വാർഡുകൾ 421 ആയാണ് വർധിച്ചിരിക്കുന്നത്.

ബ്ലോക്ക് പഞ്ചായത്തുകളിൽ 187 വാർഡുകളാണ് വർധിച്ചത്.നിലവിൽ 2080 വാർഡുകളാണ് ബ്ലോക്ക് പഞ്ചായത്തുകളിലുള്ളത്.ഇവ 2267 ആയി ഉയരും. ജില്ലാപഞ്ചായത്തുകളിൽ 15 വാർഡുകളാണ് വർധിച്ചത്. 331 വാർഡുകൾ 346 ആയി ഉയർന്നു.നടക്കാനിരിക്കുന്ന തെരഞ്ഞെടുപ്പിൽ പുതിയ വാർഡുകൾ കൂടി ഉൾപ്പെടുത്തിയതിനാൽ 2020നേക്കാൾ 1712 ജനപ്രതിനിധികൾ അധികമുണ്ടാകും.

വാർഡുകൾ കൂടിയതോടൊപ്പം വോട്ടർമാരുടെ എണ്ണത്തിലും വർധനവുണ്ട്. 2020 തദ്ദേശ തെരഞ്ഞെടുപ്പിൽ 2,76,56,910 വോട്ടർമാരാണുണ്ടായിരുന്നത്. വരുന്ന തദ്ദേശ തെരഞ്ഞെടുപ്പിൽ വോട്ടർമാരുടെ എണ്ണം 2,83,12,458 ആയി വർധിച്ചിട്ടുണ്ട്. 1,33,52,947 പുരുഷൻമാരും 1,49,59,235 സ്ത്രീകളും 276 ട്രാൻസ്‌ജെൻഡേഴ്‌സുമാണ് ഇത്തവണ വോട്ടർ പട്ടികയിലുള്ളത്. 

2020നേക്കാൾ 6,55,548 വോട്ടർമാർ തദ്ദേശപട്ടികയിൽ കൂടുതലുണ്ട്.വാർഡ് വിഭജനത്തിന് ശേഷമുള്ള വോട്ടർ പട്ടികയാണ് തെരഞ്ഞെടുപ്പ് കമ്മിഷൻ പ്രസിദ്ധീകരിച്ചത്. ലോക്‌സഭാ, നിയമസഭാ തെരഞ്ഞെടുപ്പ് വോട്ടർ പട്ടികയിൽ 2025 ഫെബ്രുവരിയിൽ 2,77,20,818 വോട്ടർമാരാണുള്ളത്.ഇത് പ്രകാരം തദ്ദേശ സ്ഥാപനങ്ങളിലേക്ക് 5,91,654 വോട്ടർമാരാണ് വർധിച്ചത്.

Kerala gears up for local body elections with 6.5 lakh first-time voters set to cast their votes. Electoral preparations in full swing across the state.