റിയാദ്: സഊദിയിലെ ലോജിസ്റ്റിക്സ് മേഖലയിൽ വമ്പൻ കുതിപ്പിന് തുടക്കമിട്ട് ജിദ്ദയിൽ രാജ്യത്തെ ആദ്യ ഡ്രോൺ പാഴ്‌സൽ ഡെലിവറി പരീക്ഷണം ആരംഭിച്ചു. ലോജിസ്റ്റിക്സ് മേഖലയും തപാൽ സേവനങ്ങളും നവീകരിക്കാനുള്ള സഊദി വിഷൻ 2030ന്റെ ഭാഗമായാണ് പുതിയ നീക്കം.

ഗതാഗത, ലോജിസ്റ്റിക്സ് വകുപ്പിന്റെ വൈസ് മന്ത്രിയും ഗതാഗത ജനറൽ അതോറിറ്റി (ടിജിഎ) ആക്ടിംഗ് പ്രസിഡന്റുമായ ഡോ. റുമൈഹ് അൽ-റുമൈഹിന്റെ മേൽനോട്ടത്തിലാണ് പരീക്ഷണം നടന്നത്. ജനറൽ അതോറിറ്റി ഓഫ് സിവിൽ ഏവിയേഷൻ (GACA) ഉം ടിജിഎയും ചേർന്നാണ് പദ്ധതി യാഥാർഥ്യമാക്കിയത്. 

"ഡ്രോൺ ഡെലിവറി സാങ്കേതികവിദ്യ ലോജിസ്റ്റിക്സിനെ മാറ്റിമറിക്കും. ഇത് ഡെലിവറി വേഗത്തിലാക്കുകയും സേവനങ്ങൾ വിപുലീകരിക്കുകയും രാജ്യത്തിന്റെ ഡിജിറ്റൽ പരിവർത്തന ലക്ഷ്യങ്ങളെ പിന്തുണയ്ക്കുകയും ചെയ്യും," ഡോ. അൽ-റുമൈഹ് ചടങ്ങിൽ പറഞ്ഞു.

ALSO READ: റിയാദ് മെട്രോ ഇനി രാവിലെ 5:30 മുതൽ തന്നെ ഓടിത്തുടങ്ങും | Riyadh Metro

GACAയുടെ എക്സിക്യൂട്ടീവ് വൈസ് പ്രസിഡന്റ് ക്യാപ്റ്റൻ സുലൈമാൻ അൽ-മുഹൈമിദി ഈ പരീക്ഷണത്തെ വ്യവസായത്തിന്റെ ഗതി മാറ്റുന്ന നേട്ടമെന്നാണ് വിശേഷിപ്പിച്ചത്. "ഡ്രോൺ ഡെലിവറികൾ കൂടുതൽ സുസ്ഥിരവും വഴക്കമുള്ളതുമായ പരിഹാരങ്ങൾ നൽകുന്നു. GACAയുടെ നിയമങ്ങൾ എല്ലാ ഡ്രോൺ പ്രവർത്തനങ്ങളും ആഗോള സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പാക്കും," അദ്ദേഹം വ്യക്തമാക്കി.

അന്താരാഷ്ട്ര സിവിൽ ഏവിയേഷൻ ഓർഗനൈസേഷന്റെയും (ICAO) യൂറോപ്യൻ യൂണിയൻ ഏവിയേഷൻ സേഫ്റ്റി ഏജൻസിയുടെയും (EASA) മാർഗനിർദേശങ്ങൾ പാലിക്കാൻ GACA അടുത്തിടെ വ്യോമയാന നിയമങ്ങൾ പുതുക്കിയിരുന്നു. ഇത് സഊദിയിൽ ഡ്രോണുകളുടെ സുരക്ഷിതമായ ഉപയോഗത്തിന് വഴിയൊരുക്കുമെന്നാണ് പ്രതീക്ഷിക്കുന്നത്.

saudi arabia has started testing parcel delivery using drones, a major step towards modernizing logistics and enhancing the kingdom’s vision for smart cities and futuristic transport.