കോട്ടയം: യെമൻ സ്വദേശി തലാൽ അബ്ദു മഹ്ദിയുടെ കൊലപാതകത്തിൽ വധശിക്ഷയ്ക്കു വിധിക്കപ്പെട്ട മലയാളി നഴ്സ് നിമിഷപ്രിയയുടെ മോചനത്തിനായുള്ള ശ്രമങ്ങൾ പുരോഗമിക്കുന്നതായി ചാണ്ടി ഉമ്മൻ എംഎൽഎ. മോചനവുമായി ബന്ധപ്പെട്ട ചർച്ചകൾക്കായി ഒരു സംഘം ഇന്ന് യെമനിൽ എത്തിയിട്ടുണ്ടെന്ന് ചാണ്ടി ഉമ്മൻ പറഞ്ഞു. ശുഭകരമായ വാർത്ത പ്രതീക്ഷിക്കുന്നതായി അദ്ദേഹം പ്രത്യാശ പ്രകടിപ്പിച്ചു.

ആരു ചർച്ച നടത്തിയാലും നല്ലതാണ് എന്നും ചാണ്ടി ഉമ്മൻ പറഞ്ഞു. എന്നാൽ നിമിഷ പ്രിയയുമായോ വധിക്കപ്പെട്ട തലാൽ അബ്ദു മഹ്ദിയുമായി ബന്ധപ്പെട്ട കേസിനെ സംബന്ധിച്ചുള്ളതോ ആയ സമൂഹമാധ്യമ പ്രതികരണങ്ങൾ ഒഴിവാക്കണമെന്നും ചാണ്ടി ഉമ്മൻ അഭ്യർത്ഥിച്ചു. തെറ്റായ സോഷ്യൽ മീഡിയ പ്രതികരണങ്ങളിൽ നേരത്തെ തലാലിന്റെ സഹോദരനും കുടുബവും അതൃപ്‍തി രേഖപ്പെടുത്തിയിരുന്നു. 

ALSO READ: നിമിഷപ്രിയ ആക്ഷന്‍ കൗണ്‍സിലിന് യമനിലേക്ക് പോകാന്‍ അനുമതി നിഷേധിച്ച് കേന്ദ്രം; നടപടി നയതന്ത്ര ബന്ധമില്ലെന്ന് ചൂണ്ടിക്കാട്ടി

നേരത്തെ, ജൂലൈ 16ന് നിമിഷ പ്രിയയുടെ വധശിക്ഷ നടപ്പാക്കും എന്നായിരുന്നു വിവരം. എന്നാൽ വിഷയത്തിൽ ഉണ്ടായ ഇടപെടലുകളെ തുടർന്ന് നീട്ടിവച്ചിരുന്നു. നിലവിൽ വധശിക്ഷ ഒഴിവാക്കണമെന്നാണ് നിമിഷ പ്രിയയുടെയും കുടുംബത്തിന്റെയും മലയാളികളുടെയും ആവശ്യം .

എന്താണ് നിമിഷപ്രിയ കേസ് 

പാലക്കാട് സ്വദേശിയാണ് നഴ്സ് ആയനിമിഷപ്രിയ. 2008ൽ യെമനിലേക്ക് എത്തിയ നിമിഷ പ്രിയ, പിന്നീട് തലാലുമായി ചേർന്ന് സ്വന്തമായി ഒരു ക്ലിനിക്ക് ആരംഭിച്ചു. അവരുടെ പാസ്‌പോർട്ട് കൈവശം വച്ചിരുന്ന ബിസിനസ് പങ്കാളി കൂടിയായ തലാലിനെ 2017ൽ കൊലപ്പെടുത്തിയെന്നതാണ് കേസ്.