മംഗളൂരു: ബലാത്സംഗത്തിന് ഇരയായ യുവതിയുടെ നവജാതി ശിശുവിനെ നാലര ലക്ഷം രൂപയ്ക്ക് വിറ്റ സംഭവത്തില്‍ ദുര്‍ഗാവാഹിനി നേതാവുള്‍പ്പെടെ മൂന്ന് പേര്‍ അറസ്റ്റില്‍. ഡോ. സോമേഷ് സോളമന്‍, ദുര്‍ഗാവാഹിനി നേതാവ് വിജയലക്ഷ്മി, നവനീത് നാരായണ്‍ എന്നവരെയാണ് ഷിര്‍വ പൊലിസ് അറസ്റ്റ് ചെയ്തത്. 

മംഗളൂരുവില്‍ പേയിങ് ഗസ്റ്റ് സ്ഥാപനം നടത്തുകയാണ് ദുര്‍ഗാവാഹിനി നേതാവ് വിജയലക്ഷ്മി. പിടിയിലായ നവനീത് നാരായണ്‍ (25) ആണ് പെണ്‍കുട്ടിയെ പീഡിപ്പിച്ച് ഗര്‍ഭിണിയാക്കിയതെന്ന് പൊലിസ് പറഞ്ഞു. വിജയ ലക്ഷ്മിയും, പ്രതികളും ചേര്‍ന്ന് ഷിര്‍വയിലെ കല്ലുഗുഡ്ഡെയില്‍ നിന്നുള്ള മക്കളില്ലാത്ത രമേശ് മൗല്യ-പ്രഭാവതി ദമ്പതികള്‍ക്കാണ് കുഞ്ഞിനെ വിറ്റത്. ദമ്പതികളുടെ ബന്ധുവായ പ്രിയങ്കയെന്ന യുവതിയാണ് വിജയലക്ഷ്മിയെ പരിചയപ്പെടുത്തിയത്. 

വിജയലക്ഷ്മി തന്റെ പിജി താമസ സ്ഥലത്ത് ജോലി ചെയ്യുന്ന അവിവാഹിതയായ സ്ത്രീയുടെ കുഞ്ഞിനെ അവര്‍ക്ക് നല്‍കാമെന്ന് വാഗ്ദാനം ചെയ്തു. ആഗസ്റ്റ് മൂന്നിനാണ് മംഗളുരുവിലെ കൊളാസോ ആശുപത്രിയില്‍ യുവതി പ്രസവിച്ചത്. പ്രസവശേഷം വിജയലക്ഷ്മിയും, ഡോ സുമേഷും ചേര്‍ന്ന് കുഞ്ഞിനെ 4.5 ലക്ഷം രൂപക്ക് ദമ്പതികള്‍ക്ക് കൈമാറുകയായിരുന്നു. ശേഷം ദമ്പതികള്‍ കുഞ്ഞിനെ അംഗണവാടി കേന്ദ്രത്തില്‍ രജിസ്റ്റര്‍ ചെയ്യാന്‍ ശ്രമിച്ചപ്പോഴാണ് സംഭവം പുറത്തായത്. ദമ്പതികള്‍ക്ക് കുട്ടികളില്ലെന്ന് അറിയാവുന്ന ജീവനക്കാര്‍ സംശയം തോന്നി പൊലിസില്‍ അറിയിക്കുകയായിരുന്നു. 

ALSO READ: റെയിൽവേയുടെ സർപ്രൈസ് ഓണസമ്മാനം: തിരുവനന്തപുരം-മംഗലാപുരം വന്ദേ ഭാരത് ഇനി 20 കോച്ചുകളുമായി സുഗമയാത്ര 

തുടര്‍ന്ന് നടത്തിയ അന്വേഷണത്തിലാണ് ഞെട്ടിക്കുന്ന വിവരങ്ങള്‍ പുറത്തായത്. കൂടുതല്‍ അന്വേഷണത്തില്‍ നവനീത് നാരായണ്‍ പെണ്‍കുട്ടിയെ ലൈംഗികമായി പീഡിപ്പിച്ച് ഗര്‍ഭിണിയാക്കിയതാണെന്നും കണ്ടെത്തി. ഇതെല്ലാം അറിഞ്ഞിട്ടും ദുര്‍ഗാവാഹിനി നേതാവും, ഡോക്ടറും കുറ്റകൃത്യത്തിന് കൂട്ടുനില്‍ക്കുകയായിരുന്നു. വിജയലക്ഷ്മിക്ക് നിരവധി സംഘടനകളുമായി ബന്ധമുണ്ടെന്നും, മംഗളൂരുവില്‍ ഒരു ആശുപത്രി കാന്റീന് നടത്തുന്നുണ്ടെന്നും എസ്പി ശങ്കര്‍ വെളിപ്പെടുത്തി.

Three people, including a Durga Vahini leader, have been arrested for selling the newborn baby of a young woman who was a rape victim for ₹4.5 lakhs