തിരുവനന്തപുരം: കൂറുമാറിയതിന് അങ്കമാലി നഗരസഭയിലെ നാലു മുന്‍ കൗണ്‍സിലര്‍മാരെ സംസ്ഥാന തെരഞ്ഞെടുപ്പ് കമ്മിഷണര്‍ വി ഭാസ്‌കരന്‍ അയോഗ്യരാക്കി. കോണ്‍ഗ്രസ് പ്രതിനിധികളായ എല്‍.സി ആന്റണി, സി.കെ വര്‍ഗീസ്, മേരി സിറിയക്, ജി.ബി ജയ എന്നിവരെയാണ് അയോഗ്യരാക്കിയത്.
2014ല്‍ ചെയര്‍മാന്‍ സ്ഥാനത്തേക്ക് നടന്ന തെരഞ്ഞെടുപ്പില്‍ പാര്‍ട്ടി വിപ്പ് ലംഘിച്ചതിനെതിരേ കൗണ്‍സിലര്‍മാരായ പൗലൂസ്, മീര അവറാച്ചന്‍ എന്നിവര്‍ സംസ്ഥാന തെരഞ്ഞെടുപ്പ് കമ്മിഷന് സമര്‍പ്പിച്ച ഹരജിയിലാണ് തീരുമാനം. കൂറുമാറ്റ നിരോധന നിയമപ്രകാരം 2016 സെപ്തംബര്‍ ഏഴു മുതല്‍ ആറു വര്‍ഷത്തേക്ക് നഗരസഭാ അംഗമായി തുടരുന്നതില്‍നിന്നും തദ്ദേശഭരണ സ്ഥാപനങ്ങളിലേക്കുളള തെരഞ്ഞെടുപ്പില്‍ മത്സരിക്കുന്നതില്‍നിന്നും കമ്മിഷന്‍ ഇവരെ വിലക്കിയിട്ടുണ്ട്. സ്വതന്ത്രനായി വിജയിച്ച വിത്സണ്‍ മുണ്ടാടനെതിരായ പരാതി കമ്മിഷന്‍ തള്ളി.