മലപ്പുറം: സ്‌നേഹ വസന്തത്തിന്റെ പ്രഭയിൽ ഇന്ന് 1500ാം നബിദിനം. വിശ്വവിമോചകൻ മുഹമ്മദ് നബി (സ)യുടെ തിരുപ്പിറവിയുടെ സന്തോഷനിമിഷത്തിൽ ഇന്ന് ലോകം പ്രവാചക പ്രകീർത്തനങ്ങളിൽ മുഴുകും. റബീഉൽ അവ്വൽ 12നാണ് നബിദിനം. പ്രവാചക പ്രകീർത്തനങ്ങളാൽ മുഖരിതമായ ആഘോഷപ്പൊലിമയിൽ ഇന്ന് കേരളത്തിലും നബിദിനം ആഘോഷിക്കും. നബിദിനത്തെ വരവേൽക്കാൻ പള്ളികളും മദ്‌റസകളും വീട്ടകങ്ങളും തെരുവോരങ്ങളും അലങ്കാരങ്ങളാൽ അണിഞ്ഞൊരുങ്ങിയിട്ടുണ്ട്. സുബ്ഹിയോടടുത്തുള്ള പ്രവാചകപ്പിറവി സമയത്ത് മസ്ജിദുകളും മദ്‌റസകളും കേന്ദ്രീകരിച്ചുള്ള മൗലിദ് പാരായണത്തോടെയാണ് ആഘോഷങ്ങൾക്കു തുടക്കമാവുക. പ്രവാചകരുടെ പേരിൽ സ്വലാത്തുകൾക്ക് ഏറെ പുണ്യം ലഭിക്കുന്ന വെള്ളിയാഴ്ചയിലാണ് ഇത്തവണ നബിദിനവും കടന്നുവന്നത്.

ആഘോഷത്തിന്റെ ഭാഗമായി ഇന്ന് പള്ളികളിൽ പ്രകീർത്തന സദസുകളിൽ പ്രവാചകരുടെ അപദാനങ്ങൾ വാഴ്ത്തുകയും സ്വലാത്തും സലാമും ചൊല്ലി പ്രത്യേക പ്രാർഥനാ സദസ് സംഘടിപ്പിച്ചുമാണ് നബിദിന നാളിനു വരവേൽപു നൽകുന്നത്.
 
മഹല്ല് തലങ്ങളിൽ മൗലിദ് മജ്ലിസ്, കുടുംബങ്ങളിലേക്ക് നബിദിന സ്മൃതിയിൽ ഭക്ഷണ വിതരണം എന്നിവ നടക്കും. മദ്റസകൾ, പള്ളിദർസുകൾ, ശരീഅത്ത് കോളജുകൾ തുടങ്ങി സ്ഥാപനങ്ങളുടെ നേതൃത്വത്തിൽ വിദ്യാർഥികളുടെയും രക്ഷിതാക്കളുടേയും മഹല്ല് നിവാസികളുടേയും നേതൃത്വത്തിൽ മീലാദ് ഘോഷയാത്രയും തുടർന്ന് വിദ്യാർഥികളുടെ വിവിധ കലാപരിപാടികളും നടക്കും. സമസ്തയുടെയും പോഷകസംഘടനകളുടെയും നേതൃത്വത്തിൽ വിവിധ ഘടകങ്ങളിലായി മീലാദ് റാലി, മൗലിദ് പാരായണ സദസ്, ഇശ്ഖ് മജ്ലിസ്,നബിദിന സമ്മേളനം എന്നിവ സംഘടിപ്പിച്ചിട്ടുണ്ട്. ശാന്തിയുടേയും സ്‌നേഹത്തിന്റേയും പ്രവാചക സന്ദേശങ്ങളെ ലോകത്തിന് കൈമാറ്റം ചെയ്യുകയാണ് നബിദിനാഘോഷം. 1500ാം ജന്മദിനമായതുകൊണ്ടുതന്നെ റബീഉൽ അവ്വൽ പിറകണ്ടതുമുതൽ മുസ്്‌ലിംലോകത്തു വിവിധങ്ങളായ ആഘോഷപരിപാടികളാണ് നടന്നുവരുന്നത്.

A day to celebrate love and joy, marking the birth of a cherished soul, embraced by the world's song of affection