മലപ്പുറം: വിദേശ രാജ്യങ്ങളിൽ കാൽലക്ഷത്തോളം പ്രവാസികളുണ്ടെങ്കിലും തദ്ദേശ തെരഞ്ഞെടുപ്പിൽ വോട്ട് ചേർത്തത് 2,087 പേർ മാത്രം. മതിയായ അവബോധമില്ലാത്തതിനാലാണ് വോട്ട് ചേർത്താൻ പ്രവാസികൾ തുനിയാത്തതെന്നാണ് ഉദ്യോഗസ്ഥർ പറയുന്നത്. തദ്ദേശ സ്ഥാപനങ്ങളിലേക്കുള്ള അന്തിമ വോട്ടർ പട്ടികയിൽ 2,087 പേർ മാത്രമാണ് പ്രവാസി വോട്ടർമാരായുള്ളത്.ഏറ്റവും കൂടുതൽ പ്രവാസികളുള്ള മലപ്പുറം ജില്ലയിൽ പ്രവാസി വോട്ട് ചേർത്തത് 297 പേർ മാത്രമാണ്. കോഴിക്കോട് ജില്ലയിൽ 902 പേരും. കണ്ണൂരിൽ 351, തൃശൂർ 157, തിരുവന്തപുരം 29, കൊല്ലം 42, പത്തനംതിട്ട 41, ആലപ്പുഴ 49, കോട്ടയം 37, ഇടുക്കി 7, എറണാകുളം 71, പാലക്കാട് 37, വയനാട് 10, കാസർകോട് 57 പ്രവാസികളുമാണ് തദ്ദേശ അന്തിമ വോട്ടർ പട്ടികയിൽ ഉൾപ്പെട്ടത്.

പ്രവാസികൾക്ക് വിദേശത്ത് നിന്നും വോട്ട് ചേർത്ത് പട്ടികയിൽ ഇടംപിടിക്കാൻ അവസരം നൽകിയിരുന്നു. ഇവർ ആദ്യം ഓൺലൈൻ അപേക്ഷയാണ് നൽകേണ്ടിയിരുന്നത്. ശേഷം അതത് തദ്ദേശ സ്ഥാപനങ്ങളിലെ ഇലക്ടറൽ രജിസ്‌ട്രേഷൻ ഓഫിസർമാർക്ക് ബന്ധപ്പെട്ട രേഖകൾ സ്വയം സാക്ഷ്യപ്പെടുത്തി രജിസ്റ്റേർഡായോ നേരിട്ടോ നൽകണം. ഓൺലൈൻ അപേക്ഷ, പാസ്‌പോർട്ടിന്റെ കോപ്പി, വിസയുടെ കോപ്പി എന്നിവയാണ് സ്വയം സാക്ഷ്യപ്പെടുത്തി നൽകേണ്ടത്. ഈ അപേക്ഷകളിലെ മേൽവിലാസത്തിൽ ഇലക്ടറൽ രജിസ്‌ട്രേഷൻ ഓഫിസർ പരിശോധന നടത്തിയാൽ തന്നെ ഇവർ പ്രവാസി വോട്ടർ പട്ടികയിൽ ഉൾപ്പെടും.
 
എന്നാൽ പലരും ഓൺലൈൻ അപേക്ഷ നൽകിയെങ്കിലും സമയത്തിന് രേഖകൾ ഹാജരാക്കിയില്ല. ഇതോടെയാണ് വോട്ടർ പട്ടികയിൽ നിന്ന് പുറത്തായത്. പ്രവാസി വോട്ട് ചേർത്തവർ നാട്ടിലില്ലെങ്കിലും പട്ടികയിൽ നിന്ന് പുറത്താവില്ല. എന്നാൽ പ്രവാസി വോട്ടല്ലാതെ ചേർത്ത ഒരാൾ പിന്നീട് വിദേശത്ത് പോയാൽ ഹിയറിങ് സമയത്ത് സ്ഥലത്തില്ലെന്ന കാരണത്താൽ പട്ടികയിൽ നിന്ന് പുറത്താകും. ഈ ആനുകൂല്യമടക്കം ലഭിച്ചിട്ടും പ്രവാസികൾ വോട്ട് ചേർക്കുന്നതിൽ പിന്നിലാണ്. ഏറ്റവും ഒടുവിൽ പുറത്തുവന്ന കേരള മൈഗ്രേഷൻ സർവേ റിപ്പോർട്ട് പ്രകാരം വിവിധ രാജ്യങ്ങളിലായി 22 ലക്ഷം മലയാളികൾ തൊഴിലെടുക്കുന്നുണ്ട്. അനൗദ്യോഗികമായി പ്രവാസികളുടെ എണ്ണം ഇതിലും കൂടും. ഗൾഫ് രാജ്യങ്ങളിലാണ് കേരളത്തിലെ പ്രവാസികൾ ഏറെയും വസിക്കുന്നത്.

Over 2.2 million expatriates reside abroad, but only 2,087 are registered as expatriate voters.