ന്യൂഡല്‍ഹി: രാഹുല്‍ ഗാന്ധിയുടെ നേതൃത്വത്തില്‍ പ്രതിപക്ഷം വോട്ട് ചോരി പ്രചാരണം ശക്തമാക്കിയതോടെ അല്‍പം ഭീതിയിലായിരിക്കുകയാണ് ബി.ജെ.പി.പ്രതിപക്ഷനേതാവ് രാഹുല്‍ ഗാന്ധിയുടെ 'വോട്ടര്‍ അധികാര്‍ യാത്ര' സമാപിച്ചതിന് പിന്നാലെ കേന്ദ്ര ആഭ്യന്തര മന്ത്രി അമിത് ഷാ ബിഹാറില്‍ പ്രത്യേക ഉന്നതതതല യോഗം വിളിച്ചു. ഷായുടെ ഔദ്യോഗിക വസതിയിലാണ് യോഗം. രാഹുലിന്റെ വോട്ട്ചോരി പ്രചാരണം ജനങ്ങളില്‍ വലിയ സ്വാധീനമുണ്ടാക്കിയെന്ന് ബി.ജെ.പി നേതാക്കള്‍ വിലയിരുത്തുന്നു. ഇതിനെതിരെ മറുപ്രചാരണവുമായി ജനങ്ങളിലേക്ക് ഇറങ്ങാനനാണ് പാര്‍ട്ടി തീരുമാനം.

രാഹുല്‍ ഗാന്ധിയുടെ യാത്ര വോട്ടുകൊള്ളയെ കുറിച്ച് ജനങ്ങളില്‍ ഉണ്ടാക്കിയ ആശയക്കുഴപ്പമാണ് യോഗം പ്രാഥമികമായി ചര്‍ച്ച ചെയ്തത്. അത് ഇല്ലാതാക്കാന്‍ ജനങ്ങളിലേക്കിറങ്ങുമെന്നും മണ്ഡലംതോറും പരിപാടികള്‍ സംഘടിപ്പിക്കുമെന്നും ബി.ജെ.പി ബിഹാര്‍ സംസ്ഥാന പ്രസിഡന്റ് ദിലീപ് ജയ്സ്വാള്‍ പറഞ്ഞു.

ഭരണഘടന വ്യവസ്ഥകള്‍ പ്രകാരമാണ് വോട്ടര്‍പട്ടിക തീവ്ര പരിശോധന (എസ്ഐആര്‍) നടത്തുന്നതെന്ന് ജനങ്ങളെ ബോധ്യപ്പെടുത്തുമെന്ന് മറ്റൊരു മുതിര്‍ന്ന നേതാവ് പ്രതികരിച്ചു. നവംബര്‍ 20 വരെ തെരഞ്ഞെടുപ്പ് പ്രചാരണം നടത്തേണ്ടിവരുമെന്നാണ് കേന്ദ്ര നേതൃത്വം സംസ്ഥാന നേതാക്കളെ അറിയിച്ചിരിക്കുന്നത്. യാത്രയിലെ പ്രചാരണങ്ങളെ നേരിടാന്‍ 98 അംഗസംഘത്തെ പാര്‍ട്ടി സജ്ജമാക്കിയിട്ടുണ്ട്. ഈ നേതാക്കള്‍ സംസ്ഥാന വ്യാപകമായി വാര്‍ത്താസമ്മേളനങ്ങളും കോര്‍ണര്‍ യോഗങ്ങളും പ്രവര്‍ത്തകരുടെ കൂട്ടായ്മകളും സംഘടിപ്പിച്ച് നിലപാട് വിശദീകരിക്കും.

രാഹുല്‍ ഗാന്ധിയുടെ യാത്രക്കെത്തിയവര്‍ പ്രധാനമന്ത്രിയുടെ അമ്മയെ അപമാനിച്ചുവെന്ന ആരോപണം സജീവമാക്കിയാണ് വോട്ട്ചോരി ആരോപണത്തെ നേരിടുന്നതെന്നും റിപ്പോര്‍ട്ടുകള്‍ ചൂണ്ടിക്കാട്ടുന്നു. ബിജെപി ദേശീയ അധ്യക്ഷന്‍ ജെ.പി നദ്ദ, ബിഹാറിന്റെ ചുമതലയുള്ള ദേശീയ ജനറല്‍ സെക്രട്ടറി വിനോദ് താവ്ഡെ, സഹ ചുമതലയുള്ള ദീപക് പ്രകാശ്, ഉപ മുഖ്യമന്ത്രിമാരായ വിജയ് സിന്‍ഹ, സാമ്രാട്ട് ചൗധരി തുടങ്ങിയവരാണ് യോഗത്തില്‍ പങ്കെടുത്തത്.

ALSO READ: തിരുവോണ ദിനത്തിൽ 'കൊലച്ചോറ് സമര'വുമായി യൂത്ത് കോൺഗ്രസ്; തൃശ്ശൂർ ഡിഐജി ഓഫീസിന് മുന്നിൽ പ്രതിഷേധം
ബിഹാര്‍ നിയമസഭാ തെരഞ്ഞെടുപ്പിന്റെ ഔദ്യോഗിക ഷെഡ്യൂള്‍ ഇന്ത്യന്‍ തെരഞ്ഞെടുപ്പ് കമ്മീഷന്‍ ഇതുവരെ പ്രഖ്യാപിച്ചിട്ടില്ല. അതേസമയം, തെരഞ്ഞെടുപ്പ് ഈ വര്‍ഷം ഒക്ടോബറിലോ നവംബറിലോ നടക്കുമെന്നാണ് പ്രതീക്ഷിക്കുന്നത്.  243 അംഗങ്ങളുള്ള നിലവിലെ ബീഹാര്‍ നിയമസഭയില്‍, നാഷണല്‍ ഡെമോക്രാറ്റിക് അലയന്‍സില്‍ (എന്‍ഡിഎ) 131 അംഗങ്ങളാണുള്ളത്, ബിജെപിക്ക് 80 എംഎല്‍എമാരും, ജെഡിയുവിന് 45 പേരും, എച്ച്എഎം (എസ്) ന് 4 പേരും, 2 സ്വതന്ത്ര സ്ഥാനാര്‍ത്ഥികളുടെ പിന്തുണയും ഉണ്ട്.

പ്രതിപക്ഷത്തിന്റെ ഇന്ത്യാ ബ്ലോക്കില്‍ 111 അംഗങ്ങളാണുള്ളത്, ആര്‍ജെഡി 77 കോണ്‍ഗ്രസ് 19 സിപിഐ (എംഎല്‍) 11 സിപിഐ (എം) 2 സിപിഐ 2 എന്നിങ്ങനെയാണ് പ്രതിപക്ഷ എം.എല്‍.എമാര്‍.

amit shah convenes a crucial high-level meeting in bihar following rahul gandhi's 'voter rights yatra', as bjp worries about the political backlash from the vote fraud allegations campaign.