മുംബൈ: അനധികൃത ഖനനത്തിനെതിരെ നടപടിയെടുക്കാനെത്തിയ വനിതാ ഐ.പി.എസ് ഉദ്യോഗസ്ഥയെ ഭീഷണിപ്പെടുത്തി മഹാരാഷ്ട്ര ഉപമുഖ്യമന്ത്രി അജിത് പവാര്‍. അജിത് പവാര്‍ വനിതാ ഐ.പി.എസ് ഉദ്യോഗസ്ഥയെ 'ഭീഷണിപ്പെടുത്തുന്നതിന്റെ' വീഡിയോ പുറത്തു വന്നതിന് പിന്നാലെ രൂക്ഷ വിമര്‍ശനവും ഉയര്‍ന്നു. 

സോളാപൂരിലെ കര്‍മല ഗ്രാമത്തില്‍ അനധികൃത മണ്ണ് ഖനനം നടത്തുന്നതിനെതിരെ നടപടിയെടുത്തതാണ് അജിത് പവാറിനെ ചൊടിപ്പിച്ചത്. മണ്ണെടുപ്പിനെതിരെ നാട്ടുകാര്‍ പ്രതിഷേധിച്ചതിനെത്തുടര്‍ന്ന് പൊലിസ് സേനയുമായി അഞ്ജലി സ്ഥലത്തെത്തുകയായിരുന്നു. സോളാപൂരിലെ കര്‍മ്മല ഡെപ്യൂട്ടി സൂപ്രണ്ട് (ഡി.എസ്.പി) അഞ്ജലി കൃഷ്ണയെ അജിത് പവാര്‍ ഫോണില്‍ വിളിച്ച് സംസാരിച്ചു. മറ്റൊരാളുടെ ഫോണില്‍ നിന്നാണ് അഞ്ജലിയെ അജിത് വിളിച്ചത്. പവാര്‍ അഞ്ജലിയെ വിളിച്ച് താക്കീത് ചെയ്യുന്നത് പുറത്തു വന്ന ദൃശ്യങ്ങളില്‍ വ്യക്തമാണ്. 

പൊലിസ് നടപടി നിര്‍ത്താന്‍ പവാര്‍ ഡി.എസ്.പിയോട് നിര്‍ദേശിക്കുന്നത് വിഡിയോയില്‍ കേള്‍ക്കാം. ''ഉപമുഖ്യമന്ത്രിയുടെ ഉത്തരവനുസരിച്ചാണ് നടപടി നിര്‍ത്തിയതെന്ന് തഹസില്‍ദാറോട് പറയൂ'' -കൃഷ്ണയോട് പവാര്‍ പറഞ്ഞു. എന്നാല്‍, 'ആരാണ് ഫോണില്‍ സംസാരിക്കുന്നതെന്ന് എനിക്ക് എങ്ങനെ അറിയാന്‍ കഴിയും' -എന്നാണ് അഞ്ജലി തിരിച്ച് ചോദിക്കുന്നത്. 'എന്റെ നമ്പറില്‍ നേരിട്ട് വിളിക്കൂ' എന്നും ഡി.എസ്.പി പറഞ്ഞു.

ഈ മറുപടി കേട്ടതോടെ പവാര്‍ കോപാകുലനായി. 'നിനക്ക് ഇത്ര ധൈര്യമുണ്ടോ ഞാന്‍ നിനക്കെതിരെ നടപടിയെടുക്കും. ഞാന്‍ നിന്നോട് സംസാരിക്കുമ്പോള്‍ നേരിട്ട് വിളിക്കാന്‍ ആവശ്യപ്പെടുകയാണോ നിനക്ക് എന്നെ കാണണോ എന്റെ നമ്പര്‍ എടുത്ത് വാട്ട്സ്ആപ്പ് കോള്‍ ചെയ്യൂ. നിനക്കെങ്ങനെ ധൈര്യം വന്നു' -പവാര്‍ കടുത്ത സ്വരത്തില്‍ പറഞ്ഞു.

വെള്ളിയാഴ്ച ഒരു രാഷ്ട്രീയ വിവാദത്തിന് കാരണമായി. ശിവസേന (ഉദ്ധവ് ബാലാസാഹേബ് താക്കറെ) അദ്ദേഹത്തിന്റെ രാജി ആവശ്യപ്പെട്ടു. ഭരണസഖ്യത്തിലെ അംഗങ്ങള്‍ അദ്ദേഹം 'സാധാരണ സ്വരത്തില്‍' സംസാരിച്ചതായി പറഞ്ഞെങ്കിലും.

മലയാളിയായ അഞ്ജലി കൃഷ്ണ 2022-23 യു.പി.എസ്.സി സിവില്‍ സര്‍വിസസ് ബാച്ച് ഉദ്യോഗസ്ഥയാണ്. UPSC CSE യില്‍ AIR355 റാങ്ക് നേടിയാണ് സര്‍വിസില്‍ പ്രവേശിച്ചത്. പിതാവ് തിരുവനന്തപുരത്ത് ബിസിനസുകാരനാണ്.

അജിത് പവാറിനെതിരെ കടുത്ത വിമര്‍ശനമാണ് ഉയരുന്നത്. അജിത് രാജി വെക്കണമെന്ന് ശിവസേനാ നേതാവ് ഉദ്ദവ് താക്കറെ ആവശ്യപ്പെട്ടു. എന്നാല്‍ അജിത് നല്ല നിലക്കാണ് സംസാരിച്ചതെന്നാണ് ബി.ജെ.പിയുടെ ന്യായീകരണം.  

ALSO READ: വോട്ട്ചോരി പ്രചാരണം തിരിച്ചടിക്കുമെന്ന് ആശങ്ക,  രാഹുലിന്റെ  'വോട്ടര്‍ അധികാര്‍ യാത്ര'ക്ക് പിന്നാലെ ബിഹാറില്‍ ഉന്നതതല യോഗം വിളിച്ച് അമിത് ഷാ  

maharashtra deputy chief minister allegedly threatens ips officer who intervened in illegal sand mining activities. bjp responds with justification after controversy erupts.