വെടിനിര്‍ത്തലിന് തയ്യാറാണെന്ന ഹമാസിന്റെ നിലപാട് തള്ളി ഗസ്സയില്‍ ആക്രമണം ശക്തമായി തുടര്‍ന്ന് ഇസ്‌റാഈല്‍. ഗസ്സ സിറ്റിയില്‍ ശക്തമായ ആക്രമണം നടത്തിയ ഇസ്‌റാഈല്‍ യുദ്ധ വിമാനങ്ങള്‍ സിറ്റിയിലെ ഉയരം കൂടിയ ബഹുനില കെട്ടിടമായ മുസ്തഹ ടവര്‍ പൂര്‍ണമായും തകര്‍ത്തു. ഒരു നിമിഷം കൊണ്ട് ടവര്‍ പൂര്‍ണമായി നിലം പൊത്തുന്നതിന്റെ വീഡിയോകള്‍ പുറത്തു വന്നിട്ടുണ്ട്. 

ഗസ്സയില്‍ നരകത്തിന്റെ വാതില്‍ തുറന്നെന്നാണ് ആക്രമണത്തിന് പിന്നാലെ ഇസ്‌റാഈല്‍ പ്രതിരോധ മന്ത്രി പ്രതികരിച്ചത്. ഇത്തരത്തില്‍ ബാക്കിയുള്ള കെട്ടിടങ്ങള്‍ കൂടി തകര്‍ക്കുമെന്നും മന്ത്രി കൂട്ടിച്ചേര്‍ത്തു. വെള്ളിയാഴ്ച മാത്രം 44 ഫലസ്തീനികളാണ് ഇസ്‌റാഈല്‍ ആക്രമണങ്ങളില്‍ കൊല്ലപ്പെട്ടത്. അതില്‍ ഏഴ് പേര്‍ കുഞ്ഞുങ്ങളാണ്. 

The moment Israeli fighter jets showered the Mushtaha Tower in Gaza City with missiles this afternoon, reducing it to rubble and displacing hundreds of its residents as well as many others who had sought refuge nearby. pic.twitter.com/6d1Ip3FU1X

— Quds News Network (@QudsNen) September 5, 2025

ഗസ്സ നഗരത്തിന്റെ 40 ശതമാനവും ഇപ്പോള്‍ തങ്ങളുടെ നിയന്ത്രണത്തിലാണെന്നാണ് ഇസ്‌റാഈല്‍ സൈന്യം അവകാശപ്പെുന്നത്. വീടുകളും ക്യാംപുകളും ഉള്‍പെടെ ആക്രമണം വ്യാപിച്ചിരിക്കുകയാണ് ഇസ്‌റാഈല്‍. നിലവിലെ സാഹചര്യം 'ചിന്തിക്കാന്‍ പോലും കഴിയാത്തതാണ്' എന്ന് UN children’s fund (യുണിസെഫ്) ചൂണ്ടിക്കാട്ടി. 

ഇസ്‌റാഈല്‍ നടത്തിയ ആക്രമണങ്ങളില്‍ കൊല്ലപ്പെട്ട പലസ്തീനികളില്‍ കുറഞ്ഞത് 30 ശതമാനമെങ്കിലും കുട്ടികളാണെന്ന് ഗസ്സ ആരോഗ്യ മന്ത്രാലയത്തിന്റെ അറിയിപ്പില്‍ പറയുന്നു. 2023 ഒക്ടോബര്‍ മുതല്‍ പ്രതിദിനം 28 കുട്ടികള്‍ വീതം കൊല്ലപ്പെടുന്നുവെന്നും മന്ത്രാലയത്തിന്റെ റിപ്പോര്‍ട്ടില്‍ വ്യക്തമാക്കുന്നു. 

ALSO READ: ഗസ്സയില്‍ സ്വതന്ത്രഭരണകൂടം ഉള്‍പെടെ നിര്‍ദ്ദേശങ്ങള്‍ അംഗീകരിക്കാന്‍ തയ്യാറെന്ന് ഹമാസ്;  തങ്ങള്‍ മുന്നോട്ടുവെച്ച നിബന്ധനകള്‍ അംഗീകരിച്ചാല്‍ വെടിനിര്‍ത്തലെന്ന് ഇസ്‌റാഈല്‍, കൂട്ടക്കൊലകള്‍ തുടരുന്നു

ഗസ്സയുടെ നിയന്ത്രണത്തിനായി ഒരു സ്വതന്ത്ര ഭരണകൂടം രൂപീകരിക്കുന്നതിന് തയാറാണെന്നും എല്ലാ ബന്ദികളെയും മോചിപ്പിക്കുന്ന സമഗ്രമായ വെടിനിര്‍ത്തലിന് സമ്മതമാണെന്നും കഴിഞ്ഞ ദിവസം ഹമാസ് അറിയിച്ചിരുന്നു. പ്രസ്താവനയിലൂടെയാണ് ഹമാസ്  നിലപാട് വ്യക്തമാക്കിയത്. ഇസ്റാഈല്‍ കനത്ത ആക്രമണം തുടരുന്ന സാഹചര്യത്തില്‍ ഗസ്സയില്‍ യു.എന്‍ ഇടപെടണമെന്നും ഹമാസ് ആവശ്യപ്പെട്ടു. വെടിനിര്‍ത്തലിന് തങ്ങള്‍ തയാറാണെന്നും ഹമാസ് പറഞ്ഞു. ഗസ്സയിലെ ഇസ്റാഈലിന്റെ വംശഹത്യ അവസാനിപ്പിക്കാന്‍ അന്താരാഷ്ട്ര സമൂഹം രംഗത്തു വരണമെന്നും ഹമാസ് ആവശ്യപ്പെട്ടു.എന്നാല്‍  യുദ്ധം അവസാനിപ്പിക്കാനായി ഇസ്റാഈല്‍ മന്ത്രിസഭ നിശ്ചയിച്ച വ്യവസ്ഥകള്‍ പാലിക്കണമെന്നാണ് ഇസ്റാഈലിന്റെ നിലപാട്.