ദുബൈ: പൂര്‍ണ ചന്ദ്രഗ്രഹണം ദൃശ്യമാകുന്ന ഇന്ന് (സെപ്റ്റംബര്‍ 7) ഗ്രഹണ നിസ്‌കാരം നിര്‍വഹിക്കാന്‍ ആഹ്വാനംചെയ്ത് യുഎഇ മതകാര്യമന്ത്രാലയം. പ്രവാചകന്‍ മുഹമ്മദ് നബി (സ) യുടെ പാരമ്പര്യം പിന്തുടര്‍ന്നും പ്രപഞ്ച സംഭവങ്ങളില്‍ നിര്‍ദ്ദേശിക്കപ്പെട്ട പ്രാര്‍ത്ഥനകള്‍ അനുഷ്ഠിക്കണമെന്ന പാരമ്പര്യം പാലിച്ചും ഇന്ന് വൈകുന്നേരം ഗ്രഹണ നിസ്‌കാരം നിര്‍വഹിക്കാനാണ് യുഎഇ ഇസ്ലാമിക മതകാര്യ മന്ത്രാലം ആഹ്വാനംചെയ്തത്. ഏഴ് വര്‍ഷത്തിനു ശേഷമുള്ള ആദ്യത്തെ പൂര്‍ണ്ണ ചന്ദ്രഗ്രഹണത്തിന് യുഎഇ ഇന്ന് സാക്ഷ്യംവഹിക്കാനിരിക്കെയാണ് മന്ത്രാലയത്തിന്റെ നടപടി. ഗ്രഹണം ഭാഗികമായോ പൂര്‍ണ്ണമായോ ആകട്ടെ, ഗ്രഹണ നിസ്‌കാരം നിര്‍ബന്ധമായ എല്ലാ പുരുഷന്മാര്‍ക്കും സ്ത്രീകള്‍ക്കും ശുപാര്‍ശ ചെയ്യുന്നതായി യുഎഇ കൗണ്‍സില്‍ ഫോര്‍ ഫത്‌വ പ്രസ്താവിച്ചു.

ഗ്രഹണ നിസ്‌കാരത്തിന്റെ രൂപം

ഗ്രഹണ നിസ്‌കാരം നിര്‍വഹിക്കുന്നു എന്ന് കരുതുക. 
തക്ബീറത്തുല്‍ ഇഹ്‌റാമിനു ശേഷം ഫാതിഹ ഓതി റുകൂഉ് ചെയ്യുക. 
വീണ്ടും ഉയരുക. 
മറ്റൊരു ഫാതിഹയും കൂടി ഓതുക.
റുകൂഉം കഴിഞ്ഞ് സുജൂദില്‍ പ്രവേശിക്കുക. ഇതു പോലെ അടുത്ത റക്അത്തും നിര്‍വ്വഹിക്കുകയാണ് വേണ്ടത്.
ആദ്യത്തെ റുകൂഇല്‍ അല്‍ബഖറയിലെ 100 ആയത്ത് ഓതുന്നതിന്റെ സമയവും രണ്ടാമത്തെ റുകൂഇല്‍ 80 ആയത്ത് ഓതുന്ന സമയവും മൂന്നാമത്തെ റുകൂഇല്‍ 70 ആയത്ത് ഓതുന്ന സമയവും നാലാമത്തെ റുകൂഇല്‍ 50 ആയത്ത് ഓതുന്ന സമയവും  തസ്ബീഹ് ചൊല്ലുണമെന്നും ഇസ്ലാമിക ഗ്രന്ഥങ്ങളിലുണ്ട്.
മറ്റു കര്‍മ്മങ്ങളെല്ലാം സാധാരണ നിസ്‌കാരത്തിലേത് പോലെ തന്നെയാണ്. തുടര്‍ന്ന് രണ്ട് ഖുത്വുബ ഓതുക. 
പള്ളികളില്‍ ആണ് നിസ്‌കാരം നിര്‍വഹിക്കേണ്ടതെങ്കിലും, വീട്ടിലോ പ്രാര്‍ത്ഥന സാധുതയുള്ള മറ്റേതെങ്കിലും സ്ഥലത്തോ ഇത് നിര്‍വഹിക്കാനും അനുവാദമുണ്ടെന്ന് കൗണ്‍സില്‍ അഭിപ്രായപ്പെട്ടു.
നിസ്‌കാരത്തിനൊപ്പം ദാനധര്‍മ്മങ്ങള്‍, ദിക്‌റുകള്‍, പാപമോചനം എന്നിവ അധികരിപ്പിക്കാനും പണ്ഡിതന്മാര്‍ വിശ്വാസികളെ പ്രോത്സാഹിപ്പിക്കുന്നു.
ഭാഗികമായോ പൂര്‍ണ്ണമായോ ആളുകള്‍ക്ക് ഗ്രഹണം വ്യക്തമായി ദൃശ്യമാകുന്ന ഘട്ടത്തില്‍ മാത്രമേ ഗ്രഹണ നിസ്‌കാരം നിര്‍ദ്ദേശിക്കാവൂ എന്ന് കൗണ്‍സില്‍ വിശദീകരിച്ചു. ജ്യോതിശാസ്ത്ര ഉപകരണങ്ങള്‍ ഉപയോഗിച്ച് മാത്രം കണ്ടെത്താന്‍ കഴിയുന്നത്ര ചെറുതാണെങ്കില്‍ പ്രത്യേക ഗ്രഹണ നിസ്‌കാരം ആവശ്യമില്ല.

ഗ്രഹണ സമയം

ചന്ദ്രന്‍ രക്തനിറത്തില്‍ തിളങ്ങി നില്‍ക്കുന്ന പ്രതിഭാസമായ 'ബ്ലഡ് മൂണ്‍' അഥവാ രക്തചന്ദ്രന്‍ ആകാശത്ത് ദൃശ്യമാകുന്ന അപൂര്‍വ ദിവസമാണ് ഇന്ന്. യുഎഇയില്‍ രാത്രി 8:27 ന് ആരംഭിച്ച് രാത്രി 10:12 ന് അതിന്റെ ഉച്ചസ്ഥായിയിലെത്തുകയും രാത്രി 11:57 ന് അവസാനിക്കുകയും ചെയ്യുമെന്ന് പ്രതീക്ഷിക്കുന്നു. ഈ ദശാബ്ദത്തിലെ ഏറ്റവും മനോഹരമായി കാണാന്‍ കഴിയുന്ന ചന്ദ്രഗ്രഹണം കൂടിയാണ് വരാനിരിക്കുന്നത്. ഭൂമി സൂര്യനും ചന്ദ്രനും ഇടയില്‍ നേര്‍രേഖയില്‍ വരുമ്പോഴാണ് ഒരു പൂര്‍ണ്ണ ചന്ദ്രഗ്രഹണം സംഭവിക്കുന്നത്. ഈ സമയത്ത് ചന്ദ്രന്‍ ഭൂമിയുടെ നിഴലില്‍ പൂര്‍ണ്ണമായി മറയും. 
ഏഷ്യയിലും ആഫ്രിക്കയിലും ആണ് പ്രധാനമായും ചന്ദ്രഗ്രഹണം ദൃശ്യമാകുക. ഏഷ്യയില്‍ ഇന്ത്യയിലും ഗള്‍ഫ് രാഷ്ട്രങ്ങളിലും ഈ അസാധാരണ കാഴ്ച നഗ്‌നനേത്രംകൊണ്ട് തന്നെ ദൃശ്യമാകും. ഡല്‍ഹി, മുംബൈ, കൊല്‍ക്കത്ത, പൂനെ, ലക്‌നൗ, ഹൈദരാബാദ്, ചണ്ഡീഗഡ്, കോഴിക്കോട് തുടങ്ങിയ ഇന്ത്യയിലെ പ്രധാന നഗരങ്ങളിലെല്ലാം ഈ കാഴ്ച വ്യക്തമായി കാണാന്‍ സാധിക്കും. തുറന്ന സ്ഥലങ്ങള്‍ കാഴ്ചക്കായി തിരഞ്ഞെടുക്കുന്നതാണ് കൂടുതല്‍ ഉചിതം.

ഏകദേശം അഞ്ചര മണിക്കൂറോളം നീണ്ടുനില്‍ക്കുന്ന ഗ്രഹണം ആണ് സംഭവിക്കുക. 'ബ്ലഡ് മൂണ്‍' എന്നറിയപ്പെടുന്ന ഈ പ്രതിഭാസം ഒരു മണിക്കൂറും 22 മിനിറ്റും നീണ്ടുനില്‍ക്കും. ഏഷ്യയില്‍ രാത്രി സംഭവിക്കുന്നതിനാലാണ് നമുക്ക് ദൃശ്യമാകുന്നത്.

ഇന്ത്യ: ഇന്ത്യന്‍ സമയം രാത്രി 8:58 ന് ഗ്രഹണം ആരംഭിച്ച് സെപ്റ്റംബര്‍ 8 ന് ഇന്ത്യന്‍ സമയം പുലര്‍ച്ചെ 2:25 ന് അവസാനിക്കും. ചന്ദ്രന്‍ ചുവപ്പായി മാറുകയും സെപ്റ്റംബര്‍ 7 ന് രാത്രി 11:00 നും സെപ്റ്റംബര്‍ 8 ന് ഇന്ത്യന്‍ സമയം പുലര്‍ച്ചെ 12:22 നും ഇടയില്‍ 82 മിനിറ്റ് നീണ്ടുനില്‍ക്കുകയും ചെയ്യും.

ഗള്‍ഫ്: രാത്രി 7 മുതല്‍ 11 മണി വരെയുള്ള സമയത്താണ് ഗ്രഹണം സംഭിക്കുക. രാത്രി ഏഴുമണിക്ക് തുടങ്ങി 10 മണിയോടെയും പൂര്‍ണ ഗ്രഹണം ഉണ്ടാകുക. 10 മണിയോടെ ഭാഗിക ഗ്രഹണമായി മാറി ചന്ദ്രന്‍, ഭൂമിയുടെ നിഴലില്‍നിന്ന് പൂര്‍ണമായി പുറത്തുവരും.

രാത്രി ഗ്രഹണ നിസ്‌കാരം നിര്‍വഹിക്കാന്‍ കുവൈത്ത് ഉള്‍പ്പെടെയുള്ള ഗള്‍ഫ് രാജ്യങ്ങളിലും അതത് നാട്ടിലെ ഇസ്ലാമിക മതകാര്യമന്ത്രാലയം ആഹ്വാനംചെയ്തിട്ടുണ്ട്. നിസ്‌കാരത്തിനായി കുവൈത്തിലെ 6 ഗവര്‍ണറേറ്റുകളിലായി 106 പള്ളികളില്‍ സൗകര്യമൊരുക്കിയിട്ടുണ്ട്. 

ALSO READ: യുഎന്‍ ഉപരോധം തിരിച്ചടിയായി; താലിബാന്‍ മന്ത്രി ഇന്ത്യയിലേക്കില്ല

The General Authority of Islamic Affairs, Endowments and Zakat has urged Muslims to perform the Eclipse Prayer on Sunday evening, September 7, following the tradition of Prophet Muhammad (Peace be upon him) to observe prescribed prayers during cosmic events.