ദോഹ: പൂര്‍ണ ചന്ദ്രഗ്രഹണം ദൃശ്യമാകുന്ന ഇന്ന് (സെപ്റ്റംബര്‍ 7) ഗ്രഹണ നിസ്‌കാരം നിര്‍വഹിക്കാന്‍ ആഹ്വാനംചെയ്ത് ഖത്തര്‍ എന്‍ഡോവ്‌മെന്റ് ആന്‍ഡ് ഇസ്ലാമിക് അഫയേഴ്‌സ് മന്ത്രാലയം. ഇഷാ നമസ്‌കാരത്തിന് ശേഷം പള്ളികളില്‍ ഗ്രഹണ നമസ്‌കാരം (സലാത്തുല്‍ ഖുസുഫ്) നിര്‍വഹിക്കാനാണ് വിശ്വാസികളോട് ആഹ്വാനം ചെയ്തത്. ഗ്രഹണത്തിന്റെ ആരംഭം മുതല്‍ അത് അവസാനിക്കുന്നതുവരെയാണ് ഗ്രഹണ നിസ്‌കാരത്തിന്റെ സമയം. 

സൂര്യഗ്രഹണങ്ങളിലും ചന്ദ്രഗ്രഹണങ്ങളിലും പ്രാര്‍ത്ഥിക്കുന്ന പ്രവാചകന്റെ (സ) രീതിയെ അനുസ്മരിച്ചാണ് ഗ്രഹണ നമസ്‌കാരം നിര്‍വഹിക്കാന്‍ മന്ത്രാലയം വിശ്വാസികളോട് അഭ്യര്‍ത്ഥിച്ചത്. പ്രവാചകന്‍ പറഞ്ഞു: 'സൂര്യനും ചന്ദ്രനും അല്ലാഹുവിന്റെ ദൃഷ്ടാന്തങ്ങളില്‍ രണ്ട് അടയാളങ്ങളാണ്. ആരുടെയും മരണം അല്ലെങ്കില്‍ ജീവിതം കാരണം അവ (ഗ്രഹണം) സംഭവിക്കുന്നില്ല. അതിനാല്‍ നിങ്ങള്‍ അവക്ക് സാക്ഷ്യംവഹിക്കുമ്പോള്‍, അല്ലാഹുവിനെ വിളിച്ച് അത് അവസാനിക്കുന്നതുവരെ പ്രാര്‍ത്ഥിക്കുക.'- പ്രവാചക വചനം ഉള്‍പ്പെടുത്തി മന്ത്രാലയം വിശദീകരിച്ചു.

ഭാഗികമായോ പൂര്‍ണ്ണമായോ ആളുകള്‍ക്ക് ഗ്രഹണം വ്യക്തമായി ദൃശ്യമാകുന്ന ഘട്ടത്തില്‍ മാത്രമേ ഗ്രഹണ നിസ്‌കാരം നിര്‍ദ്ദേശിക്കാവൂ എന്നാണ് നിയമം. ഖത്തറില്‍ രാത്രി 8:30 ന് ആരംഭിച്ച് ഒരു മണിക്കൂര്‍ 22 മിനിറ്റ് നീണ്ടുനില്‍ക്കുന്ന പൂര്‍ണ്ണ ചന്ദ്രഗ്രഹണം സംഭവിക്കുമെന്ന് മന്ത്രാലയം വ്യക്തമാക്കി. ഗ്രഹണ നിസ്‌കാരത്തിന് മറ്റ് ഗള്‍ഫ് രാഷ്ട്രങ്ങളും വിശ്വാസികളോട് ആഹ്വാനംചെയ്തിട്ടുണ്ട്.

ഗ്രഹണ നിസ്‌കാരത്തിന്റെ രൂപം

ഗ്രഹണ നിസ്‌കാരം നിര്‍വഹിക്കുന്നു എന്ന് കരുതുക.
തക്ബീറത്തുല്‍ ഇഹ്‌റാമിനു ശേഷം ഫാതിഹ ഓതി റുകൂഉ് ചെയ്യുക.
വീണ്ടും ഉയരുക.
മറ്റൊരു ഫാതിഹയും കൂടി ഓതുക.
റുകൂഉം കഴിഞ്ഞ് സുജൂദില്‍ പ്രവേശിക്കുക. ഇതു പോലെ അടുത്ത റക്അത്തും നിര്‍വ്വഹിക്കുകയാണ് വേണ്ടത്.
ആദ്യത്തെ റുകൂഇല്‍ അല്‍ബഖറയിലെ 100 ആയത്ത് ഓതുന്നതിന്റെ സമയവും രണ്ടാമത്തെ റുകൂഇല്‍ 80 ആയത്ത് ഓതുന്ന സമയവും മൂന്നാമത്തെ റുകൂഇല്‍ 70 ആയത്ത് ഓതുന്ന സമയവും നാലാമത്തെ റുകൂഇല്‍ 50 ആയത്ത് ഓതുന്ന സമയവും തസ്ബീഹ് ചൊല്ലുണമെന്നും ഇസ്ലാമിക ഗ്രന്ഥങ്ങളിലുണ്ട്.
മറ്റു കര്‍മ്മങ്ങളെല്ലാം സാധാരണ നിസ്‌കാരത്തിലേത് പോലെ തന്നെയാണ്. തുടര്‍ന്ന് രണ്ട് ഖുത്വുബ ഓതുക.
പള്ളികളില്‍ ആണ് നിസ്‌കാരം നിര്‍വഹിക്കേണ്ടതെങ്കിലും, വീട്ടിലോ പ്രാര്‍ത്ഥന സാധുതയുള്ള മറ്റേതെങ്കിലും സ്ഥലത്തോ ഇത് നിര്‍വഹിക്കാനും അനുവാദമുണ്ടെന്ന് കൗണ്‍സില്‍ അഭിപ്രായപ്പെട്ടു.
നിസ്‌കാരത്തിനൊപ്പം ദാനധര്‍മ്മങ്ങള്‍, ദിക്‌റുകള്‍, പാപമോചനം എന്നിവ അധികരിപ്പിക്കാനും പണ്ഡിതന്മാര്‍ വിശ്വാസികളെ പ്രോത്സാഹിപ്പിക്കുന്നു.

ALSO READ: ദുബൈയിലെത്തിയ ഇന്ത്യന്‍ യൂട്യൂബറുടെ ഐഫോണ്‍ നഷ്ടമായി, അടുത്ത വിമാനത്തില്‍ ഫ്രീയായി നാട്ടിലെത്തിച്ചു; ദുബൈ പൊലിസിന്റെ പ്രകടനമികവിന് കൈയടി

The Ministry of Endowments and Islamic Affairs called on worshippers to perform the Eclipse Prayer (Salat al-Khusuf) in mosques after Isha prayer, should the lunar eclipse occur. The ministry explained that the prayer is a confirmed Sunnah, and its time extends from the beginning of the eclipse until it ends.