തിരുവനന്തപുരം: കുന്നംകുളം പൊലിസ് സ്റ്റേഷനിലെ കസ്റ്റഡിയിൽ വെച്ച് യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡന്റ് വി.എസ്. സുജിത്തിനെ (27)  ക്രൂരമായി മർദിച്ച സംഭവത്തിൽ പ്രതിഷേധം കടുപ്പിച്ച് യൂത്ത് കോൺഗ്രസ്. സംഭവത്തിന്റെ സിസിടിവി ദൃശ്യങ്ങൾ അടുത്ത് പുറത്തുവന്നതിനു പിന്നാലെ പ്രതികളായ നാല് പൊലിസ് ഉദ്യോഗസ്ഥരെ സസ്പെൻഡ് ചെയ്തെങ്കിലും, അവരെ സർവീസിൽനിന്നു പുറത്താക്കണമെന്നാവശ്യപ്പെട്ടാണ് സംസ്ഥാന വ്യാപകമായ പ്രതിഷേധ പരിപാടികൾക്ക് യൂത്ത് കോൺഗ്രസ് ആഹ്വാനം ചെയ്തിരിക്കുന്നത്.

ALSO READ: പാലക്കാട് കോൺഗ്രസിൽ നാടകീയ വഴിത്തിരിവ്: സിപിഐഎമ്മിൽ ചേർന്ന റിയാസ് തച്ചമ്പാറ തിരികെ കോൺ​ഗ്രസിലേക്ക്

പ്രതിഷേധത്തിന്റെ ഭാഗമായി യൂത്ത് കോൺഗ്രസ് പ്രവർത്തകർ സസ്പെൻഡ് ചെയ്ത ഉദ്യോഗസ്ഥരുടെ വീടുകളിലേക്കും ജോലിസ്ഥലങ്ങളിലേക്കും മാർച്ചുകൾ നടത്തി. സിപിഒ സന്ദീപിന്റെ കൊല്ലം ചവറ തെക്കുംഭാഗത്തെ വീട്ടിലേക്കു നടത്തിയ മാർച്ച് അക്രമാസക്തമായി. പ്രവർത്തകർ ബാരിക്കേഡുകൾ മറിച്ചിട്ടു കല്ലെറിയുകയും ചെയ്തു. സ്ഥലത്ത് സംഘർഷാവസ്ഥയുണ്ടാക്കിയതോടെ കൂടുതൽ പൊലിസിനെ വിന്യസിച്ചു. സമാനമായി, സിപിഒ ശശിധരന്റെ വീട്ടിലേക്കും എസ്ഐ നൂഹ്മാന്റെ മലപ്പുറത്തെ വീട്ടിലേക്കും മാർച്ചുകൾ നടന്നു, ഇവിടങ്ങളിലും സംഘർഷങ്ങൾ ഉണ്ടായി.

ALSO READ: മെഷീൻ ലേണിംഗ് പഠനത്തിന് ഇത്ര സാധ്യതകളുണ്ടായിരുന്നോ?; വെറും 23 വയസ്സിൽ 3.36 കോടി രൂപയുടെ ആമസോൺ ജോലി ഉപേക്ഷിച്ച് മെറ്റയിലേക്ക് 

തിരുവനന്തപുരം സെക്രട്ടറിയറ്റിലേക്ക് നടത്തിയ മാർച്ചിൽ പൊലിസ് ബാരിക്കേഡുകൾ തടസ്സമാക്കിയതോടെ പ്രവർത്തകർ അതു ചാടിക്കടക്കാൻ ശ്രമിച്ചു. പൊലിസ് ജലപീരങ്കി പ്രയോഗിച്ചതിനെത്തുടർന്ന് സംഘർഷമുണ്ടായി. സ്ഥലത്ത് വൻ പൊലിസ് സന്നാഹം നിലയുറപ്പിച്ചു. പാലക്കാട് എസ്പി ഓഫീസിലേക്കുള്ള മാർച്ചിലും നാലു തവണ ജലപീരങ്കി പ്രയോഗിച്ചു, പ്രവർത്തകരെ അറസ്റ്റ് ചെയ്തു നീക്കി.

തിരുവോണ ദിവസം തൃശൂർ ഡിഐജി ഓഫീസിലേക്കു 'കൊലച്ചോറ്' സമരവുമായി യൂത്ത് കോൺഗ്രസ് പ്രവർത്തകർ എത്തിയിരുന്നു. പ്രതിയായ പൊലിസുകാരുടെ മാസ്കുകൾ ധരിച്ചാണ് പ്രതിഷേധിച്ചത്. പൊലിസ് ബാരിക്കേഡുകൾ തടസ്സമാക്കിയതോടെ നിലത്തിരുന്ന് പ്രതിഷേധം നടത്തുകയായിരുന്നു.

സുജിത് സമർപ്പിച്ച പരാതിയുടെ അടിസ്ഥാനത്തിൽ എസ്ഐ നൂഹ്മാൻ, സീനിയർ സിപിഒ ശശിധരൻ, സിപിഒമാരായ കെ.ജെ. സജീവൻ, എസ്. സന്ദീപ് എന്നിവരാണു സസ്പെൻഡ് ചെയ്യപ്പെട്ടത്. തൃശൂർ റേഞ്ച് ഡിഐജി ഹരിശങ്കറിന്റെ റിപ്പോർട്ടിന്റെ അടിസ്ഥാനത്തിൽ ഉത്തരമേഖലാ ഐജി രാജ്പാൽ മീനയുടെ ഉത്തരവിലാണു നടപടി. സുജിത്തിനെ അർധനഗ്നനാക്കി നിർത്തി മുഖത്തടിക്കുകയും പുറത്ത് മുട്ടുകൊണ്ട് ഇടിക്കുകയും ചെയ്ത ദൃശ്യങ്ങൾ രണ്ട് വർഷത്തെ പോരാട്ടത്തിനൊടുവിലാണ് വിവരാവകാശ നിയമ പ്രകാരം വഴി പുറത്തുവന്നതോടെയാണ് സംഭവം വിവാദമായത്. 

2023 ഏപ്രിൽ 5-നാണ് യൂത്ത് കോൺഗ്രസ് ചൊവ്വന്നൂർ മണ്ഡലം പ്രസിഡന്റ് വി.എസ്. സുജിത്തിനെ പൊലിസ് കസ്റ്റഡിയിലെടുക്കുന്നത്. സ്റ്റേഷനിലെത്തിച്ച ശേഷം അഞ്ച് പൊലിസുകാർ ചേർന്ന് ക്രൂരമായി മർദിച്ചുവെന്നാണ് ആരോപണം. സിസിടിവി ദൃശ്യങ്ങൾ പുറത്തുവന്നതോടെ സംഭവം വലിയ വിവാദമായി. സുജിത്തിന്റെ പറയുന്നതനുസരിച്ച്, കാലിനടിയിൽ ലാത്തികൊണ്ട് 45-ലധികം അടികൾ, ചെവിക്കടിയിൽ പ്രഹരം മൂലം ശ്രവണ ശേഷി നഷ്ടപ്പെടൽ, സിസിടിവി ഇല്ലാത്ത മുറിയിൽ വെച്ചും കൂടുതൽ ക്രൂരമായ മർദനം എന്നിവയുണ്ടായി. പ്രഹരത്തിനു ശേഷം എഴുന്നേറ്റ് ചാടാനും നിർബന്ധിച്ചു. മർദനത്തെ തുടർന്ന് ചാവക്കാട് താലൂക്ക് ആശുപത്രിയിലും തൃശൂർ മെഡിക്കൽ കോളേജിലും ചികിത്സ തേടി. ഇപ്പോഴും 0.5% കേൾവിശക്തി നഷ്ടപ്പെട്ട നിലയിലാണ് സുജിത്ത്.

ഭരണകക്ഷിയായ സിപിഎമ്മിലുള്ളവരെപ്പോലും പൊലിസ് മാരകമായി മർദിക്കുന്നതായി യൂത്ത് കോൺഗ്രസ് പ്രവർത്തകൻ അബിൻ വർക്കി സമരത്തിൽ സംസാരിക്കവെ ആരോപിച്ചു. "സുജിത്തിനെ മർദിച്ച പൊലിസുകാരെ സർവീസിൽനിന്നു പുറത്താക്കുന്നതുവരെ സമരം തുടരും. ആഭ്യന്തരവകുപ്പ് കൈകാര്യം ചെയ്യുന്ന മുഖ്യമന്ത്രി പിണറായി വിജയൻ സംഭവത്തെ അപലപിക്കാൻപോലും തയാറാകുന്നില്ല," എന്നു അദ്ദേഹം പറഞ്ഞു. കോൺഗ്രസ് നേതാക്കൾ സുജിത്തിന്റെ വീട്ടിലെത്തി പിന്തുണ അറിയിച്ചു. സമഗ്ര അന്വേഷണം ആവശ്യപ്പെട്ട് യൂത്ത് കോൺഗ്രസ് സംസ്ഥാനവ്യാപകമായി കൂടുതൽ പ്രതിഷേധങ്ങൾ ആസൂത്രണം ചെയ്തിട്ടുണ്ട്. സംഭവം നിയമസഭാ സമ്മേളനത്തിലും ഉയർത്തിക്കാട്ടുമെന്നു കോൺഗ്രസ് നേതൃത്വം വ്യക്തമാക്കി.

The Youth Congress has escalated protests following the alleged brutal assault of their leader V.S. Sujith by police at Kunnamkulam station in April 2023. Marches targeting the homes of accused officers, including CPO Sandeep, turned violent with clashes and police using water cannons. Demonstrations at the Secretariat and Palakkad SP office also saw confrontations, with demands for the dismissal of the involved officers and a thorough probe.