കാഠ്മണ്ഡു: നേപ്പാൾ സർക്കാരിന്റെ സോഷ്യൽ മീഡിയ നിരോധനത്തിനെതിരെ ജെൻസി (ജനറേഷൻ സി) പ്രതിഷേധം രൂക്ഷമാകുന്നു. സെപ്തംബർ 4 മുതൽ 26 സോഷ്യൽ മീഡിയ പ്ലാറ്റ്ഫോമുകൾ നിരോധിച്ചതിനെ തുടർന്ന് കാഠ്മണ്ഡുവിലും മറ്റ് പ്രധാന നഗരങ്ങളിലും ആയിരക്കണക്കിന് യുവാക്കളാണ് നിരോധനത്തിനെതിരെ തെരുവിലിറങ്ങിയത്.

പ്രതിഷേധത്തിൽ പൊലിസുമായുള്ള ഏറ്റുമുട്ടലിൽ രണ്ട് പേർ മരിക്കുകയും, നൂറിലധികം പേർക്ക് പരുക്കേൽക്കുകയും ചെയ്തതായി ഫ്രീ പ്രസ്സ് ജേർണൽ റിപ്പോർട്ട് ചെയ്യുന്നു. അഴിമതി, ദുർഭരണം, സോഷ്യൽ മീഡിയ നിരോധനം എന്നിവയ്‌ക്കെതിരെയാണ് പ്രധാനമായും ജെൻസിയുടെ പ്രതിഷേധം.

പ്രതിഷേധക്കാരെ തടയാൻ പൊലിസ് ടിയർ ഗ്യാസ്, വാട്ടർ ക്യാനൻ, റബ്ബർ ബുള്ളറ്റുകൾ, വെടിവെപ്പ് എന്നിവ ഉപയോഗിച്ചു. ന്യൂ ബനേശ്വറിൽ പൊലിസുമായുള്ള ഏറ്റുമുട്ടലിലാണ് ഒരാൾ വെടിയേറ്റ് മരിച്ചത്, മറ്റൊരാൾ ചികിത്സയ്ക്കിടെ മരിച്ചു. നൂറിലധികം പേർക്ക് പരിക്കേറ്റു, ഇതിൽ പലരും ആശുപത്രികളിൽ ചികിത്സയിലാണ്. പല പത്രപ്രവർത്തകർക്കും പരുക്കേറ്റു. സംഘർഷത്തെ തുടർന്ന് ജനജീവിതം സ്തംഭിച്ചിരിക്കുകയാണ്.

ALSO READ: പാലക്കാട് കോൺഗ്രസിൽ നാടകീയ വഴിത്തിരിവ്: സിപിഐഎമ്മിൽ ചേർന്ന റിയാസ് തച്ചമ്പാറ തിരികെ കോൺ​ഗ്രസിലേക്ക്

നേപ്പാൾ സർക്കാർ കഴിഞ്ഞ ഓഗസ്റ്റ് 28-ന് സോഷ്യൽ മീഡിയ കമ്പനികൾക്ക് രജിസ്ട്രേഷൻ നിർബന്ധമാക്കി ഏഴ് ദിവസത്തെ അന്തിമാവധി നൽകിയിരുന്നു. ഫേസ്ബുക്ക്, ഇൻസ്റ്റഗ്രാം, വാട്ട്സാപ്പ്, യൂട്യൂബ്, എക്സ് (മുൻ ട്വിറ്റർ), സ്നാപ്ചാറ്റ് തുടങ്ങിയ 26 പ്ലാറ്റ്ഫോമുകൾ രജിസ്റ്റർ ചെയ്യാത്തതിനെ തുടർന്ന് സെപ്തംബർ 4 മുതൽ നിരോധിച്ചു കൊണ്ട് ഉത്തരവിടുകയായിരുന്നു. നികുതി വരുമാനം ഉറപ്പാക്കാനും, രാജ്യത്ത് ഓഫീസുകൾ തുറക്കാനും, ഉള്ളടക്ക നിയന്ത്രണത്തിനുമാണ് നിരോധനം എന്നാണ് സർക്കാർ പറയുന്നത്. എന്നാൽ, ഇത് അഴിമതി മറച്ചുവെക്കാനുള്ള ശ്രമമായാണ് കാണുന്നതെന്ന് പ്രതിഷേധക്കാർ ആരോപിച്ചു.

കാഠ്മണ്ഡുവിന് പുറമെ പൊഖാറ, ബുട്ട്വാൾ, ചിത്വാൻ, ഝാപ, ഡമക് തുടങ്ങിയ നഗരങ്ങളിലേക്കും പ്രതിഷേധം വ്യാപിച്ചു. ജെൻ സി യുവാക്കളാണ് പ്രതിഷേധത്തിന് നേതൃത്വം നൽകുന്നത്. പ്രധാനമന്ത്രി കെപി ശർമ ഒലിയുടെ നേതൃത്വത്തിലുള്ള സർക്കാർ അടിയന്തര യോഗം ചേർന്നു. പാർലമെന്റ്, പ്രസിഡന്റ് ഭവനം, പ്രധാനമന്ത്രിയുടെ വസതി തുടങ്ങിയ പ്രധാന മേഖലകളിൽ കർഫ്യൂ ഏർപ്പെടുത്തി. പൊലിസിനെ സഹായിക്കാൻ നേപ്പാൾ സർക്കാർ ആർമിയെ ഇറക്കിയിരിക്കുകയാണ്.

ALSO READ: മെഷീൻ ലേണിംഗ് പഠനത്തിന് ഇത്ര സാധ്യതകളുണ്ടായിരുന്നോ?; വെറും 23 വയസ്സിൽ 3.36 കോടി രൂപയുടെ ആമസോൺ ജോലി ഉപേക്ഷിച്ച് മെറ്റയിലേക്ക് 

കാഠ്മണ്ഡുവിലെ മൈതിഘർ മണ്ഡലയിൽ നിന്ന് ആരംഭിച്ച പ്രതിഷേധം പാർലമെന്റ് ഭവനത്തിലേക്ക് നീങ്ങുകയും, പ്രതിഷേധക്കാർ ബാരിക്കേഡുകൾ തകർത്ത് പാർലമെന്റ് സമുച്ചയത്തിലേക്ക് കടക്കാനും ശ്രമിച്ചു. "സോഷ്യൽ മീഡിയ നിരോധനം നിർത്തുക, അഴിമതി നിർത്തുക" എന്നീ മുദ്രാവാക്യങ്ങൾ മുഴക്കി കൊണ്ടായിരുന്നു പ്രതിഷേധം. 

 

ടിക്‌ടോക്, വൈബർ തുടങ്ങിയ ചില പ്ലാറ്റ്ഫോമുകൾ രജിസ്റ്റർ ചെയ്തതിനാൽ അവയ്ക്ക് നിരോധനമില്ല. പാർലമെന്റിൽ 'സോഷ്യൽ മീഡിയ ഓപ്പറേഷൻ, ഉപയോഗം, റെഗുലേഷൻ' ബില്ല് ചർച്ചയിലാണ്, ഇത് സെൻസർഷിപ്പിനുള്ള ഉപകരണമായി വിമർശിക്കപ്പെടുന്നു.

"രാജ്യത്തിന്റെ സ്വാതന്ത്ര്യം ഒരു കൂട്ടം വ്യക്തികളുടെ ജോലി നഷ്ടത്തേക്കാൾ വലുതാണ്" എന്ന് പ്രധാനമന്ത്രി ഒലി പറഞ്ഞു. സർക്കാർ നിരോധനം ന്യായീകരിക്കുന്നു, എന്നാൽ പ്രതിഷേധക്കാർ ഇത് സ്വാതന്ത്ര്യത്തിനെതിരെയുള്ള ആക്രമണമായി കാണുന്നതായും അദ്ദേഹം പറഞ്ഞു. രാജ്യത്ത് ഇപ്പോഴും പ്രതിഷേധം തുടരുകയാണ്. സ്ഥിതി സംഘർഷഭരിതമാണ് എന്നും കൂടുതൽ നഗരങ്ങളിലേക്ക് പ്രതിഷേധം വ്യാപിക്കുന്നതായും റിപ്പോർട്ടുകൾ സൂചിപ്പിക്കുന്നു. നേപ്പാളിലെ പ്രമുഖ കലാകാരന്മാർ, നടന്മാർ എന്നിവർ പ്രതിഷേധത്തെ പിന്തുണച്ചു രംഗത്തെത്തി.

nepal's social media ban sparked widespread gen z protests, leading to violent clashes in kathmandu and other cities. two people died, and over 100 were injured as police used tear gas and gunfire. the government, citing national security, deployed the army to control the escalating unrest.