കോയമ്പത്തൂര്‍: സ്വിഗ്ഗിയില്‍ നേരിട്ട് റെസ്റ്റോറന്റില്‍ പോയി ഭക്ഷണം വാങ്ങുന്നതിനേക്കാള്‍ 81% വില കൂട്ടിയാണ് ഭക്ഷണം വില്‍ക്കുന്നത് എന്ന ആരോപണവുമായി യുവാവിന്റെ പോസ്റ്റ്. കോയമ്പത്തൂരില്‍ നിന്നുള്ള യുവാവാണ് തന്റെ അനുഭവം സോഷ്യല്‍ മീഡിയയില്‍ ഷെയര്‍ ചെയ്തിരിക്കുന്നത്.

വെറും രണ്ട് കിലോമീറ്റര്‍ ദൂരത്തുള്ള റെസ്റ്റോറന്റിലെ ഭക്ഷണത്തിനാണ് ഈ വിലക്കൂടുതല്‍ എന്നാണ് യുവാവ് ആരോപിക്കുന്നത്. സുന്ദര്‍ (@SunderjiJB) എന്ന യൂസറാണ് എക്‌സില്‍ (ട്വിറ്റര്‍) രണ്ട് ബില്ലുകളും വിശദമായി തന്നെ താരതമ്യം ചെയ്തുകൊണ്ട് പോസ്റ്റ് ഷെയര്‍ ചെയ്തിരിക്കുന്നത്.

ആപ്പില്‍ ഭക്ഷണം ഓര്‍ഡര്‍ ചെയ്യുമ്പോള്‍ രണ്ട് കിലോമീറ്റര്‍ അകലെയുള്ള അതേ ഔട്ട്‌ലെറ്റില്‍ നിന്ന് ഭക്ഷണം വാങ്ങുന്നതിനേക്കാള്‍ 81% ചെലവ് എന്തു കൊണ്ടാണ് കൂടുന്നത്? ഭക്ഷണം എത്തിക്കാന്‍ താന്‍ നല്‍കേണ്ടുന്ന അധിക തുക 663 രൂപയാണ്, ഇതിനെ കുറിച്ച് സ്വിഗ്ഗി ദയവായി വിശദീകരിച്ചാലും എന്നാണ് യുവാവ് പോസ്റ്റില്‍ പറയുന്നത്. സ്വിഗ്ഗിയെ പോസ്റ്റില്‍ മെന്‍ഷന്‍ ചെയ്തിരിക്കുന്നതും കാണാം.

സ്‌ക്രീന്‍ഷോട്ട് പ്രകാരം സ്വിഗ്ഗിയില്‍ ഓര്‍ഡര്‍ ചെയ്യുമ്പോള്‍ ആകെ തുകയായത് 1,473 രൂപയാണ്. എന്നാല്‍, അതേ ഭക്ഷണത്തിന് നേരിട്ട് പോയി വാങ്ങുമ്പോള്‍ 810 രൂപ മാത്രമേ ആകുന്നുള്ളൂ. വളരെ പെട്ടെന്നു തന്നെ യുവാവിന്റെ പോസ്റ്റ് വൈറലായി. രണ്ട് മില്ല്യണിലധികം പേരാണ് പോസ്റ്റ് കണ്ടിരിക്കുന്നത്.

ALSO READ: പോപുലര്‍ ഫ്രണ്ട് ബന്ധമാരോപിച്ച് പോലിസില്‍നിന്ന് പുറത്താക്കി; തീവ്രവാദബന്ധം തള്ളി തിരിച്ചെടുക്കാന്‍ ട്രിബൂണലിന്റെ ഉത്തരവുണ്ടായിട്ടും രക്ഷയില്ല; നിത്യവൃത്തിക്കായി അനസ് ഇന്ന് ആക്രിക്കടയില്‍

നിരവധിപേരാണ് യുവാവിന്റെ പോസ്റ്റിന് കമന്റുകള്‍ നല്‍കിയിരിക്കുന്നത്. ഇത് സ്വിഗ്ഗിയോ സൊമാറ്റയോ ഈടാക്കുന്ന വിലയല്ല, മറിച്ച് റെസ്റ്റോറന്റാണ് ഭക്ഷണത്തിന് ഈ വിലയിട്ടിരിക്കുന്നത് എന്നാണ് മിക്കവരും കമന്റ് നല്‍കുന്നത്. മറ്റ് ചിലര്‍ പറഞ്ഞത് സ്വിഗ്ഗിയുടെ സേവനങ്ങള്‍ക്ക് പണം നല്‍കേണ്ടി വരും ഇല്ലാത്തവര്‍ക്ക് റെസ്റ്റോറന്റില്‍ പോയി കഴിക്കാമല്ലോ എന്നാണ്.

അതേസമയം, യുവാവിനെ അനുകൂലിച്ചുകൊണ്ട് ഓണ്‍ലൈന്‍ ഫുഡ് ഡെലിവറി ആപ്പുകള്‍ ഒരുപാട് അധികം തുക ഈടാക്കുന്നുണ്ട് എന്ന് അഭിപ്രായപ്പെട്ടവരും ഏറെയാണ്.

summary: A customer from Coimbatore has accused food delivery platform Swiggy of charging 81% more than the actual restaurant price for the same food. The issue went viral after the user, @SunderjiJB, shared a post on X (formerly Twitter), comparing two bills — one from a Swiggy order and the other from a direct restaurant visit just 2 km away.