ഡൽഹി: രാജ്യവ്യാപകമായി എസ്ഐആർ 2025-നുള്ളിൽ പൂർത്തിയാക്കാൻ തെരഞ്ഞെടുപ്പ് കമ്മീഷൻ തീരുമാനിച്ചു. ബിഹാറിൽ വിജയകരമായി നടപ്പാക്കിയ വോട്ടർ പട്ടിക പരിഷ്കരണ മാതൃക രാജ്യത്തുടനീളം പരീക്ഷിക്കുമെന്നും കമ്മീഷൻ അറിയിച്ചു. വോട്ടർമാരുടെയും അവരുടെ ബന്ധുക്കളുടെയും വിവരങ്ങൾ കണ്ടെത്തുന്നതിന് ബിഹാറിൽ ഉപയോഗിച്ച രീതി മറ്റ് സംസ്ഥാനങ്ങളിലും നടപ്പാക്കാനാണ് പദ്ധതി. എന്നാൽ, ആധാർ കാർഡ് തിരിച്ചറിയൽ രേഖയായി സ്വീകരിക്കണമെന്ന് ഭൂരിപക്ഷം സംസ്ഥാന തെരഞ്ഞെടുപ്പ് ഉദ്യോഗസ്ഥരും നിർദേശിച്ചിട്ടില്ല.

കഴിഞ്ഞ ദിവസം ഡൽഹിയിൽ ചേർന്ന സംസ്ഥാന തെരഞ്ഞെടുപ്പ് ഉദ്യോഗസ്ഥരുടെ യോഗത്തിൽ, എസ്ഐആർ നടപ്പാക്കുന്നതിനുള്ള തയ്യാറെടുപ്പുകൾക്ക് തെരഞ്ഞെടുപ്പ് കമ്മീഷൻ നിർദേശം നൽകി. യോഗത്തിൽ, വിവിധ സംസ്ഥാനങ്ങൾ മുൻപ് എസ്ഐആർ നടത്തിയ തീയതികളും അതിനുശേഷമുള്ള സാഹചര്യങ്ങളും വിശദീകരിച്ചു. ബിഹാറിൽ നടപ്പാക്കിയ പരിഷ്കരണ നടപടികളെക്കുറിച്ച് അവിടുത്തെ ഉദ്യോഗസ്ഥർ വിശദമായ വിവരണം നൽകി. ഈ മാസം അവസാനത്തോടെ എല്ലാ സംസ്ഥാനങ്ങളിലും എസ്ഐആറിനുള്ള പ്രാഥമിക നടപടികൾ പൂർത്തിയാകുമെന്ന് ഭൂരിപക്ഷം തെരഞ്ഞെടുപ്പ് ഓഫീസർമാരും യോഗത്തിൽ അറിയിച്ചു.

വോട്ടർ പട്ടിക പരിഷ്കരണത്തിന് ഏതൊക്കെ രേഖകൾ സ്വീകരിക്കാമെന്നതിനെക്കുറിച്ച് ഉദ്യോഗസ്ഥർ അഭിപ്രായങ്ങൾ പങ്കുവെച്ചു. എന്നാൽ, ആധാർ തിരിച്ചറിയൽ രേഖയായി ഉപയോഗിക്കുന്നതിനെക്കുറിച്ച് തെരഞ്ഞെടുപ്പ് കമ്മീഷന്റെ ഔദ്യോഗിക വാർത്താക്കുറിപ്പിൽ വ്യക്തത വരുത്തിയിട്ടില്ല. ഓരോ സംസ്ഥാനത്തിന്റെയും പ്രത്യേക സാഹചര്യങ്ങൾ പരിഗണിച്ച്, തീവ്ര പരിശോധനയ്ക്ക് ഉപയോഗിക്കാവുന്ന രേഖകളുടെ പട്ടിക തയ്യാറാക്കാൻ കമ്മീഷൻ നിർദേശിച്ചു.

ബിഹാർ മാതൃകയെ അടിസ്ഥാനമാക്കി, രാജ്യവ്യാപകമായി തീവ്ര വോട്ടർ പട്ടിക പരിഷ്കരണം നടപ്പാക്കാനുള്ള നീക്കം ഊർജിതമാക്കാനാണ് തെരഞ്ഞെടുപ്പ് കമ്മീഷന്റെ തീരുമാനം. പ്രതിപക്ഷ പാർട്ടികളുടെ എതിർപ്പുകൾ അവഗണിച്ച്, എസ്ഐആർ പദ്ധതി വേഗത്തിൽ മുന്നോട്ടുകൊണ്ടുപോകാനുള്ള ശ്രമത്തിലാണ് കമ്മീഷൻ.