ലക്നൗ: ഒരാൾക്ക് ഒരേ സമയം ഒരേ വകുപ്പിൽ ആറ് വ്യത്യസ്ത ജില്ലകളിൽ ജോലി ചെയ്യാൻ കഴിയുമോ? എന്നാൽ കഴിയുമെന്ന ഉത്തരം പറയേണ്ടി വരുമെന്നതാണ് ഉത്തർപ്രദേശിൽ നിന്നുള്ള സംഭവം തെളിയിക്കുന്നത്. ആരോഗ്യ വകുപ്പിൽ ഒമ്പത് വർഷക്കാലം 'അർപിത് സിംഗ്' എന്ന പേരിലാണ് ഈ കേട്ടുകേൾവിയില്ലാത്ത തട്ടിപ്പ് നടന്നത്. 69,595 രൂപ ശമ്പളം ലഭിക്കുന്ന ഈ ജോലി യഥാർത്ഥ അർപിതിന് ഒപ്പം മറ്റു ആറ് പേർ കൂടി ചെയ്തത്. ആരോഗ്യ വകുപ്പിൽ നിന്ന് ഇത്തരത്തിൽ ശമ്പളമായി ഏകദേശം 4.5 കോടി രൂപയാണ് ആറ് പേർ അനധികൃതമായി തട്ടിയെടുത്തത്.

യുപി സർക്കാരിന്റെ മാനവ് സംപാദ പോർട്ടൽ നടത്തിയ ഓൺലൈൻ വെരിഫിക്കേഷൻ ഡ്രൈവിലാണ് സംഭവം പൊളിഞ്ഞത്. ഓൺലൈൻ വെരിഫിക്കേഷൻ ഡ്രൈവിനിടെ സമാനമായ എൻട്രികൾ കണ്ടതോടെ സംശയമായി. തുടർന്ന് നടത്തിയ അന്വേഷണത്തിലാണ് വ്യാജന്മാർ ഒമ്പത് വർഷമായി വിലസുന്നത് അറിയുന്നത്. ഒരേ പേര്, പിതാവിന്റെ പേര്, ജനനത്തീയതി, വ്യാജ ആധാർ കാർഡുകൾ എന്നിവ ഉപയോഗിച്ച് തട്ടിപ്പ് സംഘം യഥാർത്ഥ അപ്പോയ്ന്റ്മെന്റ് ലെറ്ററിന്റെ കോപ്പി എടുത്താണ് പ്രവേശനം നേടിയത്. 

2016-ൽ, യുപി സബോർഡിനേറ്റ് സർവീസസ് സെലക്ഷൻ കമ്മീഷൻ (യുപിഎസ്എസ്എസ്സി) എക്സ്-റേ ടെക്നീഷ്യൻ തസ്തികകളിലേക്ക് 403 ഉദ്യോഗാർത്ഥികളെ തിരഞ്ഞെടുത്തു. സീരിയൽ നമ്പർ 80-ൽ പട്ടികപ്പെടുത്തിയിരിക്കുന്ന ആഗ്രയിലെ അർപിത് സിംഗ് അവരിൽ ഒരാളായിരുന്നു. എന്നാൽ, കാലക്രമേണ, ആറ് 'അർപിത് സിംഗ്' കൂടി മറ്റ് ജില്ലകളിൽ സേവനത്തിൽ ചേർന്നു. ഓരോരുത്തരും വ്യാജ ആധാർ വിശദാംശങ്ങളും നിയമന കത്തുകളും ഉപയോഗിച്ചാണ് ജോലിയിൽ പ്രവേശിച്ചത്.

ALSO READ: പൊലിസ് യൂനിഫോമില്‍ മോഷണം; കവര്‍ന്നത് പണവും മൂന്ന് ലക്ഷം രൂപയുടെ ആഭരണങ്ങളും

ബൽറാംപൂർ, ഫറൂഖാബാദ്, ബന്ദ, രാംപൂർ, അംരോഹ, ഷാംലി എന്നിവിടങ്ങളിലാണ് വ്യാജന്മാർ ജോലി ചെയ്തിരുന്നതെന്ന് വസീർഗഞ്ച് പൊലിസ് സ്‌റ്റേഷനിൽ ആരോഗ്യവകുപ്പ് ഡയറക്ടർ (പാരാമെഡിക്കൽ) ഡോ.രഞ്ജന ഖരെ നൽകിയ പരാതിയിൽ പറയുന്നു. സംഭവത്തിൽ പൊലിസ് അന്വേഷണം ആരംഭിച്ചു. തട്ടിപ്പുകാർ താമസിച്ചിരുന്ന വീടുകൾ പൂട്ടിയ നിലയിലാണ്. ഫോണുകൾ സ്വിച്ച് ഓഫ് ചെയ്ത് നാടുവിട്ടതിനാൽ യഥാർത്ഥത്തിൽ ജോലി ചെയ്തത് ആരൊക്കെയാണെന്ന് കണ്ടുപിടിക്കാനുള്ള ശ്രമത്തിലാണ് പൊലിസ്. ഇവർ കൈപ്പറ്റിയ ശമ്പളം തിരിച്ചുപിടിക്കുന്നത് ഒട്ടും എളുപ്പമായിരിക്കില്ലെന്ന് ഉദ്യോഗസ്ഥർ പറയുന്നു.  

ആൾമാറാട്ടത്തിലൂടെയുള്ള വഞ്ചന (419), വഞ്ചന (420), രേഖകൾ വ്യാജമായി നിർമ്മിക്കൽ (467), വഞ്ചനയ്ക്ക് വേണ്ടി രേഖകൾ വ്യാജമായി നിർമ്മിക്കൽ (468), വ്യാജ രേഖകൾ ഉപയോഗിക്കൽ (471) എന്നിവയുൾപ്പെടെ ഇന്ത്യൻ ശിക്ഷാ നിയമപ്രകാരം നിരവധി കുറ്റങ്ങൾ എഫ്‌ഐആറിൽ ഇവർക്കെതിരെ ചുമത്തിയിട്ടുണ്ട്