ഹരിദ്വാര്‍:  ഉത്തരാഖണ്ഡില്‍ ഏവു വയസ്സുകാരനായ മുസ്‌ലിം വിദ്യാര്‍ഥിക്ക് അധ്യാപകരുടെ അതിക്രൂര മര്‍ദ്ദനം. ഹരിദ്വാര്‍ ജില്ലയിലെ ജബ്രേര ഗ്രാമത്തിലെ സര്‍ക്കാര്‍ സ്‌കൂളിലാണ് സംഭവം. ഒരു ദിവസം സ്‌കൂളില്‍ പോകാതിരുന്നതിനാണ് അധ്യാപകര്‍ ഇത്ര ക്രൂരമായി കുട്ടിയെ മര്‍ദ്ദിച്ചതെന്ന് പിതാവ് നല്‍കിയ പരാതിയില്‍ പറയുന്നു. അടുത്ത ദിവസം വന്ന കുട്ടിയെ   അധ്യാപകരായ രാകേഷ് സൈനിയും രവീന്ദ്രയും ചേര്‍ന്ന് അവനെ കഠിനമായി പീഡിപ്പിക്കുകയായിരുന്നു. കുട്ടിക്ക് കൈ ഒടിഞ്ഞതുള്‍പ്പെടെ ഗുരുതരമായ പരിക്കുകള്‍ ഉണ്ടായിരുന്നു.

സ്‌കൂള്‍ പ്രിന്‍സിപ്പല്‍ രവീന്ദ്ര കുട്ടിയുടെ മുഖത്ത് ഷൂ കൊണ്ട് ഉരച്ചതായും അധ്യാപകന്‍ രാകേഷ് സൈനി കുട്ടിയെ നിഷ്‌കരുണം മര്‍ദ്ദിച്ചതായും പരാതിയില്‍ പറയുന്നു. കുട്ടിയുടെ ശരീരത്തില്‍ ഒന്നിലധികം മുറിവുകള്‍ ഉണ്ടെന്ന് കുടുംബം പങ്കുവെച്ച ചിത്രങ്ങളില്‍ വ്യക്തമാണ്. 

കുടുംബത്തിന്റെ പരാതിയില്‍ നടപടി സ്വീകരിച്ച ഹരിദ്വാര്‍ പൊലിസ് 2025 സെപ്റ്റംബര്‍ 11 ന് ജുവനൈല്‍ ജസ്റ്റിസ് (കുട്ടികളുടെ പരിചരണവും സംരക്ഷണവും) നിയമം, 2015 (സെക്ഷന്‍ 75), ഭാരതീയ ന്യായ് സന്‍ഹിത (ബിഎന്‍എസ്) 115(2) (സ്വമേധയാ പരിക്കേല്‍പ്പിക്കുന്നത്), 351(2) (ക്രിമിനല്‍ ഭീഷണിപ്പെടുത്തല്‍) എന്നീ വകുപ്പുകള്‍ പ്രകാരം എഫ്.ഐ.ആര്‍ രജിസ്റ്റര്‍ ചെയ്തിട്ടുണ്ട്. സംഭവത്തില്‍ കൂടുതല്‍ അന്വേഷണവും നിയമനടപടികളും നടക്കുന്നുണ്ടെന്ന് ജാബ്രേര പൊലിസ് സ്റ്റേഷനിലെ ഉദ്യോഗസ്ഥര്‍ അറിയിച്ചു.

ALSO READ: 'ഗസ്സ പിടിച്ചടക്കിയാലും ഹമാസിനെ തോല്‍പിക്കാനാവില്ല' ഇസ്‌റാഈല്‍ സൈനിക മേധാവി 

തന്റെ മകന്‍ നിലവില്‍ പ്രാദേശിക ആശുപത്രിയില്‍ ചികിത്സയിലാണെന്നും പിതാവ് വ്യക്തമാക്കി. പ്രതികള്‍ക്കെതിരെ കര്‍ശന നടപടി ആവശ്യപ്പെട്ട് ഡല്‍ഹി ന്യൂനപക്ഷ കമ്മീഷന്റെ മുന്‍ ഉപദേഷ്ടാവ് മുഹമ്മദ് സദ്ദാം മുജീബ് ദേശീയ ന്യൂനപക്ഷ കമ്മീഷന്‍, ദേശീയ ബാലാവകാശ സംരക്ഷണ കമ്മീഷന്‍ (NCPCR), ദേശീയ മനുഷ്യാവകാശ കമ്മീഷന്‍ (NHRC) എന്നിവയില്‍ പരാതി നല്‍കി.

'ഇത് കുട്ടികളുടെ അവകാശങ്ങളുടെ വ്യക്തമായ ലംഘനമാണ്.  ഇത് അന്വേഷിക്കേണ്ടതുണ്ട്. വിദ്യാര്‍ത്ഥി സുരക്ഷ അപകടത്തിലാണ്' സദ്ദാം മുജീബ് ചൂണ്ടിക്കാട്ടി. സംസ്ഥാനത്തെ ഏതൊരു വിദ്യാര്‍ത്ഥിക്കും ഇത് സംഭവിക്കാം. ഇത് ആവര്‍ത്തിക്കരുത്. അതിനാല്‍ ഉത്തരവാദിത്തം ഉറപ്പാക്കണമെന്നും അദ്ദേഹം കൂട്ടിച്ചേര്‍ത്തു.

in uttarakhand, a 7-year-old muslim student was allegedly subjected to brutal physical assault by teachers, including being beaten and having his face rubbed with a shoe. multiple injuries reported on his body.