ജറൂസലം: ഖത്തർ ആക്രമണത്തെ തുടർന്ന് അറബ് രാജ്യങ്ങളുടെ ഉച്ചകോടി ദോഹയിൽ നടക്കുന്നതിനിടെ ഇസ്‌റാഈലിന് പിന്തുണ ഉറപ്പുനൽകി  യു.എസ് വിദേശകാര്യ മന്ത്രി മാർക്കോ റൂബിയോയുടെ ജറുസലേം സന്ദർശനം. അമേരിക്ക ഇസ്‌റാഈലിന് ഉറച്ച പിന്തുണ നൽകുമെന്ന്  നെതന്യാഹുവുമൊത്ത് നടത്തിയ സംയുക്ത വാർത്താസമ്മേളനത്തിൽ റൂബിയോ വ്യക്തമാക്കി. 

ഖത്തറിൽ ഇസ്‌റാഈൽ നടത്തിയ ആക്രമണത്തെ തുടർന്ന് സംഭവിക്കുന്ന കാര്യങ്ങൾ യു.എസ് ഉറ്റുനോക്കുകയാണെന്നും റൂബിയോ പറഞ്ഞു. ഫലസ്തീൻ രാജ്യത്തെ അംഗീകരിക്കാൻ അടുത്തയാഴ്ച നടക്കുന്ന യു.എൻ സമ്മേളനത്തെ റൂബിയോ ചോദ്യംചെയ്തു. അത് പ്രതീകാത്മകമാണ്. അതിനെതിരേ ഇസ്‌റാഈലിന്റെ പ്രതികരണമുണ്ടാകും. ഫലസ്തീൻ രാജ്യത്തിന് അംഗീകാരം നൽകാനുള്ള സമ്മർദം വെടിനിർത്തൽ അസാധ്യമാക്കും. അത് ഹമാസിന് കരുത്ത് പകരുകയേയുള്ളൂവെന്നും റൂബിയോ പറഞ്ഞു. ബ്രിട്ടൻ, ഫ്രാൻസ്, ബെൽജിയം തുടങ്ങിയ യൂറോപ്യൻ രാജ്യങ്ങൾ ഗസ്സ ആക്രമണം ഇസ്‌റാഈൽ നിർത്തിയില്ലെങ്കിൽ ഫലസ്തീനെ തങ്ങൾ യു.എന്നിൽ അംഗീകരിക്കുമെന്ന് അടുത്തിടെ പ്രഖ്യാപിച്ചിരുന്നു. 

അതേസമയം, മധ്യസ്ഥതയുമായി ഖത്തർ മുന്നോട്ടുപോകണമെന്നാണ് യു.എസിന്റെ ആഗ്രഹമെന്നും റൂബിയോ പറഞ്ഞു. എന്നാൽ, ഹമാസിനെ ഒരു സായുധ സംഘടനയായി തുടരാൻ അനുവദിക്കാനാകില്ല. അവർ ഇസ്‌റാഈലിനു മാത്രമല്ല, ലോകത്തിനു തന്നെ ഭീഷണിയാണ്. ഹമാസില്ലാത്ത ഭാവിയാണ് ഗസ്സക്കാർക്കു വേണ്ടത്. ബന്ദികളെ ജീവനോടെയോ അല്ലാതെയോ തിരിച്ചെത്തിക്കാൻ നെതന്യാഹു ബാധ്യസ്ഥനാണ്. അവസാന ബന്ദിയെയും മോചിപ്പിക്കുകയും ഹമാസിനെ തുടച്ചുനീക്കുകയും ചെയ്യുന്നതുവരെ ഗസ്സയിൽ സമാധാനം നടപ്പാകില്ല. ഹമാസിനെ ഇല്ലാതാക്കാൻ സൈനിക ആക്രമണം ആവശ്യമാണെന്നും റൂബിയോ വ്യക്തമാക്കി.