തിരുവനന്തപുരം: സംസ്ഥാനത്തെ പൊലിസ് അതിക്രമങ്ങള്‍ സംബന്ധിച്ച് പ്രതിപക്ഷം നല്‍കിയ അടിയന്തര പ്രമേയത്തിന് അനുമതി നല്‍കി. ഉച്ചയ്ക്ക് 12 മുതല്‍ രണ്ടു മണിക്കൂറായിരിക്കും അടിയന്തര പ്രമേയത്തിനുമേല്‍ ചര്‍ച്ച നടക്കുകയെന്ന് സ്പീക്കര്‍ അറിയിച്ചു. ചര്‍ച്ചയ്ക്ക് തയ്യാറാണെന്ന് ആഭ്യന്തര വകുപ്പിന്റെ ചുമതലയുള്ള മുഖ്യമന്ത്രി വ്യക്തമാക്കി. ദൃശ്യ മാധ്യമങ്ങള്‍ ഒരുപാട് ചര്‍ച്ച ചെയ്തതാണെന്നും അതുകൊണ്ട് നമുക്കും ചര്‍ച്ച ചെയ്യാമെന്ന് മുഖ്യമന്ത്രി  സഭയെ അറിയിക്കുകയായിരുന്നു.

 റോജി എം. ജോണ്‍, കെ.പി.എ. മജീദ്, മോണ്‍സ് ജോസഫ്, അനൂപ് ജേക്കബ്, മാണി സി. കാപ്പന്‍, കെ.കെ. രമ എന്നിവരാണ് നോട്ടിസ് നല്‍കിയത്.

പൊലിസ് അതിക്രമം സംബന്ധിച്ച വിഷയത്തില്‍ മൗനത്തിലായിരുന്ന മുഖ്യമന്ത്രി കസ്റ്റഡി മര്‍ദ്ദനം ഒറ്റപ്പെട്ട സംഭവമാണെന്ന് ഇന്നലെ പറഞ്ഞിരുന്നു. പരാതികള്‍ ഉയരുമ്പോള്‍ അത് പര്‍വതീകരിച്ച് കാണിക്കാനുള്ള ശ്രമങ്ങള്‍ നടക്കുകയാണെന്നും മുഖ്യമന്ത്രി പറഞ്ഞു. എല്‍ഡിഎഫ് യോഗത്തിലാണ് മുഖ്യമന്ത്രിയുടെ പരാമര്‍ശം.

മുന്‍പ് സംഭവിച്ച ചില കാര്യങ്ങളെ കുറിച്ച് ഇപ്പോള്‍ പരാതി ഉയര്‍ന്ന് വരുന്നുണ്ട്. വിവരങ്ങളുടെ അടിസ്ഥാനത്തില്‍ കുറ്റക്കാര്‍ക്കെതിരെ നടപടി സ്വീകരിച്ച് വരികയാണ്. ആരോപണ വിധേയരായ പൊലിസുകാര്‍ക്കെതിരെ നടപടിയെടുക്കുന്നുണ്ട്. സംസ്ഥാനത്ത് ഉടനീളം ഇത്തരം സംഭവങ്ങള്‍ നടക്കുന്നുണ്ടെന്ന പ്രചരണം അവാസ്തവമാണ്. ഒറ്റപ്പെട്ട പരാതികള്‍ പര്‍വതീകരിച്ച് കാണിക്കാനുള്ള ശ്രമങ്ങള്‍ നടക്കുന്നുണ്ട്. തിരഞ്ഞെടുപ്പ് അടുത്ത സാഹചര്യത്തിലാണ് ഇത് നടക്കുന്നതെന്നും മുഖ്യമന്ത്രി വിശദീകരിച്ചു.

കൂടാതെ പൊലിസിന്റെ ഭാഗത്ത് നിന്ന് ചെറിയ വീഴ്ച്ചകള്‍ പോലും വരാതിരിക്കാന്‍ ഇനി ശ്രദ്ധയും ഇടപെടലും ഉണ്ടാകുമെന്നും മുഖ്യമന്ത്രി ഉറപ്പ് നല്‍കി. പൊലിസിനെതിരെ വ്യാപക പരാതി ഉയരുകയും, സിപി ഐ സമ്മേളനത്തിലടക്കം കസ്റ്റഡി മര്‍ദ്ദനങ്ങള്‍ക്കെതിരെ വിമര്‍ശനം ഉയരുകയും ചെയ്ത സാഹചര്യത്തിലാണ് വിശദീകരണവുമായി മുഖ്യമന്ത്രി രംഗത്തെത്തിയത്.

പൊലിസ് മര്‍ദനത്തില്‍ അടിയന്തര പ്രമേയം നല്‍കി സര്‍ക്കാരിനെതിരെ പോര് കനപ്പിക്കാനാണ് പ്രതിപക്ഷത്തിന്റെ നീക്കം. എന്നാല്‍, യു.ഡി.എഫ് ഭരണകാലത്തെ പൊലിസ് മര്‍ദനങ്ങളടക്കം ഉന്നയിച്ച് പ്രതിരോധിക്കാനാവും ഭരണപക്ഷത്തിന്റെ നീക്കം.

അതേസമയം, പ്രതിപക്ഷനേതാവിന്റെ നിലപാട് തള്ളി ഇന്നലെ സഭയില്‍ എത്തിയ രാഹൂല്‍ മാങ്കൂട്ടത്തില്‍ ഇന്ന് സഭയിലെത്തിയില്ല. വ്യക്തിപരമായ കാരണങ്ങള്‍ ചൂണ്ടിക്കാട്ടി വിട്ടുനില്‍ക്കുന്നതായാണ് ലഭിക്കുന്ന വിശദീകരണം.