കൊച്ചി: ഇടപ്പള്ളി- മണ്ണൂത്തി പദേശീയ പാതയില്‍ പാലിയേക്കരയില്‍ ടോള്‍ പിരിവിനുള്ള വിലക്ക് നീക്കാതെ ഹൈക്കോടതി. ഇത് സംബന്ധിച്ച് ദേശീയ പാതാ അതോറിറ്റിയുടെ ഹരജി പരിഗണിക്കവെയാണ് ഹൈക്കോടതി നിലപാട് കടുപ്പിച്ചത്. ഹൈക്കോടതി ഡിവിഷന്‍ ബെഞ്ചാണ് വ്യാഴാഴ്ച വരേ വിലക്ക് നീട്ടിയത്. ജനങ്ങളെ പരീക്ഷിക്കരുതെന്ന് കോടതി കമ്പനിക്ക് മുന്നറിയിപ്പ് നല്‍കി.

പ്രദേശത്തെ ഗതാഗത പ്രശ്‌നം റോഡിന്റെ ശോചനീയാവസ്ഥ, നിര്‍മാണ പ്രവര്‍ത്തനങ്ങളുടെ പുരോഗതി എന്നിവ സംബന്ധിച്ചുള്ള ജില്ലാ കളക്ടറുടെ റിപ്പോര്‍ട്ട് കോടതിയുടെ പരിഗണനയിലാണ്. റോഡിലെ 18 ഇടങ്ങളിലാണ് പ്രശ്‌നങ്ങളുള്ളതെന്ന് റിപ്പോര്‍ട്ടില്‍ പറയുന്നു. ഇതില്‍ 13 ഇടങ്ങളിലെ പ്രശ്‌നങ്ങള്‍ ഏറെക്കുറെ പരിഹരിച്ചുവെന്നും റിപ്പോര്‍ട്ടില്‍ ചൂണ്ടിക്കാണിച്ചിരുന്നു. എന്നാല്‍ ഈ റിപ്പോര്‍ട്ട് പൂര്‍ണമല്ലെന്നും ഇതിന്റെ അടിസ്ഥാനത്തില്‍ മുന്നോട്ടു പോകാന്‍ കഴിയില്ലെന്നും കോടതി പറഞ്ഞു. പൂര്‍ണമായ റിപ്പോര്‍ട്ട് നല്‍കാന്‍ കൂടുതല്‍ സമയം വേണമെന്ന് കളക്ടര്‍ ആവശ്യപ്പെട്ടതു പ്രകാരം ഹരജി മാറ്റിവെക്കുകയായിരുന്നു. 

സര്‍വിസ് റോഡുകളിലെ പ്രശ്‌നങ്ങള്‍ പരിഹരിക്കപ്പെട്ടുവരികയാണെന്നും, ടോള്‍ പിരിവ് പുനരാരംഭിക്കാന്‍ ഉത്തരവില്‍ മാറ്റം വരുത്തണമെന്നുമുള്ള ദേശീയപാത അതോറിറ്റിയുടെ (NHAI) ആവശ്യം തള്ളിയാണ് കഴിഞ്ഞ ദിവസം ഹൈക്കോടതി ടോള്‍ പിരിവ് താല്‍ക്കാലികമായി നിര്‍ത്തിവെച്ചത്. 

മണ്ണുത്തി-ഇടപ്പള്ളി ഭാഗത്ത് തുടരുന്ന ഗതാഗത പ്രശ്‌നങ്ങള്‍ പരിശോധിക്കാന്‍, ദേശീയ പാത അതോറിറ്റി പ്രതിനിധികളുടെ സാന്നിധ്യത്തില്‍ ഒരു ഗതാഗത മാനേജ്‌മെന്റ് സമിതി പരിശോധന നടത്തണമെന്ന് നേരത്തെ ജസ്റ്റിസ് മുഹമ്മദ് മുഷ്താഖ്, ജസ്റ്റിസ് ഹരിശങ്കര്‍ വി. മേനോന്‍ എന്നിവര്‍ അടങ്ങുന്ന ഡിവിഷന്‍ ബെഞ്ച് നിര്‍ദേശിച്ചിരുന്നു. ജില്ലാ കളക്ടര്‍ പരിശോധന നടത്തിയോ എന്ന കോടതിയുടെ ചോദ്യത്തിന്, ഇതിനായി 15 ദിവസത്തെ അധിക സമയം ആവശ്യമാണെന്ന് ദേശീയപാത അതോറിറ്റി അറിയിച്ചു.

ദേശീയപാതയിലെ അറ്റകുറ്റപ്പണികള്‍ മൂലമുണ്ടായ ഗതാഗതക്കുരുക്കിന്റെ പശ്ചാത്തലത്തില്‍ 2025 ആഗസ്റ്റ് 6-ന് ഹൈക്കോടതി ഡിവിഷന്‍ ബെഞ്ച് പാലിയേക്കരയിലെ ടോള്‍ പിരിവ് നാലാഴ്ചത്തേക്ക് നിര്‍ത്തിവെക്കണമെന്ന് ഉത്തരവിട്ടിരുന്നു, ഇത് സുപ്രീം കോടതിയും ശരിവെച്ചു. പിന്നീട്, ടോള്‍ പിരിവ് 2025 സെപ്റ്റംബര്‍ 9 വരെ നീട്ടുകയായിരുന്നു. എന്നാല്‍, ഹരജിയില്‍ അന്തിമ തീരുമാനം വരുന്നതുവരെ ടോള്‍ പിരിവ് പുനഃസ്ഥാപിക്കില്ലെന്ന് കോടതി വ്യക്തമാക്കി.