ലക്നൗ: ബലാത്സംഗക്കേസിൽ ജയിലിൽ കഴിയുന്ന ഉത്തർപ്രദേശ് മുൻ മന്ത്രി ഗായത്രി പ്രജാപതിയ്ക്ക് നേരെ ജയിലിനുള്ളിൽ വെച്ച് ആക്രമണം. പരുക്കേറ്റ പ്രജാപതിയെ ആശുപത്രിയിൽ പ്രവേശിപ്പിച്ചു. ലക്‌നോ ജയിലിൽ വെച്ചാണ് സഹതടവുകാരൻ ആക്രമിച്ചത്. ജയിലിൽ ശുചീകരണ ജോലിയിലായിരുന്ന ഒരു തടവുകാരനുമായി ഉണ്ടായ വഴക്കിന് പിന്നാലെയാണ് ഇയാൾ പ്രജാപതിയെ ആക്രമിച്ചത്. തടവുകാരൻ കബോർഡ് ഉപയോഗിച്ച് പ്രജാപതിയുടെ തലയ്ക്ക് ആക്രമിക്കുകയായിരുന്നു.

ചൊവ്വാഴ്ചയാണ് സംഭവം നടന്നത്. തടവുകാരൻ അലമാരയുടെ സ്ലൈഡിംഗ് ഭാഗം ഉപയോഗിച്ച് ആക്രമിക്കുകയായിരുന്നു. ആക്രമണത്തിൽ പ്രജാപതിയുടെ വലത് കൈക്കും തലയ്ക്കും പരിക്കേറ്റു. ഉടൻ തന്നെ അദ്ദേഹത്തെ ലക്‌നോ ജില്ലാ ജയിലിലെ ജയിൽ ആശുപത്രിയിൽ പ്രവേശിപ്പിച്ചു. പിന്നീട് ഇവിടെ നിന്ന് പ്രജാപതിയെ ലഖ്‌നൗവിലെ കിംഗ് ജോർജ്ജ് മെഡിക്കൽ യൂണിവേഴ്‌സിറ്റിയിൽ (കെജിഎംയു) ചികിത്സയ്ക്കായി അയച്ചു. ആക്രമണത്തിന് പിന്നാലെ, അമേഠിയിൽ നിന്നുള്ള സമാജ്‌വാദി പാർട്ടി എംഎൽഎ കൂടിയായ പ്രജാപതിയുടെ ഭാര്യ മഹാരാജി പ്രജാപതിയും ആശുപത്രിയിലെത്തി.

പ്രജാപതിയുടെ ആരോഗ്യനില തൃപ്തികരമാണെന്നും അപകട നില തരണം ചെയ്തുവെന്നും ആശുപത്രി അധികൃതർ അറിയിച്ചു. ബിശ്വാസ് എന്ന തടവുകാരൻ ആണ് ആക്രമിച്ചതെന്ന് പ്രജാപതി ആശുപതിയിൽ വെച്ച് പറഞ്ഞു. വളരെക്കാലമായി ജയിലിൽ ഉള്ളയാളാണ് ആക്രമിച്ചത്. എന്റെ ജീവൻ രക്ഷപ്പെട്ടതിൽ എനിക്ക് സന്തോഷമുണ്ട്. എല്ലാം പെട്ടെന്ന് സംഭവിച്ചു. എനിക്ക് ആരുമായും ഒരു തർക്കവും ഉണ്ടായിരുന്നില്ല - അദ്ദേഹം പ്രതികരിച്ചു.

"യുപി സർക്കാരിലെ മുൻ എംഎൽഎയും മുൻ മന്ത്രിയുമായ ഗായത്രി പ്രജാപതിക്കെതിരെ ജയിലിൽ നടന്ന മാരകമായ ആക്രമണത്തിൽ ന്യായമായ ജുഡീഷ്യൽ അന്വേഷണം നടത്തണം. യുപിയിൽ എവിടെയും ആരും സുരക്ഷിതരല്ല" എസ്പി അധ്യക്ഷൻ അഖിലേഷ് യാദവ് എക്‌സിൽ ആവശ്യപ്പെട്ടു.

2017-ലാണ് അഖിലേഷ് യാദവ് സർക്കാരിൽ കാബിനറ്റ് മന്ത്രിയായിരുന്നു പ്രജാപതിയെ ബലാത്സംഗ കുറ്റം ചുമത്തി അറസ്റ്റ് ചെയ്തത്.